Aqtóbe oblysynyń turǵyndary shoshqa fermasyn jabýdy talap etýde, dep habarlaıdy «Adyrna»ulttyq portaly «Astana TV» arnasyna silteme jasap. Olardyń aıtýlarynsha, aýyl mańyna qonys tepken dońyzdar halyqty ábden mezi etken. Aınala tezekke tolǵan. Al qolqany qabatyn jaǵymsyz ıis qar jaýsa da basylmaı tur.
Talpaq tanaýdyń ishek-qaryndary kómilgen jerden aıaq alyp júrý múmkin emes. Aýyl turǵyny osyny aıtyp áleýmettik jelide arasha surady. Avtor shoshqa qaldyqtarynyń 900 sharshy metr aýmaqty alyp jatqanyn aıtty. Tunshyqtyq degen halyq 12 jyldan beri janaıqaıǵa qulaq asar jan tappaǵandaryna ashýly. Olar áý-basta kásipkerdiń bul jerge túıequs ósiremin dep ruqsat alǵanyn aıtady.
«Túıequs ustaımyz dedi. Onyń aıaǵy ne bolyp ketti. Bir emes, eki emes 26 baz bar. Bir bazda myńdaǵan shoshqa bar. Sonyń nájisin ákep, tókkende myna Bestamaq qana emes Besqopa, Qaraǵashqa deıin, tipti Alǵaǵa da ıisi jetedi. Tynys alý múmkin emes»,-dedi aýyl turǵyny Erbolat Kenetaev.
Aýyldasynyń sózin Gúlnár Aıtjanova da qostady.
« Sýymyz las, aýamyz las. Tipti tereze asha almaımyz»,-dedi ol.
Buqaranyń aıtýynsha, 40 myń shoshqa ósiretin úlken ferma kún saıyn 280 janýardy etke ótkizý úshin baýyzdaıdy. Al onyń zardaby ushan-teńiz.
Basy daýǵa qalǵan kásipker sońǵy kezde qaldyqtardy jerge kómip júrgenderin moıyndady. Sońǵy 20 kúnde alty myń tonnadaı óndiristik qaldyqty kómipti.
«Bizde ekstrýderler synyp qalyp, sodan ótkir sodamen aralastyryp, kómip tastadyq. Jıyrma kún boldy»,– dedi sharýashylyqtyń atqarýshy dırektory Nurym Qumarov.
Aýdan ákimi jaǵdaıdan habardar. Ol arnaıy komıssııa quryp, tekseris júrgizemiz dep ýáde berdi.
«Biraz kemshilikter anyqtaldy. Arnaıy kelgen komıssııa tekseredi. Sonyń qorytyndysy boıynsha is sotqa beriledi. Sottyń sheshimimen ǵana mekemeni toqtatýǵa bolady»,– deıdi Alǵa aýdanynyń ákimi Mamyrǵaly Aqqaǵazov.
Shoshqa fermasy jabyly ma, jabylmaı ma ol jaǵy ázir belgisiz. Al turǵyndar fermanyń kózin joıý úshin aıanyp qalmaımyz dep otyr.
«Adyrna» ulttyq portaly
