قر پرەزيدەنتى قاسىم-جومارت كەمەلۇلى توقاەۆ «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ – جەرگىلىكتى اكىمدىكتەردىڭ الدىنداعى اسا ماڭىزدى مىندەت. شىمكەنت قالاسىنا قاراستى اۋدان اكىمدىكتەرى تۇرعىندارمەن كەرى بايلانىستى نىعايتىپ، ازاماتتاردىڭ ارىز-شاعىمدارى مەن وتىنىشتەرىنە دەر كەزىندە ءۇن قاتۋى ءتيىس. بۇل تۋرالى قالا اكىمى مۇرات ايتەنوۆ ايتتى.
ءال-فارابي اۋدانىنىڭ اكىمى عابيت ماۋلەنقۇلوۆتىڭ 9 ايدا اتقارىلعان جۇمىستار جونىندەگى ەسەبىن تىڭداعان شاھار باسشىسى تۇرعىندار كوتەرگەن ماسەلەلەرگە نەمقۇرايلى قاراۋ ءالى دە كەزدەسەتىنىن اتاپ ءوتتى.
«مەملەكەت باسشىسى «حالىق ۇنىنە قۇلاق اساتىن مەملەكەت» تۇجىرىمداماسىن ىسكە اسىرۋ تۋرالى تاپسىرما بەرگەن بولاتىن. ياعني، جەرگىلىكتى بيلىك تۇرعىندارمەن تىعىز جۇمىس جاساپ، حالىقتىڭ كۇندەلىكتى ومىرىندە ورىن العان وزەكتى ماسەلەلەردى شەشۋگە ەتەنە ارالاسۋى قاجەت»، دەدى مۇرات دۇيسەنبەكۇلى.
قالا اكىمىنىڭ ايتۋىنشا، ءال-فارابي اۋدانى اكىمىنىڭ اپپاراتىنا 103 ءوتىنىش تۇسكەن. ونىڭ ىشىندە پرەزيدەنت اكىمشىلىگى ارقىلى 7 ءوتىنىش جولدانعان.
شاھار باسشىسى اۋدان اكىمىنىڭ اپپاراتى كەيدە تۇرعىنداردىڭ وتىنىشتەرىنە ءتيىستى دەڭگەيدە نازار اۋدارمايتىنىن اتاپ ءوتتى. بۇدان بولەك، اۋدان اكىمىنىڭ اپپاراتى ازاماتتارمەن ەتەنە جۇمىس ىستەپ، تۇرعىندار اراسىندا زاڭ تالاپتارىن ءتۇسىندىرۋ باعىتىنداعى جۇمىستى كۇشەيتە ءتۇسۋى قاجەتتىگىن جەتكىزدى.
شىمكەنت قالاسى اكىمىنىڭ ءباسپاسوز قىزمەتى
