QR Prezıdenti Qasym-Jomart Kemeluly Toqaev «Halyq únine qulaq asatyn memleket» tujyrymdamasyn iske asyrý – jergilikti ákimdikterdiń aldyndaǵy asa mańyzdy mindet. Shymkent qalasyna qarasty aýdan ákimdikteri turǵyndarmen keri baılanysty nyǵaıtyp, azamattardyń aryz-shaǵymdary men ótinishterine der kezinde ún qatýy tıis. Bul týraly qala ákimi Murat Áıtenov aıtty.
Ál-Farabı aýdanynyń ákimi Ǵabıt Máýlenqulovtyń 9 aıda atqarylǵan jumystar jónindegi esebin tyńdaǵan shahar basshysy turǵyndar kótergen máselelerge nemquraıly qaraý áli de kezdesetinin atap ótti.
«Memleket basshysy «Halyq únine qulaq asatyn memleket» tujyrymdamasyn iske asyrý týraly tapsyrma bergen bolatyn. Iaǵnı, jergilikti bılik turǵyndarmen tyǵyz jumys jasap, halyqtyń kúndelikti ómirinde oryn alǵan ózekti máselelerdi sheshýge etene aralasýy qajet», dedi Murat Dúısenbekuly.
Qala ákiminiń aıtýynsha, Ál-Farabı aýdany ákiminiń apparatyna 103 ótinish túsken. Onyń ishinde Prezıdent Ákimshiligi arqyly 7 ótinish joldanǵan.
Shahar basshysy aýdan ákiminiń apparaty keıde turǵyndardyń ótinishterine tıisti deńgeıde nazar aýdarmaıtynyn atap ótti. Budan bólek, aýdan ákiminiń apparaty azamattarmen etene jumys istep, turǵyndar arasynda zań talaptaryn túsindirý baǵytyndaǵy jumysty kúsheıte túsýi qajettigin jetkizdi.
Shymkent qalasy ákiminiń baspasóz qyzmeti
