بۇگىن اقپاراتتىق-كوممۋنيكاتسيالىق ورتالىعىندا شىمكەنت قالاسى اكىمىنىڭ ورىنباسارى ماقسۇت يساحوۆتىڭ قاتىسۋىمەن قالاداعى جول ماسەلەسى بويىنشا بريفينگ ءوتتى.
ءباسپاسوز ماجىلىسىندە ماقسۇت پەرنەبايۇلى قالاداعى ماگيسترالدى كوشەلەردىڭ ماسەلەسىنە توقتالدى.
– قالاداعى ماگيسترالدى بايدىبەك بي، رەسپۋبليكا، تاۋكە حان داڭعىلدارى، تەمىرلان تاس جولى مەن ت.رىسقۇلوۆ جانە جىبەك جولى كوشەلەرىنىڭ كولىك اعىنى جوبالىق وتكىزۋ قابىلەتىنەن 2 ەسەگە اسۋدا. سول سەبەپتى كولىك كەپتەلىستەرى ءجيى بولۋدا. وسىعان وراي كولىك اعىنىن وڭتايلاندىرۋ ماقساتىندا بىرنەشە جوبا دايىندالدى. ال بۇگىندە قۇرىلىسى ءجۇرىپ جاتقان ماگيسترالدى كوشەلەردىڭ 85 پايىزى اياقتالىپ وتىر. ودان بولەك، جاياۋ جۇرگىنشىلەر جولىن ەكى-ءۇش ادام قاتار جۇرە الاتىنداي ەتىپ ىستەپ جاتىرمىز، – دەدى قالا اكىمىنىڭ ورىنباسارى.
ماقسۇت پەرنەبايۇلىنىڭ سوزىنە سۇيەنسەك، بايدىبەك بي داڭعىلىنداعى كولىك اعىنىن وڭتايلاندىرۋ بارىسىندا ت.وتەگەنوۆ كوشەسىن «شىمكەنت سيتي» قالاشىعىنا دەيىن جالعاستىرۋ جوباسى ازىرلەنگەن. كوشەنىڭ ۇزىندىعى – 2,3 شاقىرىم، ىسكە اسىرۋ مەرزىمى – 2021-2022 ج.ج. كولىك اعىنىن رەتتەۋ كەزىندە س.بايتەرەكوۆ كوشەسىن تۇران شاعىناۋدانىنداعى ماگيسترالدى كوشەلەرىنە (قايتپاس-1 ش/ا، التىنسارين كوشەسىن كەڭەيتۋ) قوسپاق. كوشەنىڭ ۇزىندىعى – 2,1 شاقىرىم. سونداي-اق، اسار شاعىناۋدانىنداعى اتاۋى جوق كوشەنى «شىمكەنت سيتي» قالاشىعىنىڭ ورتالىق كوشەسىنە قوسۋ جوسپارى بار. كوشەنىڭ ۇزىندىعى 1,3 شاقىرىمدى قۇرايدى. ال جىبەك جولى جانە ج.ادىربەكوۆ كوشەلەرىندەگى كولىك اعىنىن وڭتايلاندىرۋ ءۇشىن س.جاندوسوۆ كوشەسىن ءا.ساسبۇقاەۆ كوشەسىنەن ج.ادىربەكوۆ كوشەسىنە دەيىن جالعاستىرماق. كوشەنىڭ ۇزىندىعى 350 مەتردى قۇراپ وتىر.
سونىمەن قاتار، رەسپۋبليكا داڭعىلىنداعى كولىك اعىنىن وڭتايلاندىرۋ كەزىندە د.قوناەۆ داڭعىلى جالعاسىنىڭ جوباسىن ا-2 اۆتوموبيل جولىنا دەيىن قوسىلادى. كوشەنىڭ ۇزىندىعى – 1,6 شاقىرىم. ودان بولەك، اباي داڭعىلىن ن.يسمايلوۆ كوشەسىنەن ا-2 اۆتوموبيل جولىنا دەيىن جالعاسادى. كوشەنىڭ ۇزىندىعى 1,7 شاقىرىمدى قۇرايدى. بۇل جولدىڭ جوباسى ماگيسترالدى تەمىرجول جانە «بادام» وزەنىن قيىپ وتەدى. ال تەمىرلان تاس جولىنىڭ كولىك اعىنىن وڭتايلاندىرۋ ءۇشىن ءال-فارابي كوشەسىن ا-2 اۆتوموبيل جولىنان م-32 اۆتوموبيل جولىنداعى «بادام» جول ايىرىعىنا دەيىن جالعاستىرىلادى. كوشەنىڭ ۇزىندىعى 7,3 شاقىرىمدى قۇراپ، بۇگىندە اتالعان جول قۇرىلىسىنىڭ 80%-ى اتقارىلعان.
ايتا كەتەيىك، بريفينگتە م.يساحوۆ قالاداعى جۇرگىزىلىپ جاتقان كوپىر قۇرىلىستارىنا دا توقتالىپ، جۇمىس بارىسىن باق وكىلدەرىنە جان-جاقتى جەتكىزدى.
شىمكەنت اقپاراتتىق-كوممۋنيكاتسيالىق ورتالىعى
فوتو – س.قوساي
