Búgin aqparattyq-kommýnıkaııalyq ortalyǵynda Shymkent qalasy ákiminiń orynbasary Maqsut Isahovtyń qatysýymen qaladaǵy jol máselesi boıynsha brıfıng ótti.
Baspasóz májilisinde Maqsut Pernebaıuly qaladaǵy magıstraldy kóshelerdiń máselesine toqtaldy.
– Qaladaǵy magıstraldy Báıdibek bı, Respýblıka, Táýke han dańǵyldary, Temirlan tas joly men T.Rysqulov jáne Jibek joly kósheleriniń kólik aǵyny jobalyq ótkizý qabiletinen 2 esege asýda. Sol sebepti kólik keptelisteri jıi bolýda. Osyǵan oraı kólik aǵynyn ońtaılandyrý maqsatynda birneshe joba daıyndaldy. Al búginde qurylysy júrip jatqan magıstraldy kóshelerdiń 85 paıyzy aıaqtalyp otyr. Odan bólek, jaıaý júrginshiler jolyn eki-úsh adam qatar júre alatyndaı etip istep jatyrmyz, – dedi qala ákiminiń orynbasary.
Maqsut Pernebaıulynyń sózine súıensek, Báıdibek bı dańǵylyndaǵy kólik aǵynyn ońtaılandyrý barysynda T.Ótegenov kóshesin «Shymkent Sıtı» qalashyǵyna deıin jalǵastyrý jobasy ázirlengen. Kósheniń uzyndyǵy – 2,3 shaqyrym, iske asyrý merzimi – 2021-2022 j.j. Kólik aǵynyn retteý kezinde S.Báıterekov kóshesin Turan shaǵynaýdanyndaǵy magıstraldy kóshelerine (Qaıtpas-1 sh/a, Altynsarın kóshesin keńeıtý) qospaq. Kósheniń uzyndyǵy – 2,1 shaqyrym. Sondaı-aq, Asar shaǵynaýdanyndaǵy ataýy joq kósheni «Shymkent Sıtı» qalashyǵynyń ortalyq kóshesine qosý jospary bar. Kósheniń uzyndyǵy 1,3 shaqyrymdy quraıdy. Al Jibek joly jáne J.Adyrbekov kóshelerindegi kólik aǵynyn ońtaılandyrý úshin S.Jandosov kóshesin Á.Sasbuqaev kóshesinen J.Adyrbekov kóshesine deıin jalǵastyrmaq. Kósheniń uzyndyǵy 350 metrdi qurap otyr.
Sonymen qatar, Respýblıka dańǵylyndaǵy kólik aǵynyn ońtaılandyrý kezinde D.Qonaev dańǵyly jalǵasynyń jobasyn A-2 avtomobıl jolyna deıin qosylady. Kósheniń uzyndyǵy – 1,6 shaqyrym. Odan bólek, Abaı dańǵylyn N.Ismaılov kóshesinen A-2 avtomobıl jolyna deıin jalǵasady. Kósheniń uzyndyǵy 1,7 shaqyrymdy quraıdy. Bul joldyń jobasy magıstraldy temirjol jáne «Badam» ózenin qıyp ótedi. Al Temirlan tas jolynyń kólik aǵynyn ońtaılandyrý úshin Ál-Farabı kóshesin A-2 avtomobıl jolynan M-32 avtomobıl jolyndaǵy «Badam» jol aıyryǵyna deıin jalǵastyrylady. Kósheniń uzyndyǵy 7,3 shaqyrymdy qurap, búginde atalǵan jol qurylysynyń 80%-y atqarylǵan.
Aıta keteıik, brıfıngte M.Isahov qaladaǵy júrgizilip jatqan kópir qurylystaryna da toqtalyp, jumys barysyn BAQ ókilderine jan-jaqty jetkizdi.
Shymkent aqparattyq-kommýnıkaııalyq ortalyǵy
Foto – S.Qosaı
