شىمكەنتتە «تولەم» جۇيەسى ىسكە قوسىلدى

2559
Adyrna.kz Telegram

قازىرگى تاڭدا بۇكىل الەم كۇن ساناپ تسيفرلاندىرۋ الەمىنە ەنىپ بارادى. ديدجيتيليزاتسيا دا قوعامدىق قاتىناستى وزگەرتىپ جاتقانى حاق. جاقىندا شىمكەنتتە  جاڭا ساندىق تەحنولوگيانىڭ ءساتتى دامىپ كەلە جاتقانى تۋرالى شىمكەنت قالاسىنىڭ اكىمىنىڭ ءبىرىنشى ورىنباسارى شىڭعىس مۇقان ءوزىنىڭ فەيسبۋك پاراقشاسىندا مالىمدەدى. ناقتى ايتقاندا، قالانىڭ قوعامدىق كولىكتەرىندە جاڭادان «تولەم» اتتى تولەم جۇيەسى ىسكە قوسىلىپتى.

شىمكەنت قالاسىنىڭ اكىمىنىڭ ءبىرىنشى ورىنباسارى شىڭعىس مۇقاننىڭ ايتۋىنشا، بۇل جاڭا جۇيە ارقىلى جولاۋشىلار اعىنىنىڭ ستاتيستيكالىق ەسەبىن  جۇرگىزۋگە جانە ناقتى دەرەكتەر ارقىلى الەۋمەتتىك ءمانى بار مارشرۋتاردى سۋبسيديالاۋعا مۇمكىندىك تۋادى.

قوعامدىق كولىكتە جول ءجۇرۋ تولەماقىسىن تولەۋ ءۇشىن  كولىك كارتالارىنىڭ 4 ءتۇرى قاراستىرىلعان. ولار: ستاندارتتىق (جالپى پايدالانۋعا), مەكتەپ وقۋشىلارىنىڭ، ستۋدەنتتىك جانە  جەڭىلدەتىلگەن كارتالار. جولاۋشىلار كولىك كارتاسىمەن، SMS, QR-كود، سمارتفوندى (NFC) قولدانا وتىرىپ جول ءجۇرۋ اقىسىن تولەي الادى. 1 قاراشادان باستاپ كولىك كارتالارى ارقىلى قولما-قول تولەۋ كەزىندە قازىرگى قولداناتىن تاريفپەن 70 تەڭگە تولەيدى، ال قولما-قول اقشامەن تولەۋ كەزىندە تاريف 100 تەڭگە بولادى. كولىك كارتاسىنىڭ باعاسى 500 تەڭگە، ءبىر رەت تەگىن جول ءجۇرۋ اقىسى بەرىلەدى. 14 مىڭ كولىك كارتاسى ۇلى وتان سوعىسى ارداگەرلەرى مەن مۇگەدەكتەرىنە، تىل ەڭبەككەرلەرىنە (ەرەن ەڭبەگى ءۇشىن مەدالىمەن ماراپاتتالعاندار) باتىر انا، التىن القا، كۇمىس القا ءتوس بەلگى يەلەرىنە  جانە  ءى-توپتاعى كورۋ قابىلەتى ناشار زاعيپ جاندارعا تەگىن تاراتىلادى.

جەڭىلدىكپەن جۇرەتىن ازاماتتارعا كارتالاردى تەگىن تاراتۋ ماقساتىندا شىمكەنت قالاسىنىڭ الەۋمەتتىك قورعاۋ جانە جۇمىسپەن قامتۋ باسقارماسى مەن قالاداعى بارلىق حالىققا قىزمەت كورسەتۋ ورتالىقتارىنان ارنايى ورىندار ۇيىمداستىرىلعان. اتالعان ورىنداردا جەڭىلدىك كارتانى الۋ ءۇشىن ازاماتتاردان قاجەتتى مالىمەتتەر قابىلدانىپ، بازاعا ەنگىزىلەدى. بۇگىنگى تاڭدا ينۆەستور تاراپىنان كولىك كومپانيالارىمەن شارت جاسالىپ، اۆتوبۋستارعا ۆاليداتورلار ورناتىلدى.

سونىمەن قاتار، سمارتفون پايدالانۋشىلارىنا ارنالعان «Open Shymkent» موبيلدىك قوسىمشا ازىرلەنگەن، ايتىلعان قوسىمشا ارقىلى قولدانۋشى ءوزىنىڭ كارتاسىنىڭ تەڭگەرىمىن تەكسەرە الادى. سونداي-اق، تەڭگەرىمىن تولتىرۋمەن قاتار جول ءجۇرۋ تاريحىن دا كورۋىنە بولادى.

ودان وزگە قالا تۇرعىندارى «Open Shymkent» قوسىمشاسى ارقىلى باسقا دا قالالىق اكىمدىكپەن كورسەتىلەتىن قىزمەت تۇرلەرىن الا الادى. تۇرعىندارعا انىقتامالىق رەتىندە 8 775 811 2222 بىرىڭعاي بايلانىس CALL-ورتالىعى ىسكە قوسىلعان. ايتا كەتۋ كەرەك، «تولەم» كارتالارىن قالاداعى ساۋدا ۇيلەرىنەن الۋعا بولادى.

دايىنداعان: د. ارعىنگەلدى

دەرەككوز: مالىمەتتەر شىڭعىس مۇقاننىڭ فەيسبۋك پاراقشاسىنان الىندى.

پىكىرلەر