بۇگىن اقپاراتتىق-كوممۋنيكاتسيالىق ورتالىعىندا شىمكەنت قالالىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى ب.پوزيلوۆ جانە دەنساۋلىق ساقتاۋ باسقارماسى وكىلدەرىنىڭ قاتىسۋىمەن قالاداعى ەپيدەميولوگيالىق احۋال توڭىرەگىندە بريفينگ ءوتتى.
ءباسپاسوز ماجىلىسىندە باقىتجان جولداسبەكۇلى، ەڭ الدىمەن، ەپيدەميولوگيالىق جاعداي كەزىندەگى ۇيلەستىرۋ توپتارىنىڭ جۇمىسىنا توقتالدى.
– ۇيلەستىرۋ توپتارى ىقتيمالدى ەكىنشى تولقىن كەزىندە سيتۋاتسيالىق شتاتتا وتىرىپ، ارقايسىسى ءوز سالاسى بويىنشا جۇمىستارىن اتقارادى. ماسەلەن، ولار جەدەل جاردەم قىزمەتتەرى، كۇندىزگى ستاتسيونارلار مەن پروۆيزورلى ورىندار جانە قۇرىلعىلار بارىسىن، جالپى، ەپيدەميولوگيالىق جاعدايدى باقىلايدى ءارى وعان جاۋاپ بەرەدى. بۇل جۇمىسىمىزدىڭ ساپاسىن ارتتىرادى، وعان قوسا قالىپتاسقان احۋالدى ەداۋىر جەڭىلدەتەدى. وسى رەتتە ۇيلەستىرۋ توبىنا قۇرىلعىلاردىڭ جۇمىس ساپاسىن ارتتىرۋ ماقساتىندا باس رەنتگەنولوگ جانە كومپيۋتەرلىك توموگرافيا مەن رەنتگەن اپپاراتتارىنا جاۋاپ بەرەتىن تەحنيكا ماماندارىن قوستىق، – دەدى ب.پوزيلوۆ.
باقىتجان جولداسبەكۇلىنىڭ ايتۋىنشا، ىقتيمالدى ەكىنشى تولقىن كەزىندە پروۆيزورلى جانە ينفەكتسيالىق ستاتسيونارلاردىڭ جۇمىسىن ازىرلەۋ ماقساتىندا ارنايى 3 ستسەناري تۇزىلگەن. ولار – تۇراقتى، قولايسىز جانە جاعداي ورشىگەن كەز. بۇل جوسپارلار («ا»، «ب» «س») بارىسىندا ءبىر-بىرىنە اۋىسۋ ءساتىن ءۇش ساعاتتىڭ ىشىندە جۇزەگە اسىرۋ جولعا قويىلعان.
بريفينگتە بەلگىلى بولعانداي، قالادا كوروناۆيرۋس جۇقتىرعان ناۋقاستاردى قابىلدايتىن 13 دياگنوستيكالىق ورتالىق ۇيىمداستىرىلعان. وندا 17 كت جانە 30 رەنتگەن اپپاراتى بار. سونىمەن بىرگە 6 پتر زەرتحاناسى بار، ونىڭ 2-ەۋى جاڭادان اشىلعان، تاۋلىگىنە 2 500 تەست قابىلدايدى. سونداي-اق، ماتەريالدىق-تەحنيكالىق جابدىقتاۋ بويىنشا قوسىمشا 282 يۆل اپپاراتى الىنىپ، جالپى سانى 612 بىرلىككە جەتكەن. ودان بولەك، جاڭا 3 وتتەگى ستانتسياسى مەن 9 سۇيىق وتتەگى رەزەرۆۋارى قوندىرىلعان. ال جەدەل جاردەم بويىنشا جاڭا call-center ىسكە قوسىلعان جانە شاقىرۋدى قابىلداۋ لينياسى 9-دان 28-گە ءوسىپ، وپەراتورلار سانى ءۇش ەسەگە ارتقان. سونىمەن قاتار، مەديتسينا ۇيىمدارىنىڭ ءوزارا ارەكەت الگوريتمى پىسىقتالىپ، ناۋقاستاردى كاتەگوريالارعا ءبولۋدى ۇيلەستىرۋ ءۇشىن 3 رەت وقۋ-جاتتىعۋ وتكىزىلگەن.
ايتا كەتەيىك، بۇگىندە قالادا ەپيدەميولوگيالىق احۋال تۇراقتى. قالا بويىنشا كۆي جۇقتىرۋدىڭ جالپى 5 209 جاعدايى تىركەلىپ، ونىڭ ىشىندە 5 129 ناۋقاس دەرتىنەن ساۋىققان. ال جرۆي بويىنشا قازىرگى ۋاقىتقا دەيىن 126 635 ادامعا ۆاكتسينا سالىنعان. بۇل كورسەتكىشتى 128 مىڭنان اسىرۋ كوزدەلىپ، 15 قاراشاعا دەيىن ءجۇز پايىز ورىنداۋ جوسپارعا قويىلعان.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – بەرەكە سەيىتجاپپار
