«بورات» قازاقتى تاعى ءبىر مارتە ماسقارا ەتپەكشى: ەل بيلىگى نەگە ءۇنسىز؟

3699

قازاقتى مازاق ەتكەن «بوراتتىڭ» تۇسىرىلگەنىنە بيىل 14 جىل تولادى. شىنى كەرەك، فيلم ەلىمىزدىڭ بەدەلىنە ۇلكەن نۇقسان كەلتىرىپ، نامىسىمىزدى اياققا تاپتادى. الەم ءبىزدى جابايى،نادان ۇلت رەتىندە تانىدى. بۇل كۇيەدەن ارىلۋ ءۇشىن قازاقستانعا ءبىراز جۇمىس اتقارۋعا تۋرا كەلدى. ارەڭ دەگەندە سىرتقى ءيميدجىمىزدى جاقسارتتىق پا دەسەك، قايدام.. ەرتە قۋانىپپىز.  كۇنى كەشە شەتەلدىك باق «بورات-2» ءفيلمىنىڭ ءتۇسىرىلىپ بىتكەنىن حابارلادى. ول ءتىپتى يندۋسترياداعى تاڭداۋلى ادامدارعا كورسەتىلىپتى-مىس. بۇل اقپاراتتى كورشىلەس رەسەي،قىرعىزستان ەلدەرى دە جارىسا جازدى. ءبىزدىڭ بيلىك نەگە ءۇنسىز، الدە مازاققا ەتىمىز ۇيرەنىپ كەتتى مە؟

  «وسكارعا» ۇسىنىلعان فيلم

ءتۇسىرىلىمى رۋمىنيادا وتكەن «بورات» ءفيلمىنىڭ تۇساۋى 2006 جىلدىڭ 1 قاراشاسىندا بەلگيادا كەسىلگەن ەدى. كەيىننەن ول اقش پەن كانادادا، سونداي-اق، ەۋروپانىڭ 14 ەلىندە كورسەتىلدى. تۋىندى الەمدىك كينوپروكاتتان 262 ميلليون دوللار پايدا تاپقان. ەڭ سوراقاسى، ول «ۇزدىك يكەمدەلگەن ستسەناري» نوميناتسياسىندا «وسكارعا» ۇسىنىلدى.

قازاقستاندا بۇل ءفيلمنىڭ پروكاتىنا تىيىم سالىندى. الايدا، ەلەكتروندىق ساۋدامەن اينالىساتىن «Amazon» كومپانياسى «بورات» تاسپالانعان ديسكتەرگە دەگەن تاپسىرىس كوپتىگىن حابارلاعان ەدى. بۇل اقپارات تۋىندىنىڭ تارالماۋىنا توسقاۋىل قويا الماعانىمىزدى دالەلدەدى.

ازىرگە «بورات-2» ءفيلمىنىڭ قاشان جارىققا شىعاتىنى بەلگىسىز. كەيبىر دەرەككوزدەر كينوكارتينانىڭ پرەمەراسى اقش-تاعى جاڭا پرەزيدەنتتىك سايلاۋعا دەيىن بولادى دەپ بولجاۋدا.

جاڭا ءفيلمنىڭ تۇسىرىلگەنىن ەستىگەن وتانداستارىمىز الەۋمەتتىك جەلىدە ءوز نارازىلىقتارىن ءبىلدىردى. نۇرقانات قايرات ەسىمدى اقىن:

«قازاقتىڭ قورلاپ جاتىر ۇلتىن بۇلار،

ساۋداسىن ساۋاتسىزدىڭ كىم تىڭدىرار.

ءبىر قازاق شىقپادى ما ارامىزدان،

ءبىر-بىرلەپ بۇل سورلىنىڭ مۇرتىن جۇلار؟»-دەسە,  Atlas Art اتى-جونىمەن تىركەلگەن وقىرمان:«نامىسسىز ادامدار «قالجىڭ» دەپ باعالار، تۋريستىك ورىندار «پايدا» تابار، دەگەنمەن ۇلتتىق نامىس بارىنەن دە جوعارى. نەگە ءبىز ءفيلمنىڭ جارىققا شىقپاۋىنا حالىقارالىق دارەجەدە  تىيىم سالمايمىز؟»-دەپ ءوز ۇسىنىسىن ءبىلدىردى.

 «قازاقتار جىلقىنىڭ ءزارىن ىشەدى»

2016 جىلى قىرعىزستاندا جۇمىس جاسايتىن مايكل ماكفيت ەسىمدى بريتان ازاماتى قازىنى جىلقىنىڭ جىنىس مۇشەسىنە تەڭەپ، ەل اشۋىن تۋعىزعان ەدى. دەسە دە، قىرعىز باۋىرلارىمىز بىردەن ارەكەتكە كوشىپ، شەتەلدىكتى ەلدەن قۋىپ شىقتى. ال ءبىز «قازاقتار جىلقىنىڭ ءزارىن ىشەدى، سىعاندارعا اڭشىلىق قۇرادى» دەپ جاھانعا جالعان اقپارات تاراتقان بوراتتىڭ ءىس-ارەكەتىنە ءالى دە بولسىن كوز جۇمۋمەن كەلەمىز. «قوي اۋزىنان ءشوپ الماس» مىنەزىمىزدەن قاشان قۇتىلار ەكەنبىز؟!

                                                    ديانا اسان،

                               «ادىرنا» ۇلتتىق پورتالى

پىكىرلەر