وزگە ەلدەر سەكىلدى كەشە قازاقستاندا دا جاڭا وقۋ جىلىنىڭ العاشقى كۇنى باستالدى. جىلداعى داستۇرگە ساي العاشقى قوڭىراۋ سوعىلمادى، ارينە. دەسەك تە، سوڭعى ايلاردا ءبىلىم جانە عىلىم مينيسترلىگى مەن ينتەرنەتكە جاۋاپتى مينيسترلىك تاراپىنان ايتىلعان سوزدەرگە يمانداي يلانعانىمىز راس. مەكتەپتەر قاشىقتان وقىتۋعا دايىن دەگەن مينيسترلەر مەن كەشەلى بەرى الەۋمەتتىك جەلىدە قاپتاعان اتا-انالاردىڭ ايعايى، نارازىلىعىنىڭ قايسىسى شىن، قايسىسى وتىرىك؟
تامىزدىڭ 31-كۇنى عانا جاڭا وقۋ جىلىنا دايىنبىز دەگەن مينيستر اسحات ايماعامبەتوۆ قول استىنداعىلاردىڭ «ورىندالدى» دەپ قاعازعا سوققان مورىنە سەنىپ قالدى ما، الدە باسقالاي بولدى ما، بەلگىسىز، ەلىمىز جاڭا وقىتۋ جۇيەسىنە دايىن بولماي شىقتى. كەشە العاشقى ساباق كۇنى zoom پلاتفورماسىندا ءبىلىم الماققا ۇمتىلعان وقۋشى مەن ۇستازدىڭ ەڭبەگى زايا كەتتى دەسە دە بولادى. ويتكەنى جۇكتەمەنى كوتەرمەگەن ينتەرنەت وقۋشى مەن مۇعالىم اراسىنداعى بايلانىستىڭ بەرەكەسىن قاشىرعان. بۇگىن دە ءدال سول جاعداي قايتالاندى. مىسالى، ماتەماتيكا ءپانى مۇعالىمى «مىنا جاققا كىرىڭدەر» دەپ زۋمنىڭ ءپارولىن جىبەرسە، ءدال وسى مينۋتتا ورىس ءتىلى ءپانىنىڭ مۇعالىمى «مىنا جاققا كىرۋدى» تاپسىرۋدا. وكىنىشكە قاراي، ەكى جاققا دا كىرۋ مۇمكىن ەمەس. ءبىر عانا ساباقتى تارتا الماي وتىرعان ينتەرنەتىڭىز ەكى ساباققا قاتار كىرسە، ماڭگىگە وشەرى ءسوزسىز. ال ءبىر ۋاقىتتا ەكى ءتۇرلى ساباققا وقۋشىسىن شاقىرعان مۇعالىمدەر بىتپەيتىن قاعازباستىلىقتان شارشاعان با، الدە مينيسترلىك تاراپىنان تولاسسىز بەرىلىپ جاتقان تاپسىرمالار شاتىستىرىپ جىبەرگەن بە، ايتەۋىر كەشەلى بەرى ءبىلىم سالاسىندا ساپىرىلىس ءجۇرىپ جاتىر.
ال BilimLand پلاتفورماسى كەيبىر اتا-انانىڭ جۇيكەسىنە سالماق تۇسىرگەنى سونداي، «بالامدى جىندىعا اينالدىراتىن بولدىڭدار» دەپ بايبالامعا باسۋدا. بۇل قاي جەردىڭ، كىم دەگەن اتا-اناسى ەكەنىن ازىرگە انىقتاپ بىلە المادىق. قاجەت دەپ تاپسا، قۇزىرلى مەكەمە وكىلدەرى انىقتاي جاتار. بۇل جەردەگى ەڭ ماڭىزدى ماسەلە ءبىلىم الا الماعان بالاعا قاتىستى. «ارتىق قىلام دەپ، تىرتىق قىلۋ» وسىلاي بولسا كەرەك. وقۋشىلاردى BilimLand جۇيەسىندە ساباق وقىتۋ قانشالىقتى مۇمكىن جانە قانشالىقتى ءتيىمدى؟ باستى سۇراق وسى.
نازارباەۆ زياتكەرلىك مەكتەبىنىڭ وقۋشىسىنا لايىقتالىپ جاسالعان پلاتفورمانى قاراپايىم مەكتەپتەرگە تىقپالاۋ نە ءۇشىن كەرەك؟ ونسىز دا ينتەرنەتى يرەلەڭدەگەن قازاقستاندا ءبىلىم بەرۋدىڭ قاراپايىم، قولجەتىمدى پلاتفورماسىن جاساۋعا نە كەدەرگى؟ جاڭا وقۋ جىلىنا دايىنبىز دەگەن مينيسترلىك قاي ەلدە تۇرىپ جاتقانىدارىن نازارعا الماعانى ما؟
جاڭا وقۋ جىلىنا ارنايى بەكىتىلگەن 990 تەڭگەلىك تاريف تە جۇرتتىڭ قالتاسىن قاعۋدان ارىگە اسپاعانىنا كەشەگى جانە بۇگىنگى كۇن كوز جەتكىزدىردى. ارنايى تاريف ەمەس، جىلدامدىعى ءتاۋىر دەگەن WiFi-ءدىڭ ءوزى كەشەلى بەرى «ساندالىپ كەتكەندەي» كۇي كەشتى. ساباق وقۋ ءۇشىن BilimLand جۇيەسىنە كىرۋ ءۇشىن ساعاتتاپ وتىرۋعا تۋرا كەلەدى. ال ينتەرنەت ساپاسىن جاقسارتامىز دەپ قۇرعاق ۋادە بەرگەندەر قازاقستاندىق ميلليونداعان وقۋشىنىڭ وبالىنا قالعانىن تۇسىنەر مە ەكەن؟
تامىزدىڭ 21-ءى كۇنى «ۆيتسە-مينيستر دارىن تۇياقوۆ كۇنبە-كۇن قر ءبىلىم جانە عىلىم مينيسترلىگىنىڭ جاۋاپتى جەتەكشىلەرىمەن، ءبىلىم باسقارمالارىنىڭ باسشىلارىمەن، وبلىس اكىمى ورىنباسارلارىمەن، اۋدان اكىمدەرىمەن جانە بايلانىس وپەراتورلارىمەن بىرگە ونلاين رەجيمدە ءاربىر ءوڭىر، اۋدان، اۋىل، اسىرەسە شالعاي اۋىلدارداعى ينتەرنەت ماسەلەسىن جانە ونى شەشۋ جولدارىن جان-جاقتى تالقىلايدى.
اۋدان اكىمدىگى مەن ءبىلىم باسقارمالارىنىڭ وكىلدەرى ءوز وڭىرلەرىندەگى ينتەرنەت، بايلانىس ماسەلەلەرىن ورتاعا سالىپ، بايلانىس وپەراتورلارىنان اقاۋلاردى جويۋ نەمەسە بايلانىس ارنالارىنىڭ وتكىزۋ قابىلەتىن كۇشەيتۋدىڭ ناقتى شەشىمدەرى مەن ءوز سۇراقتارىنا جاۋاپ الادى.
بۇگىنگە بارلىق وبلىسپەن وسىنداي ونلاين كەزدەسۋلەر وتكىزىلىپ، وقۋشىلاردى قاشىقتان نەمەسە ءداستۇرلى وقىتۋعا دايىندىق دەڭگەيى انىقتالدى» دەپ اقپارات تاراتقان قر تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى بۇگىنگە دەيىن ينتەرنەت پروبلەماسىن شەشپەگەنى قالاي؟
مەرۋەرت حۋساينوۆا، «ادىرنا» ۇلتتىق پورتالى.
فوتو اشىق دەرەككوزدەن الىندى.
