Ózge elder sekildi keshe Qazaqstanda da jańa oqý jylynyń alǵashqy kúni bastaldy. Jyldaǵy dástúrge saı alǵashqy qońyraý soǵylmady, árıne. Desek te, sońǵy aılarda Bilim jáne ǵylym mınıstrligi men ınternetke jaýapty mınıstrlik tarapynan aıtylǵan sózderge ımandaı ılanǵanymyz ras. Mektepter qashyqtan oqytýǵa daıyn degen mınıstrler men kesheli beri áleýmettik jelide qaptaǵan ata-analardyń aıǵaıy, narazylyǵynyń qaısysy shyn, qaısysy ótirik?
Tamyzdyń 31-kúni ǵana jańa oqý jylyna daıynbyz degen mınıstr Ashat AIMAǴAMBETOV qol astyndaǵylardyń «oryndaldy» dep qaǵazǵa soqqan mórine senip qaldy ma, álde basqalaı boldy ma, belgisiz, elimiz jańa oqytý júıesine daıyn bolmaı shyqty. Keshe alǵashqy sabaq kúni zoom platformasynda bilim almaqqa umtylǵan oqýshy men ustazdyń eńbegi zaıa ketti dese de bolady. Óıtkeni júktemeni kótermegen ınternet oqýshy men muǵalim arasyndaǵy baılanystyń berekesin qashyrǵan. Búgin de dál sol jaǵdaı qaıtalandy. Mysaly, matematıka páni muǵalimi «myna jaqqa kirińder» dep zýmnyń parolin jiberse, dál osy mınýtta orys tili pániniń muǵalimi «myna jaqqa kirýdi» tapsyrýda. Ókinishke qaraı, eki jaqqa da kirý múmkin emes. Bir ǵana sabaqty tarta almaı otyrǵan ınternetińiz eki sabaqqa qatar kirse, máńgige ósheri sózsiz. Al bir ýaqytta eki túrli sabaqqa oqýshysyn shaqyrǵan muǵalimder bitpeıtin qaǵazbastylyqtan sharshaǵan ba, álde mınıstrlik tarapynan tolassyz berilip jatqan tapsyrmalar shatystyryp jibergen be, áıteýir kesheli beri bilim salasynda sapyrylys júrip jatyr.
Al BilimLand platformasy keıbir ata-ananyń júıkesine salmaq túsirgeni sondaı, «balamdy jyndyǵa aınaldyratyn boldyńdar» dep baıbalamǵa basýda. Bul qaı jerdiń, kim degen ata-anasy ekenin ázirge anyqtap bile almadyq. Qajet dep tapsa, quzyrly mekeme ókilderi anyqtaı jatar. Bul jerdegi eń mańyzdy másele bilim ala almaǵan balaǵa qatysty. «Artyq qylam dep, tyrtyq qylý» osylaı bolsa kerek. Oqýshylardy BilimLand júıesinde sabaq oqytý qanshalyqty múmkin jáne qanshalyqty tıimdi? Basty suraq osy.
Nazarbaev zııatkerlik mektebiniń oqýshysyna laıyqtalyp jasalǵan platformany qarapaıym mektepterge tyqpalaý ne úshin kerek? Onsyz da ınterneti ıreleńdegen Qazaqstanda bilim berýdiń qarapaıym, qoljetimdi platformasyn jasaýǵa ne kedergi? Jańa oqý jylyna daıynbyz degen mınıstrlik qaı elde turyp jatqanydaryn nazarǵa almaǵany ma?
Jańa oqý jylyna arnaıy bekitilgen 990 teńgelik tarıf te jurttyń qaltasyn qaǵýdan árige aspaǵanyna keshegi jáne búgingi kún kóz jetkizdirdi. Arnaıy tarıf emes, jyldamdyǵy táýir degen WiFi-diń ózi kesheli beri «sandalyp ketkendeı» kúı keshti. Sabaq oqý úshin BilimLand júıesine kirý úshin saǵattap otyrýǵa týra keledi. Al ınternet sapasyn jaqsartamyz dep qurǵaq ýáde bergender qazaqstandyq mıllıondaǵan oqýshynyń obalyna qalǵanyn túsiner me eken?
Tamyzdyń 21-i kúni «Vıe-mınıstr Daryn Tuıaqov kúnbe-kún QR Bilim jáne ǵylym mınıstrliginiń jaýapty jetekshilerimen, bilim basqarmalarynyń basshylarymen, oblys ákimi orynbasarlarymen, aýdan ákimderimen jáne baılanys operatorlarymen birge onlaın rejımde árbir óńir, aýdan, aýyl, ásirese shalǵaı aýyldardaǵy ınternet máselesin jáne ony sheshý joldaryn jan-jaqty talqylaıdy.
Aýdan ákimdigi men bilim basqarmalarynyń ókilderi óz óńirlerindegi ınternet, baılanys máselelerin ortaǵa salyp, baılanys operatorlarynan aqaýlardy joıý nemese baılanys arnalarynyń ótkizý qabiletin kúsheıtýdiń naqty sheshimderi men óz suraqtaryna jaýap alady.
Búginge barlyq oblyspen osyndaı onlaın kezdesýler ótkizilip, oqýshylardy qashyqtan nemese dástúrli oqytýǵa daıyndyq deńgeıi anyqtaldy» dep aqparat taratqan QR ıfrlyq damý, ınnovaııalar jáne aeroǵarysh ónerkásibi mınıstrligi búginge deıin ınternet problemasyn sheshpegeni qalaı?
Merýert HÝSAINOVA, «Adyrna» ulttyq portaly.
Foto ashyq derekkózden alyndy.
