قازاقتىڭ قازىرگى ساۋاتسىز ۇكىمەتىن – ەكى اپتا ەمەس، ەكى ساعات بيلىكتە قالدىراۋعا بولمايدى!

4169

ەل باسشىسى، قاتەرلى ىندەتتىڭ قۇرباندارىنا ازا كۇنىن جاريالاعاننان كەيىن ۇكىمەتپەن قاشىقتان شۇعىل جيىلىس وتكىزدى. قاپالانىپ-قايعىردى دا، ۇرسىپ-جەكىدى دە، ەسكەرتۋ-سوگىستەر دە جاريالادى. اقىرىندا، ءۇمىتسىز ۇكىمەتكە تاعى ەكى اپتا مۇرسات بەردى...

مەنىڭشە، بىلتىرعى ارىس ازابى مەن بيىلعى ماقتارال سەرگەلدەڭىن ايتپاعاندا، التى ايدان استام ۋاقىتتا قىتايدىڭ قارا ىندەتىنە قارسى جۇمىلۋعا قاۋقارى جەتپەگەن ۇكىمەتتى دەرەۋ (ەرتەڭ ەمەس، بۇگىن...) تاراتىپ جىبەرىپ، قۇقىق قورعاۋ ورىندارى پاندەمياعا بولىنگەن قىرۋار قارجىنى مۇقيات تەرگەپ-تەكسەرۋگە كىرىسۋى كەرەك.

الەمدىك ىندەتكە ميللاردتاعان قارجىلار بولىنسە دە، ءدارى-دارمەكتەر تاپشىلىعىن قولدان جاساعان ء(دارى ساتاتىن كومپانيالاردىڭ قويماسىندا سۇرانىستاعى ءدارى-دارمەكتەر لىقا تولىپ تۇرعان), اۋرۋحانالاردا ورىن ازىرلەمەگەن (اۋىر سىرقاتتاردى قابىلداماعان), تىنىس الۋ اپاراتتارىن الدىن-الا ساتىپ الۋدى ۇيىمداستىرماعان باسشىلىردىڭ تۇگەلى (ۇكىمەت مۇشەلەرىنەن باستاپ) قىزمەتتەرىنەن بوساپ، قىلمىستىق جاۋاپقا تارتىلۋى كەرەك.

قازاقتىڭ قازىرگى ساۋاتسىز ۇكىمەتىن – ەكى اپتا ەمەس، ەكى ساعات بيلىكتە قالدىراۋعا بولمايدى!

ەل بيلىگىنە وتكىر مىنەزدى، جاناشىر جاۋاپكەرشىلىكتى، شۇعىل شەشىمدى، تانىم-تاجىريبەسى تولىققاندى جىگىتتەر كەلسىن! بۇگىندە تاجىريبە جيناپ، ءتالىم تامسىلدەپ جاتاتىن ۋاقىت جوق: ءاربىر ساعات، ءار كۇن – اسا قىمبات!

  1. قازاق ۇكىمەتىنىنىڭ تىزگىنىن – وتە وجەت ءارى اۋقىمدى ارەكەتتىڭ ادامى – يمانعالي نۇرعاليۇلى تاسماعامبەتوۆتىڭ قولىنا بەرۋ كەرەك.
  2. قارجى مينيسترىلىگىن – الەمدىك قوس داعدارىس كەزەڭدەرىندە ەكى مارتە ۇكىمەتباسى بولعان – كارىم قاجىمحانۇلى ءماسىموۆكە سەنىپ تاپسىرساق!
  3. دەنساۋلىق مينيسترلىگىن – الەۋمەتتىك سالانىڭ مايتالمان مامانى، بىرنەشە ءىرى ايماقتاردى ۇلگىلى ىستەرىمەن وركەندەتكەن – قىرىمبەك ەلەۋۇلى كوشەرباەۆ باسقارسا!

اتقارۋشى بيلىك تەز ەتەك-جەڭىن جيناپ، جۇمىلا جۇمىس ىستەۋى ءۇشىن – ك.ءماسىموۆ پەن ق.كوشەرباەۆقا – پرەمەر-ءمينيستردىڭ ءبىرىنشى ورىنباسارى لاۋازىمدارى قوسىمشا قۋاتتى قۇزىرەتتەرىمەن كۇشەيتىلىپ بەرىلسە!

بالكىم، وسىنداي وڭدى وزگەرىس پەن باتىل بەتبۇرىستىڭ ارقاسىندا جازىقسىز قازاعىمىزدى قاندى قىرعىنان اراشالاپ قالارمىز! ال، ازىرگە ورىس پەن قىتاي دارىگەرلەرى (تىڭشىلارى دەسە تە بولار) قازاق ەلىنە «كومەككە» جىبەرىلىپ، ەلىمىز بەن ۇلتىمىزعا قاۋىپ ءتونىپ تۇر...

 

مىڭجان BAIZHANIN,

قوعام قايراتكەرى

پىكىرلەر
رەداكتسيا تاڭداۋى