كارانتيننىڭ بىرقاتار شەنەۋنىكتەرگە «پايداسى» تيگەن ءتارىزدى. وندا دا ەكس-شەنەۋنىكتەرگە. ايىپتى بولىپ، تار قاپاستا 4-5 جىلىن وتكىزگەندەردىڭ كەيبىرەۋلەرى سوڭعى اپتالاردا بوستاندىققا شىعا باستادى.
الدىمەن «مەملەكەتتىك قۇپيانى جاريا ەتتى» دەپ ايىپتالىپ، 5 جىلعا سوتتالعان پرەزيدەنت جەتەكشىسىنىڭ بۇرىنعى ورىنباسارى باعلان مايلىباەۆ ماۋسىم ايىنىڭ ورتاسىندا جازا مەرزىمىنىڭ اياقتالۋىنا 1 جىل، 4 اي، 21 كۇن قالعاندا بوستاندىققا شىقتى.
2017 جىلدىڭ 12 قاڭتارىندا باعلان مايلىباەۆ «قىزمەت بابىن تەرىس ماقساتتا پايدالانۋ» جانە «مەملەكەتتىك قۇپيالاردى زاڭسىز جيناۋ، تاراتۋ، جاريا ەتۋ» بابى بويىنشا كۇدىككە ىلىنگەن. قاراپايىم تىلمەن ايتقاندا، مايلىباەۆ «وتانىنا وپاسىزدىق جاساعان ادام» بولىپ ەسەپتەلەدى.
بوستاندىققا شىققانىمەن، ەندى مايلىباەۆ ءومىر بويى مەملەكەتتىك قىزمەتتە جۇمىس ىستەي المايدى.
ۇلتتىق قاۋىپسىزدىك كوميتەتىنىڭ بۇرىنعى توراعاسى نارتاي دۇتباەۆ تا مەرزىمىنەن بۇرىن بوستاندىققا شىقتى، ياعني شارتتى تۇردە بوساتىلدى.
12 جىلعا سوتتالىپ، جازا مەرزىمى 11 جىلعا قىسقارتىلعان دۇتباەۆ جازاسىنىڭ جارتىسىنا جۋىعىن وتەگەن. جالپى قىلمىسكەردىڭ تۇرمەدەگى ءبىر كۇنى ءبىر جارىم كۇن بولىپ ەسەپتەلەدى.
ۇقك-ءنىڭ بۇرىنعى باسشىسى ءوز بيلىگىن اسىرا پايدالانعان، سەنىپ تاپسىرىلعان مۇلىكتى يەمدەنىپ نەمەسە ىسىراپ ەتكەنى ءۇشىن، سونداي-اق، قىلمىستىق جولمەن الىنعان اقشانى نەمەسە مۇلىكتى زاڭداستىرعانى ءۇشىن سوتتالدى. ول دا ەندى ءومىر بويى مەملەكەتتىك قىزمەتتە جۇمىس ىستەي المايدى.
ءۇشىنشى ءىس جەمقورلىق ايىبىمەن سىرتتاي سوتتالعان اتىراۋ وبلىسىنىڭ بۇرىنعى اكىمى بەرگەي رىسقاليەۆ پەن ونىڭ اعاسى، ەكس-دەپۋتات امانجان رىسقاليەۆتىڭ وتباسىنا قاتىستى. ايتا كەتەيىك، 16 ماۋسىم كۇنى جوعارعى سوت باس پروكۋراتۋرانىڭ كاسساتسيالىق شاعىمىن قاراپ، رىسقاليەۆتەرگە تاركىلەنگەن دۇنيە-مۇلكىن قايتارۋ جونىندە شەشىم شىعاردى.
ءۇش قىلمىستىق ءىس، ۇشەۋى دە كەزىندە قوعامنىڭ نازارىن اۋدارعان. كەشەگى جۇيە ولاردى قىلمىسكەر دەپ تانىعان. ال بۇگىنگىلەر ولاردى اقتاپ، مەرزىمىنەن بۇرىن بوستاندىققا شىعاردى. مۇندا قانداي جاسىرىن سىر؟ حالىق ماسەلەنىڭ اق-قاراسىن بىلمەي، ءارى-ءسارى كۇيدە وتىر. كۇمان كوپ. كۇمان كوبەيگەن جەردە حالىقتىڭ سەنىمى ازايادى. بىراق جەمقورلىق جايلاعان بۇگىنگى قوعام سوتتالعان ادامنان دا ەشقاشان ساباق المايدى. سەبەبى، قازىرگى جۇيەدە بىلىق كوپ.
سوندىقتان جەڭ ۇشىنان جالعاسقان جەمقورلىق ءالى توقتاماي كەلەدى. سوتتالىپ شىققان «شورتانداردان» كەيىن سىبايلاس جەمقورلىققا قارسى ءىس-قيمىل اگەنتتىگىنىڭ وكىلدەرىنىڭ قۇرىعىنا ەندى «شاباقتار» ىلىنە باستادى. بۇرىنعىلار مينيستر دەڭگەيىندەگىلەر بولسا، بۇل جولعى ۇستالعاندار – دەپارتامەنتتىڭ باسشىلارى مەن اكىمنىڭ ورىنباسارلارى.
ريددەردەگى مامانداندىرىلعان رەسپۋبليكالىق كوللەدجدىڭ مەكتەپ-ينتەرناتى قۇرىلىسى ءۇشىن 10 ميلليون تەڭگە مەن باعاسى 13 ميلليون تەڭگە تۇراتىن «توyota Hilux» كولىگىن پارا رەتىندە الماق بولعان شەنەۋنىك ۇستالدى. ول – مادەنيەت جانە سپورت مينيسترلىگىنىڭ سپورت جانە دەنەشىنىقتىرۋ ءىسى جونىندىگى كوميتەتى توراعاسىنىڭ ورىنباسارى. وعان قاتىستى تەرگەۋ ءىسى باستالدى.
بۇل عانا ەمەس، كەشە الماتى وبلىسى جامبىل اۋدانىنىڭ حالىقتى جۇمىسپەن قامتۋ ورتالىعىنىڭ ديرەكتورىنا پارا العانى ءۇشىن 12,5 ميلليون تەڭگە ايىپپۇل سالىندى. ول مەملەكەتتىك باعدارلاماعا وراي، نەسيە الىپ بەرۋ ءۇشىن ازاماتتاردان بىرنەشە رەت 500 مىڭ تەڭگە كولەمىندە پارا العان.
سونداي-اق، يندۋستريا جانە ينفراقۇرىلىمدىق دامۋ مينيسترلىگى كولىك كوميتەتىنىڭ قوستاناي وبلىسى بويىنشا كولىكتىك باقىلاۋ ينسپەكتسياسىنىڭ باسشىسى اراپباەۆ پەن ەرگەلدينوۆ «1 ميلليون تەڭگە كولەمىندە پارا الدى» دەپ كۇدىككە ىلىنگەن. ەندى ولاردىڭ ارقايسىسى 30 ميلليون تەڭگە كولەمىندە ايىپپۇل تولەۋى ءتيىس.
مىنە كەز كەلگەن ايماقتا وسىنداي جەمقورلىق ارەكەتى ورىستەپ بارادى. قازىرگى قاۋىپتى ءۇردىس - بىلدىرمەي الىپ قالۋ، قازىنانىڭ بايلىعىن تالان-تاراجعا ءتۇسىرۋ. تازالىق، ادىلدىك، ءتارتىپ بولماعان جەردە بىلىق كوبەيەدى. بيۋدجەتتەن قارپىپ جەۋ مەملەكەتتىك بيلىكتە ىستەيتىن كەز كەلگەن دەڭگەيدەگى اتقامىنەردىڭ ۇيرەنشىكتى ادەتىنە اينالدى.
كەشە سىبايلاس جەمقورلىققا قارسى ءىس-قيمىل اگەنتتىگىنىڭ قىزمەتكەرلەرى جشس وكىلىنەن 33 ميلليون تەڭگە كولەمىندە پارا الماق بولعان اقمولا وبلىسىنداعى ءبىر اۋدان اكىمىنىڭ ورىنباسارىن ۇستادى. بۇل عانا ەمەس، الماتى وبلىسىنداعى اسكەري بولىمشەنىڭ كومانديرىنە 30 ميلليون تەڭگە ايىپپۇل سالىندى، ونىڭ ورىنباسارى دا 10 ميلليون تەڭگە ايىپ تولەيتىن بولدى. ءبىرىنشىسى پاراقورلىعى ءۇشىن پولكوۆنيك، ەكىنشىسى مايور اسكەري شەنىنەن ايرىلدى. بىراق...
ءبىزدىڭ مەملەكەتتىڭ شەنەۋنىكتەرى ايىپتى بولىپ سوتتالىپ جاتقانداردى كورىپ وتىرسا دا، ءبارىبىر جەمقورلىق ارەكەتىن قويمايدى جانە تويمايدى. پارا الىپ تەز بايىعىسى كەلەدى. ويتكەنى ءبارى جەپ ۇيرەنگەن. ال بيۋدجەتتىڭ قارجىسىن قارپىپ جەپ ۇيرەنگەن باسشى وتانىن ويلاي ما؟ جوق! ولار ۇستالعانشا قازىنانىڭ اقشاسىن وسىلاي جەي بەرەدى. ويتكەنى...
جەمقورلىق دەگەن جەگى قۇرت! ولار – جەگى قۇرت قوي...
ەركىن قالدان
«ادىرنا» ۇلتتىق پورتالى
