دۋلات اعادىلگە قاتىستى تەرگەۋ قورىتىندىسى جاريالاندى

4042
Adyrna.kz Telegram

نۇر-سۇلتان قالاسىنىڭ پروكۋراتۋراسى دۋلات اعادىلدىڭ ولىمىنە قاتىستى قىلمىستىق تەرگەۋدىڭ قورىتىندىسىن جاريالادى، - دەپ حابارلايدى Tengrinews.kz قالالىق پروكۋراتۋرانىڭ ءباسپاسوز قىزمەتىنە سىلتەمە جاساپ.

"اعادىل قالادان شىقپاۋ تۋرالى قولحاتتىڭ ەرەجەسىن بۇزىپ، تەرگەۋ ورگاندارىنان قاشىپ، وعان ىزدەۋ جاريالاندى. وسىعان بايلانىستى سوت وعان قاتىستى قاماۋعا الۋ تۋرالى شەشىم شىعاردى. تاجىريبەلى سوت-مەديتسينالىق ساراپشىلار مەن مامانداردان جانە جوعارى دارەجەلى كارديولوگتاردان قۇرالعان كوميسسيا ءولىمنىڭ ءمان-جايى مەن سەبەبىن مۇقيات زەرتتەدى", - دەلىنگەن حابارلامادا.

"اعادىلدىڭ ولىمىنە وعان قويىلعان اسقىنعان ميوكارد ينفاركتى دياگنوزى سەبەپ بولدى. ناتيجەسىندە قان ۇيىعىشتىعى بۇزىلىپ، سول جاق جۇرەك قارىنشاسىندا قان جەتكىلىكسىزدىگى بايقالعان. ساراپشىلار اعادىلدىڭ دەنەسىنەن جاراقاتتار انىقتامادى. وسىعان بايلانىستى 25 مامىردا اعادىلگە قاتىستى ءىس قىلمىستىق ەرەجەبۇزۋشىلىق بولماعاندىقتان توقتاتىلدى", - دەدى پروكۋراتۋراداعىلار.

ەسكە سالا كەتسەك، بۇعان دەيىن دۋلات اعادىلدىڭ قايتىس بولعاندىعى جونىندە حابارلانىپ، وعان اقىندارىمىز جوقتاۋ ارناعان ەدى.

پىكىرلەر