تۇركىستان وبلىسى ماقتاارال اۋدانىنىڭ ەكى اۋىلىن سۋ باستى. بۇل تۋرالى وڭىرلىك كوممۋنيكاتسيالار قىزمەتى حابارلايدى..
بۇگىن، 2 مامىر تاڭعى ساعات 04:30-دا ماقتاارال اۋدانىنىڭ شەكاراسىنداعى ورتالىق دالالىق كوللەكتورىنان (وتكىزۋ قۋاتى - سەكۋندىنا 120 تەكشە مەتر) سۋ توگىلىپ، جەڭىس جانە جاڭا تۇرمىس اۋىلدارىن سۋ الىپ كەتكەن.
«سونداي-اق وبلىستىق ماندەگى «مىرزاكەنت - جەڭىس - جاڭا تۇرمىس» تاسجولىن سۋ باسقان. كولىك ءجۇرۋى مۇمكىن ەمەس» دەلىنگەن حابارلامادا. قازىرگى تاڭدا اپاتتىق-قۇتقارۋ جۇمىستارى ءجۇرىپ جاتىر.
ايتا كەتەيىك، بۇعان دەيىن جاڭا تۇرمىس، جەڭىس، نۇرلى جول ەلدى مەكەندەرىنىڭ تۇرعىندارى اۋدان ورتالىعى مىرزاكەنتتە ورنالاسقان مىرزاكەنت مەكتەپ-گيمنازياسىنا (600 ورىن), س.راحىموۆ اتىنداعى جالپى ورتا مەكتەبىنە (700 ورىن), پۋشكين (400 ورىن), ابىلايحان ورتا مەكتەپتەرىنە (500 ورىن) ەۆاكۋاتسيالانىپ، وعان 6 اۆتوبۋس جۇمىلدىرىلعان بولاتىن.
ماقتاارال اۋدانىنىڭ اكىمى، اۋداندىق توتەنشە جاعداي شتابىنىڭ توراعاسى باقىت اسانوۆتىڭ توراعالىعىمەن 2 مامىر تۇنگى 00:00-دە ارنايى جيىن ءوتىپ، توتەنشە جاعداي جاريالاۋ جونىندە تاپسىرما بەرىلدى. ەسكە سالا كەتەيىك، كەشە وزبەكستاندا ساردوبا سۋ قويماسىنىڭ بوگەتى جارىلىپ، ەلدى مەكەندەر، كوممۋنيكاتسيالىق جەلىلەر مەن ەگىستىكتەرگە زاقىم كەلگەن بولاتىن.
