جاڭاوزەن قالاسىندا نوسەر جاۋىننان 1 مەكتەپ پەن 2 تۇرعىن ءۇيدى سۋ باستى. سونىمەن قاتار، 8 ءۇيدىڭ اۋلاسىنا جانە كوشەلەرگە سۋ جينالعان. ەشكىم زارداپ شەككەن جوق. بۇگىن نوسەر جاڭبىر توقتاپ، كوممۋنالدىق قىزمەتتەر ارنايى تەحنيكالارمەن جينالعان جاۋىن سۋىن سورۋعا كىرىسكەن. ايتا كەتەيىك، وڭىردە كەشەدەن بەرى نوسەر جاۋىن جاۋىپ، تۇرعىنداردى ابىگەرگە سالدى. قاراقيا اۋدانىنىڭ اۋماعىندا تاۋدان سەل ءجۇرىپ، تاس جولداردا ءجۇرۋ قيىندادى، دەپ حابارلايدى "ادىرنا" ۇلتتىق پورتالى.
قازىرگى ۋاقىتتا جاڭاوزەن قالاسىنىڭ توتەنشە جاعدايلار ءبولىمى اكىمدىكپەن بىرلەسىپ №3 ءورت ءسوندىرۋ ءبولىمىنىڭ كوممۋنالدىق قىزمەتتەردىڭ ارنايى تەحنيكالارىن جانە سۋ سورۋ قۇرىلعىلارىن شىعاردى. جاڭبىر سۋىن سورۋ جۇمىستارى جۇرگىزىلىپ جاتىر. توتەنشە جاعدايلار دەپارتامەنتىنىڭ 16 قىزمەتكەرى، 1 تەحنيكاسى مەن 3 موتوپومپاسى، سونداي-اق كوممۋنالدىق قىزمەتتەردىڭ 17 جۇمىسكەرى مەن 12 تەحنيكاسى جۇمىلدىرىلعان.
5 مامىردا جاڭبىردان كەيىن قاراقيا اۋدانىندا سەل جۇرگەن. كولىك جۇرگىزۋشىلەرى بولىسكەن ۆيدەودان سۋ اعىنى اقتاۋ مەن جاڭاوزەن اراسىن جالعايتىن تاسجولعا قالاي جەتكەنىن كورۋگە بولادى. سونداي-اق جۇرگىزۋشىلەر جاۋىن-شاشىنعا بايلانىستى جول كورىنبەگەنىن ايتتى.
6 مامىر كۇنى تاڭەرتەڭ جەرگىلىكتى تۇرعىندار جاڭاوزەندەگى №22 مەكتەپتە، سونداي-اق قاراقيا اۋدانى بوستان اۋىلىنداعى ورتا مەكتەپتە ساباق توقتاتىلعانى تۋرالى حابارلاعان.
"قازگيدرومەت" سينوپتيكتەرىنىڭ بولجامى بويىنشا، ماڭعىستاۋدا 6-7 مامىردا جاڭبىر جاۋىپ، جەل كۇشەيەدى. 6 مامىردا ماڭعىستاۋ وبلىسىنىڭ باسىم بولىگىندە جاۋىن بولادى، سولتۇستىكتە، باتىستا، وبلىستىڭ ورتالىعىندا قاتتى جاڭبىر، نايزاعاي، بۇرشاق جاۋادى. كۇندىز وبلىستىڭ وڭتۇستىگىندە شاڭدى داۋىل. سولتۇستىكتەن، سولتۇستىك-شىعىستان سوققان جەل وبلىستىڭ باسىم بولىگىندە 15-20, سولتۇستىك-باتىستا، سولتۇستىك-شىعىستا ەكپىنى 23-28 م/س جەتەدى.
اقتاۋدا 6 مامىردا تۇندە قاتتى جاڭبىر، نايزاعاي، بۇرشاق بولادى. سولتۇستىك، سولتۇستىك-شىعىستان كۇندىز جەل سوعادى، ەكپىنى 15-20 م/س جەتەدى. ماڭعىستاۋ وبلىسىنىڭ تجد ايماق تۇرعىندارىنا جەكە قاۋىپسىزدىك شارالارىن ساقتاۋدى ۇسىندى. سونداي-اق، تۇرعىندارعا بالالاردى ەرەكشە باقىلاۋعا الۋعا، قاراۋسىز قالدىرماۋعا كەڭەس بەرىلدى. ماڭعىستاۋلىقتارعا اسا قاجەت بولماسا، دالاعا شىقپاۋ ۇسىنىلادى. جەلدەن ءۇي قابىرعالارى ماڭىندا جاسىرىنۋعا بولمايدى. ويتكەنى شاتىردان ءتۇرلى ماتەريال قۇلاۋى مۇمكىن.
بەينەماتەريالداردى Telegram پاراقشامىزدان كورە الاسىز.
"ادىرنا" ۇلتتىق پورتالى
