ماقتاارال اۋدانىندا ەندى ورگەباس ەلدىمەكەنىن سۋ باستى. بۇل تۋرالى وبلىس اكىمدىگى حابارلايدى.
اتالعان حابارلامادا: «بۇگىن تاڭعى 05.00-تەن باستاپ 250 ءۇيى سۋعا باتقان فەردوۋسي اۋىلى باعىتىنان جاڭاجول اۋىلدىق وكرۋگىنىڭ ورگەباس ەلدىمەكەنىنە قاراي سۋ كەلە باستادى. ەكى اۋىلدىڭ ارا قاشىقتىعى - 3 شاقىرىم. تاڭعى 8.00-دە سۋ ورگەباس ەلدى مەكەنىنىڭ 194 ءۇيىن باسىپ قالدى. اۋىلدىڭ 1451 تۇرعىنى ەۆاكۋاتسيالاندى. كوشىرۋ بارىسىندا زارداپ شەككەندەر جوق» دەلىنگەن.
توتەنشە جاعداي جاريالانعان ماقتاارال اۋدانىندا سۋ دەڭگەيى قازىرشە تومەندەيتىن ءتۇرى جوق. كەرىسىنشە، سۋ باسقان اۋىلدار سانى كوبەيىپ بارادى.
باستاپقىدا ءتورت ەلدىمەكەننىڭ حالقى قاۋىپسىز جەرگە كوشىرىلسە، تۇندە اۋدان ورتالىعىنان 12 مىڭداي ادام ەۆاكۋاتسيالانعان.
فوتو: ينتەرنەت جەلىسىنەن
