قىرعىزستاننىڭ تاۋلى ايماقتارىندا سەل تاسقىنى ءجۇرىپ، بىرنەشە اۋىل مەن قازاقستانمەن شەكاراداعى “قارقارا” وتكىزۋ پۋنكتىن سۋ باستى، دەپ حابارلايدى “ادىرنا” ۇلتتىق پورتالى “كتك” ارناسىنا سىلتەمە جاساپ.
تابيعي اپاتتىڭ نەگىزگى سەبەبى – قاردىڭ تەز ەرۋى مەن تولاسسىز جاۋعان نوسەر. سالدارىنان جالال-اباد وبلىسىنداعى التى اۋىلدىق وكرۋگ زارداپ شەكتى. ىستىقكول ايماعىندا دا قولايسىز اۋا رايى تىركەلىپ، اۋىلدار مەن جولداردى سۋ باسقان.
توتەنشە جاعدايلار مينيسترلىگى شەكاراداعى “قارقارا” وتكىزۋ پۋنكتىنىڭ دە سۋ استىندا قالعانىن مالىمدەدى. بۇل جاعداي شەكارا قىزمەتىنىڭ جۇمىسىنا جانە كولىك قوزعالىسىنا ايتارلىقتاي قيىندىقتار تۋعىزدى.
قۇتقارۋ قىزمەتتەرى كۇشەيتىلگەن رەجيمدە جۇمىس ىستەۋگە كوشىپ، زارداپ شەككەن ايماقتاردا اپاتتى جويۋ شارالارىن جۇرگىزۋدە. ارنايى تەحنيكالار تارتىلىپ، سۋدى بۇرۋ جانە لاي-باتپاقتى تازارتۋ جۇمىستارى اتقارىلىپ جاتىر.
