قازاقستان ۇكىمەتى ەلدەگى توتەنشە جاعداي كەزىندە تابىسسىز قالعان ادامدارعا 42500 تەڭگە (95$) تولەپ جاتىر. قازىرگە دەيىن بۇل كومەكتى ءۇش ميلليوننان استام ادام العان. بىراق جۇرت اراسىندا وسى تولەم جايلى سۇراق كوپ. ازاتتىق ەڭبەك جانە حالىقتى الەۋمەتتىك قورعاۋ مينيسترلىگىنە رەسمي ساۋال جولداپ، جۇرت كوكەيىندەگى سۇراقتارعا جاۋاپ الدى.
- 42500 تەڭگە كومەك نەگىزى كىمدەرگە بەرىلەدى؟
بۇل تولەم توتەنشە جاعداي (تج) سالدارىنان تابىسىنان ايرىلعاندارعا تولەنەدى. بيلىك ولاردى ەكى توپقا بولگەن. ءبىرىنشى توپقا تج كەزىندە جۇمىسىن توقتاتقان شاعىن جانە ورتا بيزنەستىڭ اقىسىز دەمالىسقا كەتكەن جالدامالى جۇمىسشىلارى; رەسمي تىركەلىپ، سالىق تولەپ جۇرگەن جەكە كاسىپكەرلەر; نوتاريۋس، ادۆوكات، كاسىبي مەدياتور، سوت ورىنداۋشىسى كىرەدى. ەكىنشى توپقا رەسمي تىركەلمەي، زەينەتاقى قورىنا، مەديتسينالىق ساقتاندىرۋ قورىنا، سالىق رەتىندە اقشا اۋدارماي ءوز بەتىنشە تابىس تاۋىپ جۇرگەندەر ەنەدى. ەكىنشى توپتاعى ءوز-ءوزىن جۇمىسپەن قامتىعاندار 42500 تەڭگە كومەككە ءوتىنىش بەرمەس بۇرىن ءبىر رەت بولسا دا بىرىڭعاي جيناق تولەمىن (بجت - ەسپ) تولەۋى ءتيىس. 42500 تەڭگەنى الۋ ءۇشىن ءوتىنىشتى eGov پورتالى، 42500.enbek.kz ۆەب-سايتى جانە Telegram مەسسەندجەرىندەگى me/Help42500Bot دەپ اتالاتىن بوت ارقىلى بەرۋگە بولادى. كەيىن 42500 تەڭگە تولەم تاعايىندالىپ جاتسا، تەلەفونىڭىزعا SMS حابارلاما كەلىپ، اقشا بانك شوتىڭىزعا اۋدارىلادى. ءوتىنىشتى 24/7 رەجيمىندە، ياعني كەز كەلگەن ۋاقىتتا بەرۋگە بولادى.
- بجت قانشا تەڭگە، ونى ۇيدەن شىقپاي قالاي تولەيدى؟
رەسمي تىركەلمەي جۇمىس ىستەگەن قالا تۇرعىنى 2651 تەڭگە، اۋىل تۇرعىنى - 1325 تەڭگە بجت تولەۋى ءتيىس. ونى 5505 نومىرىنە SMS حابارلاما جولداۋ نەمەسە بانك قوسىمشاسى ارقىلى تولەۋگە بولادى. تەلەفون حابارلاماسىنا جسن-مەن بىرگە قالا تۇرعىنى GORODESP, اۋىل تۇرعىنى SELOESP دەپ جازۋى ءتيىس. 42500 تەڭگە الۋعا بايلانىستى بارلىق سۇراقتى 1414 نومەرىنەن بىلۋگە بولادى.
- مۇگەدەكتەر جانە زەينەتكەرلەرگە 42500 تەڭگە بەرىلە مە؟
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ سوزىنشە، توتەنشە جاعداي كەزىندە زەينەتاقى، مۇگەدەكتەرگە جاردەماقى تولەۋ توقتاعان جوق. سوندىقتان مۇگەدەكتەرگە، زەينەتكەرلەرگە 42500 تەڭگە بەرىلمەيدى. بىراق زەينەتكەر، مۇگەدەك نە ۇكىمەتتەن جاردەماقى الاتىن كەز كەلگەن ادام تج جاريالانعانعا دەيىن جۇمىس ىستەپ، سالىق تولەسە، بجت اۋدارسا، ولاردىڭ 42500 تەڭگە الۋ تۋرالى ءوتىنىشى قاراستىرىلادى.
- اتاۋلى الەۋمەتتىك كومەك الاتىندارعا شە؟
ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆتىڭ سوزىنشە، ااك – زەينەتاقى يا جاردەماقى ەمەس. بۇل – كومەك. سوندىقتان ااك الۋشى 42500 تەڭگەگە ءوتىنىش بەرە الادى. ەگەر رەسمي تۇردە جۇمىس ىستەمەسە ءبىر رەت بولسا دا بجت تولەۋى ءتيىس.
- كومەك ۇيدە بالامەن دەكرەت دەمالىسىندا وتىرعان ايەلدەرگە تولەنە مە؟
مەملەكەتتىك قىزمەتتەن دەكرەتكە شىققان ايەلدەردى قوسپاعاندا، ءبىر جاستان اسقان بالا كۇتىمىمەن وتىرعان ايەلدەرگە 42500 تەڭگە بەرىلەدى. بىراق ءوتىنىش بەرمەي تۇرىپ، ءبىر رەت بولسىن بجت تولەۋى ءتيىس. ال ءبىر جاسقا تولماعان بالا قاراپ وتىرعان ايەلگە جاردەماقى تولەنگەندىكتەن 42500 تەڭگەگە ءوتىنىش بەرە المايدى.
- كارانتين ۋاقىتى سوزىلعان جاعدايدا 42500 تەڭگە تاعى بەرىلە مە؟
42500 تەڭگە تج مەرزىمى سوزىلعان سايىن تولەنەدى جانە ايدىڭ تولىق اياقتالۋىنا قارامايدى. ماسەلەن 15 ساۋىردە توتەنشە جاعدايدىڭ العاشقى ايى ءبىتىپ، ول كەلەسى ايدا ءبىر كۇنگە سوزىلسا دا، سول ايعا تولىق تولەنەدى.
- تج ۋاقىتى سوزىلسا، 42500 تەڭگەگە قايتا ءوتىنىش بەرۋ كەرەك پە؟
ءوتىنىشتى ءبىر رەت بەرسەڭىز جەتكىلىكتى، تولەۋ مەرزىمى اۆتوماتتى تۇردە ۇزارتىلادى. ال ءوز-ءوزىن جۇمىسپەن قامتۋشى 42500 تەڭگەنى الۋعا بايلانىستى بجت-نى ءبىر رەت تولەسە جەتكىلىكتى. ازاماتتاردان 42500 تەڭگە تۋرالى ءوتىنىش تج اياقتالعانعا دەيىن قابىلدانا بەرەدى.
- جۇرت 1414 نومىرىنەن "42500 تەڭگە الۋ ءۇشىن بانك ەسەپ شوتىن جىبەرىڭىز" دەگەن SMS العانىن ايتادى. بۇل حابارلاما كىمگە جىبەرىلەدى؟
42500 تەڭگەنى اۋدارۋ ءۇشىن بانك ەسەپشوتى قاجەت. ءسىز كومەككە ءوتىنىش تولتىرعاندا ەسەپشوتتى كورسەتۋىڭىز قاجەت. ال ەسەپشوت بولماسا فورماداعى سول تۇستى تولتىرماي تاستاپ كەتەسىز. بىراق ءبىر اي ىشىندە بانككە بارىپ، ەسەپشوت اشىپ، ونى 1414 نومىرىنە SMS ارقىلى جولداۋىڭىز كەرەك.
- ينتەرنەتى جوق اۋىلداعى تۇرعىندار ءوتىنىشتى قالاي بەرەدى؟
42500 تەڭگەگە ءوتىنىشتى ءبارىبىر ونلاين بەرۋگە تۋرا كەلەدى. اۋىلدا ينتەرنەت بولماسا ينتەرنەت جاقسى ۇستايتىن باسقا ەلدىمەكەنگە بارىپ، سمارتفون ارقىلى Telegram مەسسەندجەرىندەگى t.me/Help42500Bot دەپ اتالاتىن بوت ارقىلى ءوتىنىش بەرە الاسىز.
- ستيپەنديا الاتىن ستۋدەنتتەرگە جاردەماقى بەرىلە مە؟
تج كەزىندە تابىسىنان ايىرىلعان ازاماتتارعا 42500 تەڭگە الەۋمەتتىك تولەم تاعايىنداۋ بارىسىندا ستۋدەنتتەر جەكە سانات رەتىندە قاراستىرىلمايدى. ەڭبەك كودەكسىنە سايكەس، قازاقستان ازاماتتارىنا 16 جاستان باستاپ جۇمىس ىستەۋگە رۇقسات ەتىلەدى. ەڭبەك جانە حالىقتى الەۋمەتتىك قورعاۋ مينيسترلىگىنىڭ ازاتتىققا بەرگەن رەسمي جاۋابىندا "ستۋدەنتتەر شاكىرتاقى الاتىنىنا/المايتىنىنا قاراماستان بوس ۋاقىتىندا جۇمىس ىستەۋى مۇمكىن. ولاردىڭ بارلىعى ءۇشىن ءتارتىپ بىردەي. ەگەر ستۋدەنتتەر جۇمىس ىستەگەن بولسا، جۇمىس بەرۋشى تاراپىنان الەۋمەتتىك جارنالار تولەنگەن بولسا نەمەسە بەيرەسمي ءوزىن-ءوزى جۇمىسپەن قامتىعان ازامات رەتىندە ءبىر رەت بجت تولەسە، وندا 42500 تەڭگە الۋعا ءوتىنىش بەرە الادى" دەپ جازىلعان.
- 42500 تەڭگەگە ءوتىنىش نەشە كۇندە قارالادى؟
ەڭبەك جانە حالىقتى الەۋمەتتىك قورعاۋ مينيسترلىگى ءوتىنىش ءۇش جۇمىس كۇنى ىشىندە قارالاتىنىن مالىمدەدى. ء"ۇش كۇن ىشىندە جاۋاپ كەلمەسە الاڭداۋدىڭ قاجەتى جوق. ءوتىنىش قارالىپ، وعان قاتىستى شەشىم ءتۇبى SMS حابارلاما بولىپ كەلەدى" دەپ جازىلعان مينيسترلىكتىڭ ازاتتىققا بەرگەن رەسمي جاۋابىندا.
- ەگەر ءسىز 42500 تەڭگە تولەنبەيتىنى جايلى حابارلاما الساڭىز، قايتا ءوتىنىش بەرۋگە بولا ما؟
ەگەر ءسىز تەحنيكالىق اقاۋ بولدى دەپ كۇدىكتەنسەڭىز، 42500.enbek.kz سايتى ارقىلى ءوتىنىشتى قايتا بەرۋىڭىزگە بولادى. ەگەر ءوتىنىش تولتىرعاندا قاتە كەتسە، جاۋاپ كۇتۋ كەرەك. جاۋاپ كەلگەن سوڭ قايتا ءوتىنىش بەرە الاسىز.
- قازاقستانعا سىرتتان كوشىپ كەلگەن، بىراق ءالى ىقتيارحات پەن ورالمان كۋالىگىن الماعان ەتنيكالىق قازاقتار 42500 تەڭگە الا ما؟
توتەنشە جاعدايدىڭ ەنگىزىلۋىنە بايلانىستى تابىسىنان ايرىلعان جاعدايدا الەۋمەتتىك تولەم الۋعا ءوتىنىش بەرۋ ءۇشىن ولاردا ىقتيارحات، سونىمەن قاتار تۇرعىلىقتى جەرى بويىنشا تۇراقتى تىركەۋى بولۋى كەرەك.
- ەگەر بانكتەگى ەسەپشوت بۇعاتتالسا، 42500 تەڭگە تۇسە مە؟
قازاقستان ۇكىمەتى بۇعاتتالعان ەسەپشوتتارعا تۇسكەن 42500 تەڭگەنى الۋعا بولادى دەپ سەندىرىپ وتىر. ەگەر 42500 تەڭگە كومەكتى بانكوماتتان الا الماسا بانككە حابارلاسۋى ءتيىس. بانك بۇعاتتالعان ەسەپشوتتان اقشانى بەرمەسە قارجى نارىعىن رەتتەۋ جانە دامىتۋ اگەنتتىگىنە حابارلاسىڭىز.
- رەسمي تۇردە جۇمىسسىز رەتىندە تىركەلگەندە 42500 تەڭگەگە ءوتىنىش بەرە الا ما؟
قازاقستان ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، رەسمي جۇمىسسىز رەتىندە تىركەلگەندەرگە 42500 تەڭگە تولەنبەيدى. سەبەبى ولار جۇمىسسىز رەتىندە مەملەكەتتەن جاردەماقى الادى.
- جەكە تولقۇجاتىنىڭ ۋاقىتى ءوتىپ، كارانتين كەزىندە ونى قايتا جاساتا الماعاندار 42500 تەڭگەگە ءوتىنىش بەرە الا ما؟
قازاقستان ەڭبەك جانە حالىقتى الەۋمەتتىك قورعاۋ مينيسترلىگىنىڭ مالىمەتىنشە، جەكە كۋالىگىنىڭ ۋاقىتى ءوتىپ كەتىپ، كارانتين ۋاقىتىندا جاڭادان جاساتا الماعان ازاماتتار دا 42500 تەڭگەگە ءوتىنىش بەرە الادى. ءوتىنىش تولتىرعاندا ەسكى تولقۇجاتتاعى دەرەكتەردى كورسەتە بەرەسىز.
- 42500 تەڭگە العاندار "نۇر وتان" پارتياسى Birgemiz قورىنان بەرىلەتىن 50 مىڭ تەڭگەگە ءوتىنىش بەرە الا ما؟
ءيا، بەرە الادى. بۇل قارجى Birgemiz قورىنان تولەنەدى. 50 مىڭ تەڭگە كومەك الۋشىلاردىڭ ءتىزىمىن ءار ءوڭىردىڭ اكىمدىگى انىقتايدى. 50 مىڭ تەڭگە تۇرمىسى تومەن كوپبالالى وتباسىلار، ءبىرىنشى توپتاعى مۇگەدەكتەر، مۇگەدەك بالا تاربيەلەپ وتىرعان وتباسىلار، ەڭ تومەنگى زەينەتاقى الىپ جۇرگەن زەينەتكەرلەر، جەتىم بالالار جانە ەكىنشى دۇنيەجۇزىلىك سوعىسقا قاتىسۋشىلار مەن ولارعا تەڭەستىرىلگەندەر، ەڭبەك ارداگەرلەرى بەرىلۋى مۇمكىن.
- 42 500 تەڭگە الىپ، ونى قايتارىپ بەرگىسى كەلەتىندەر نە ىستەۋى كەرەك؟
تولەم قاراجاتىن قايتارۋ قاجەت دەپ ساناساڭىز، "ازاماتتارعا ارنالعان ۇكىمەت" مەملەكەتتىك كورپوراتسياسىنىڭ شوتىنا جىبەرە الاسىز.
بەنەفيتسيار بسك: "ازاماتتارعا ارنالعان ۇكىمەت" مەملەكەتتىك كورپوراتسياسى" كەاق
بەنەفيتسيار بسك: GCVPKZ2A
بەنەفيتسيار جسك: KZ67009SS00368609110
بەنەفيتسيار بسن: 160440007161
بەنەفيتسيار كبە: 11
تتك: 049
وركەن جويامەرگەن،
"ازاتتىق" راديوسى
