Qazaqstan úkimeti eldegi tótenshe jaǵdaı kezinde tabyssyz qalǵan adamdarǵa 42500 teńge (95$) tólep jatyr. Qazirge deıin bul kómekti úsh mıllıonnan astam adam alǵan. Biraq jurt arasynda osy tólem jaıly suraq kóp. Azattyq eńbek jáne halyqty áleýmettik qorǵaý mınıstrligine resmı saýal joldap, jurt kókeıindegi suraqtarǵa jaýap aldy.
- 42500 teńge kómek negizi kimderge beriledi?
Bul tólem tótenshe jaǵdaı (TJ) saldarynan tabysynan aırylǵandarǵa tólenedi. Bılik olardy eki topqa bólgen. Birinshi topqa TJ kezinde jumysyn toqtatqan shaǵyn jáne orta bıznestiń aqysyz demalysqa ketken jaldamaly jumysshylary; resmı tirkelip, salyq tólep júrgen jeke kásipkerler; notarıýs, advokat, kásibı medıator, sot oryndaýshysy kiredi. Ekinshi topqa resmı tirkelmeı, zeınetaqy qoryna, medıınalyq saqtandyrý qoryna, salyq retinde aqsha aýdarmaı óz betinshe tabys taýyp júrgender enedi. Ekinshi toptaǵy óz-ózin jumyspen qamtyǵandar 42500 teńge kómekke ótinish bermes buryn bir ret bolsa da Biryńǵaı jınaq tólemin (BJT - ESP) tóleýi tıis. 42500 teńgeni alý úshin ótinishti eGov portaly, 42500.enbek.kz veb-saıty jáne Telegram messendjerindegi me/Help42500Bot dep atalatyn bot arqyly berýge bolady. Keıin 42500 teńge tólem taǵaıyndalyp jatsa, telefonyńyzǵa SMS habarlama kelip, aqsha bank shotyńyzǵa aýdarylady. Ótinishti 24/7 rejıminde, ıaǵnı kez kelgen ýaqytta berýge bolady.
- BJT qansha teńge, ony úıden shyqpaı qalaı tóleıdi?
Resmı tirkelmeı jumys istegen qala turǵyny 2651 teńge, aýyl turǵyny - 1325 teńge BJT tóleýi tıis. Ony 5505 nómirine SMS habarlama joldaý nemese bank qosymshasy arqyly tóleýge bolady. Telefon habarlamasyna JSN-men birge qala turǵyny GORODESP, aýyl turǵyny SELOESP dep jazýy tıis. 42500 teńge alýǵa baılanysty barlyq suraqty 1414 nómerinen bilýge bolady.
- Múgedekter jáne zeınetkerlerge 42500 teńge berile me?
Eńbek jáne halyqty áleýmettik qorǵaý mınıstri Birjan Nurymbetovtyń sózinshe, tótenshe jaǵdaı kezinde zeınetaqy, múgedekterge járdemaqy tóleý toqtaǵan joq. Sondyqtan múgedekterge, zeınetkerlerge 42500 teńge berilmeıdi. Biraq zeınetker, múgedek ne úkimetten járdemaqy alatyn kez kelgen adam TJ jarııalanǵanǵa deıin jumys istep, salyq tólese, BJT aýdarsa, olardyń 42500 teńge alý týraly ótinishi qarastyrylady.
- Ataýly áleýmettik kómek alatyndarǵa she?
Eńbek jáne halyqty áleýmettik qorǵaý mınıstri Birjan Nurymbetovtyń sózinshe, AÁK – zeınetaqy ıa járdemaqy emes. Bul – kómek. Sondyqtan AÁK alýshy 42500 teńgege ótinish bere alady. Eger resmı túrde jumys istemese bir ret bolsa da BJT tóleýi tıis.
- Kómek úıde balamen dekret demalysynda otyrǵan áıelderge tólene me?
Memlekettik qyzmetten dekretke shyqqan áıelderdi qospaǵanda, bir jastan asqan bala kútimimen otyrǵan áıelderge 42500 teńge beriledi. Biraq ótinish bermeı turyp, bir ret bolsyn BJT tóleýi tıis. Al bir jasqa tolmaǵan bala qarap otyrǵan áıelge járdemaqy tólengendikten 42500 teńgege ótinish bere almaıdy.
- Karantın ýaqyty sozylǵan jaǵdaıda 42500 teńge taǵy berile me?
42500 teńge TJ merzimi sozylǵan saıyn tólenedi jáne aıdyń tolyq aıaqtalýyna qaramaıdy. Máselen 15 sáýirde tótenshe jaǵdaıdyń alǵashqy aıy bitip, ol kelesi aıda bir kúnge sozylsa da, sol aıǵa tolyq tólenedi.
- TJ ýaqyty sozylsa, 42500 teńgege qaıta ótinish berý kerek pe?
Ótinishti bir ret berseńiz jetkilikti, tóleý merzimi avtomatty túrde uzartylady. Al óz-ózin jumyspen qamtýshy 42500 teńgeni alýǵa baılanysty BJT-ny bir ret tólese jetkilikti. Azamattardan 42500 teńge týraly ótinish TJ aıaqtalǵanǵa deıin qabyldana beredi.
- Jurt 1414 nomirinen "42500 teńge alý úshin bank esep shotyn jiberińiz" degen SMS alǵanyn aıtady. Bul habarlama kimge jiberiledi?
42500 teńgeni aýdarý úshin bank esepshoty qajet. Siz kómekke ótinish toltyrǵanda esepshotty kórsetýińiz qajet. Al esepshot bolmasa formadaǵy sol tusty toltyrmaı tastap ketesiz. Biraq bir aı ishinde bankke baryp, esepshot ashyp, ony 1414 nómirine SMS arqyly joldaýyńyz kerek.
- Interneti joq aýyldaǵy turǵyndar ótinishti qalaı beredi?
42500 teńgege ótinishti báribir onlaın berýge týra keledi. Aýylda ınternet bolmasa ınternet jaqsy ustaıtyn basqa eldimekenge baryp, smartfon arqyly Telegram messendjerindegi t.me/Help42500Bot dep atalatyn bot arqyly ótinish bere alasyz.
- Stıpendııa alatyn stýdentterge járdemaqy berile me?
TJ kezinde tabysynan aıyrylǵan azamattarǵa 42500 teńge áleýmettik tólem taǵaıyndaý barysynda stýdentter jeke sanat retinde qarastyrylmaıdy. Eńbek kodeksine sáıkes, Qazaqstan azamattaryna 16 jastan bastap jumys isteýge ruqsat etiledi. Eńbek jáne halyqty áleýmettik qorǵaý mınıstrliginiń Azattyqqa bergen resmı jaýabynda "Stýdentter shákirtaqy alatynyna/almaıtynyna qaramastan bos ýaqytynda jumys isteýi múmkin. Olardyń barlyǵy úshin tártip birdeı. Eger stýdentter jumys istegen bolsa, jumys berýshi tarapynan áleýmettik jarnalar tólengen bolsa nemese beıresmı ózin-ózi jumyspen qamtyǵan azamat retinde bir ret BJT tólese, onda 42500 teńge alýǵa ótinish bere alady" dep jazylǵan.
- 42500 teńgege ótinish neshe kúnde qaralady?
Eńbek jáne halyqty áleýmettik qorǵaý mınıstrligi ótinish úsh jumys kúni ishinde qaralatynyn málimdedi. "Úsh kún ishinde jaýap kelmese alańdaýdyń qajeti joq. Ótinish qaralyp, oǵan qatysty sheshim túbi SMS habarlama bolyp keledi" dep jazylǵan mınıstrliktiń Azattyqqa bergen resmı jaýabynda.
- Eger siz 42500 teńge tólenbeıtini jaıly habarlama alsańyz, qaıta ótinish berýge bola ma?
Eger siz tehnıkalyq aqaý boldy dep kúdiktenseńiz, 42500.enbek.kz saıty arqyly ótinishti qaıta berýińizge bolady. Eger ótinish toltyrǵanda qate ketse, jaýap kútý kerek. Jaýap kelgen soń qaıta ótinish bere alasyz.
- Qazaqstanǵa syrttan kóship kelgen, biraq áli yqtııarhat pen oralman kýáligin almaǵan etnıkalyq qazaqtar 42500 teńge ala ma?
Tótenshe jaǵdaıdyń engizilýine baılanysty tabysynan aırylǵan jaǵdaıda áleýmettik tólem alýǵa ótinish berý úshin olarda yqtııarhat, sonymen qatar turǵylyqty jeri boıynsha turaqty tirkeýi bolýy kerek.
- Eger banktegi esepshot buǵattalsa, 42500 teńge túse me?
Qazaqstan úkimeti buǵattalǵan esepshottarǵa túsken 42500 teńgeni alýǵa bolady dep sendirip otyr. Eger 42500 teńge kómekti bankomattan ala almasa bankke habarlasýy tıis. Bank buǵattalǵan esepshottan aqshany bermese Qarjy naryǵyn retteý jáne damytý agenttigine habarlasyńyz.
- Resmı túrde jumyssyz retinde tirkelgende 42500 teńgege ótinish bere ala ma?
Qazaqstan eńbek jáne halyqty áleýmettik qorǵaý mınıstrliginiń málimetinshe, resmı jumyssyz retinde tirkelgenderge 42500 teńge tólenbeıdi. Sebebi olar jumyssyz retinde memleketten járdemaqy alady.
- Jeke tólqujatynyń ýaqyty ótip, karantın kezinde ony qaıta jasata almaǵandar 42500 teńgege ótinish bere ala ma?
Qazaqstan eńbek jáne halyqty áleýmettik qorǵaý mınıstrliginiń málimetinshe, jeke kýáliginiń ýaqyty ótip ketip, karantın ýaqytynda jańadan jasata almaǵan azamattar da 42500 teńgege ótinish bere alady. Ótinish toltyrǵanda eski tólqujattaǵy derekterdi kórsete beresiz.
- 42500 teńge alǵandar "Nur Otan" partııasy Birgemiz qorynan beriletin 50 myń teńgege ótinish bere ala ma?
Iá, bere alady. Bul qarjy Birgemiz qorynan tólenedi. 50 myń teńge kómek alýshylardyń tizimin ár óńirdiń ákimdigi anyqtaıdy. 50 myń teńge turmysy tómen kópbalaly otbasylar, birinshi toptaǵy múgedekter, múgedek bala tárbıelep otyrǵan otbasylar, eń tómengi zeınetaqy alyp júrgen zeınetkerler, jetim balalar jáne Ekinshi dúnıejúzilik soǵysqa qatysýshylar men olarǵa teńestirilgender, eńbek ardagerleri berilýi múmkin.
- 42 500 teńge alyp, ony qaıtaryp bergisi keletinder ne isteýi kerek?
Tólem qarajatyn qaıtarý qajet dep sanasańyz, "Azamattarǵa arnalǵan úkimet" memlekettik korporaııasynyń shotyna jibere alasyz.
Benefııar BSK: "Azamattarǵa arnalǵan úkimet" memlekettik korporaııasy" KeAQ
Benefııar BSK: GCVPKZ2A
Benefııar JSK: KZ67009SS00368609110
Benefııar BSN: 160440007161
Benefııar Kbe: 11
TTK: 049
Órken JOIaMERGEN,
"Azattyq" radıosy
