28 اقپان كۇنى بوكستان قازاقستان ۇلتتىق قۇراماسى يوردانياعا اتتانىپ، وندا ازيا جانە مۇحيت جاعالاۋلارى ەلدەرىنىڭ ليتسەنزيالىق تۋرنيرىنە قاتىسادى. ناقتىراق ايتقاندا، 3-11 ناۋرىز ارالىعىندا اممان تورىنە كەرىلگەن رينگتە توكيو وليمپياداسىنىڭ جولدامالارى ساراپقا سالىنادى.
بۇل جولى ازيا جانە مۇحيت جاعالاۋلارى ەلدەرىنە 63 ليتسەنزيا ءبولىنىپتى. ەرلەر اراسىنداعى 52, 57 جانە 63 كەلى سالماق دارەجەسىندە 1-6 ورىندارعا يە بولعان بوكسشىلار جازدا وليمپيادا ويىندارىنا بارادى. ال 69, 71 جانە 81 كەلى سالماقتاعى بوكسشىلار توكيوعا بارۋ ءۇشىن 1-5 ورىندارعا يە بولۋلارى كەرەك. 91 كەلىگە دەيىنگى جانە 91 كەلىدەن جوعارى سالماق دارەجەسىندەگى الىپتارعا 4 جولدامادان بولىنگەن.
قازاقستان بوكس فەدەراتسياسىنىڭ رەسمي سايتى مالىمدەگەن اقپاراتقا سۇيەنسەك، امماندا ايەلدەراراسىنداعى 51 كەلى سالماق دارەجەسىندە وليمپيادا ويىندارىنىڭ 6 جولداماسى ساراپقا سالىنادى. ال 57, 60, 69 جانە 75 كەلى سالماق دارەجەلەرىنە تەك 4 ليتسەنزيادان ءبولىنىپتى.
ەندى قازاقستان ۇلتتىق قۇراماسىنىڭ باس باپكەرى عالىمبەك كەنجەباەۆ جاريالاعان تىزىمگە كوڭىل اۋدارايىق:
52 كەلى: ساكەن بيبوسىنوۆ – 2019 الەم چەمپيوناتىنىڭ قولا جۇلدەگەرى;
57 كەلى: سەرىك تەمىرجانوۆ – بىرقاتار حالىقارالىق تۋرنيرلەردىڭ جەڭىمپازى;
63 كەلى: زاكير سافيۋللين – 2019 جىلعى ازيا چەمپيوناتىنىڭ كۇمىس جۇلدەگەرى;
69 كەلى: ابىلايحان ءجۇسىپوۆ – 2017 جانە 2019 جىلدارداعى الەم چەمپيوناتتارىنىڭ قولا جۇلدەگەرى;.
75 كەلى: ءابىلحان امانقۇل – 2017 الەم چەمپيوناتىنىڭ كۇمىس جۇلدەگەرى، ازيا چەمپيوناتىنىڭ قولا جۇلدەگەرى;
81 كەلى بەكزات نۇرداۋلەتوۆ – 2019 جىلعى الەم چەمپيونى;
91 كەلى: ۆاسيلي لەۆيت – ريو وليمپياداسىنىڭ كۇمىس جۇلدەگەرى، الەم جانە ازيا چەمپيوناتتارىنىڭ جۇلدەگەرى;
+ 91 كەلى: قامشىبەك قوڭقاباەۆ – الەم جانە ازيا چەمپيوناتتارىنىڭ ەكى دۇركىن كۇمىس جۇلدەگەرى، قازاقستان قۇراماسىنىڭ كاپيتانى.
عالىمبەك كەنجەباەۆ وز سوزىندە يوردانياعا باراتىن جىگىتتەردىڭ ءبارىنىڭ ءدال قازىر ءوز سالماقتارىنداعى ۇزدىكتەرى ەكەندەرىن تىلگە تيەك ەتكەن. ءارى ءبارىنىڭ دە تاجىريبەسى بار ەكەنىن جانە كەز كەلگەنىنىڭ جوعارى جەتىستىككە قول جەتكىزە الاتىندىعىن اتاپ وتكەن. قازىر قۇراما ساپىندا باسەكەلەستىك جوعارى ەكەندىگىنە، الەۋەتتەرى جوعارى جاستاردىڭ دا ءوسىپ كەلە جاتقاندىعىنا توقتالىپ ءوتىپ، يوردانياعا باراتىن قۇرامدى بىرنەشە رەت وزگەرتۋگە تۋرا كەلگەندىگىن دە جاسىرماعان.
باس باپكەر دايىندىق جۇمىستارىنىڭ جوعارى دەڭگەيدە ۇيىمداستىرىلىپ، جىلدار بويى قالىپتاسقان ءوز ادىستەمەلەرىنەن اۋىتقىماۋعا تىرىسقاندارىن ءتۇرتىپ ءوتىپتى. ءارى كۋبا، انگليا جانە گەرمانيا سەكىلدى ەلدەردىڭ قارىمدى بوكسشىلارىمەن بىرگە جاتتىعىپ، بىرلەسكەن جيىن وتكىزگەندەرىنە دە توقتالىپتى.
عالىمبەك كەنجەباەۆ ءسوز سوڭىندا بار سالماقتا وليمپيادا جولداماسىن جەڭىپ الۋدى ماقسات تۇتاتىندارىن، ايتسە دە، كەم دەگەندە 6 ليتسەنزيا ولجالاپ قايتۋدى جوسپارلاپ وتىرعاندارىن مالىمدەگەن. مۇنداي جاعدايدا، مامىر ايىندا پاريجدە وتەتىن بۇكىلالەمدىك ىرىكتەۋ تۋرنيرىندە قالعان جولدامالارعا قول جەتكىزۋ كوزدەلىپ وتىرعاندىعىن دا بۇكپەسىز ايتقان.
