بۇگىن قازاق ونەرى تاعى ءبىر ساڭلاعىنان ايىرىلدى. ەلىمىزگە تانىمال سازگەر، حالىقارالىق، رەسپۋبليكالىق بايقاۋلاردىڭ لاۋرەاتى تۇردىقىلىش ىزتاەۆ 71 جاسقا قاراعان شاعىندا باقيعا اتتاندى. بۇل تۋرالى تۇركىستان وبلىستىق مادەنيەت باسقارماسى facebook پاراقشاسىندا حابارلادى.
«وسىعان وراي مارقۇمنىڭ تۋعان-تۋىستارى مەن ۇل-قىزدارىنا قايعىرىپ كوڭىل ايتامىز. مارقۇمنىڭ جاتقان جەرى جايلى، يمانى سالامات بولسىن!» دەلىنگەن.
تۇردىقىلىش ىزتاەۆ 1949 جىلى 30 ماۋسىم كۇنى تۇركىمەنستان رەسپۋبليكاسىنىڭ تاحتابازار اۋدانىندا دۇنيەگە كەلگەن. 1968 جىلى شىمكەنت مۋزىكا ۋچيليششەسىن، 1973 جىلى قۇرمانعازى اتىنداعى كونسەرۆاتوريانى، 1993 جىلى لەنينگرادتاعى ن.ك. كرۋپسكايا اتىنداعى مادەنيەت ينستيتۋتىنىڭ اسپيراتۋراسىن بىتىرگەن.
ەڭبەك جولىن 1973 ءال-فارابي اتىنداعى شىمكەنت مادەنيەت ينستيتۋتىندا باستاپ، وسى ۇجىمدا 1994 جىلعا دەيىن تاباندى قىزمەت ەتتى. حالىق اسپاپتار كافەدراسىنىڭ دوتسەنتى. ش.قالداياقوۆ اتىنداعى وبلىسى فيلارمونيانىڭ كوركەمدىك جەتەكشىسى، حالىق اسپاپتارى وركەسترىنىڭ ديريجەرى. ول 20-دان استام عىلىمي جانە وقۋ ادىستەمەلىك جۇمىستاردىڭ اۆتورى. اندەرى جەكە البوم بولىپ «ماحاببات – ءومىر» دەگەن اتپەن جارىق كوردى. قازاق ەلىنە ەتەنە تانىمال «نۇريكامال» ءانىنىڭ اۆتورى. وبلىستىق ءماسليحاتتىڭ گراموتاسىمەن ماراپاتتالعان، وبلىس اكىمى بەلگىلەگەن «2000 جىلدىڭ ەڭ ۇزدىك كومپوزيتورى» اتانعان.
