«نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى حالىقارالىق ىنتىماقتاستىعىن كەڭەيتۋدە. جاڭا سەرىكتەستەر قاتارى ازياداعى جەتەكشى جوعارى وقۋ ورىندارىنىڭ ءبىرى – شەنچجەن قالاسىنداعى گونكونگ قىتاي ۋنيۆەرسيتەتىمەن (CUHK-Shenzhen) تولىقتى.
ىنتىماقتاستىق تۋرالى مەموراندۋمعا NIS باسقارما توراعاسىنىڭ ورىنباسارى سابىرجان سادۋاقاسوۆ پەن CUHK-Shenzhen ۋنيۆەرسيتەتىنىڭ اكادەميالىق بايلانىستار كەڭسەسىنىڭ ديرەكتورى پول كە قول قويدى. قۇجات باكالاۆرياتقا ۇمىتكەرلەرگە ارنالعان حالىقارالىق اشىق ەسىك كۇنى اياسىندا راسىمدەلدى.
كەلىسىم NIS تۇلەكتەرىنە نە بەرەدى؟
بۇل ىنتىماقتاستىق زياتكەرلىك مەكتەپتەردىڭ وقۋشىلارىنا ءبىلىم كەڭىستىگىن كەڭەيتىپ، جاڭا كوكجيەكتەردى باعىندىرۋعا جول اشادى. شاكىرتتەر زاماناۋي ءبىلىم بەرۋ ادىستەرىمەن تانىسىپ، حالىقارالىق اكادەميالىق الماسۋ باعدارلامالارىنا قاتىسۋ، سونداي-اق عىلىمي-زەرتتەۋ جوبالارىندا تاجىريبە جيناقتاۋ مۇمكىندىگىنە يە بولادى.
كەلىسىم اياسىندا CUHK-Shenzhen ۋنيۆەرسيتەتى NIS تۇلەكتەرىنە ەكى تولىق باكالاۆريات شاكىرتاقىسىن تاعايىندادى. بۇل شاكىرتاقىلار «بيزنەس-اكىمشىلەندىرۋ (قارجىلىق ينجينيرينگ)»، «اۋدارما ءىسى (قىتاي-اعىلشىن تىلدەرى)» جانە مۋزىكا مەكتەبىنىڭ ماماندىقتارىنان باسقا بارلىق ءبىلىم بەرۋ باعدارلامالارىنا قولجەتىمدى.
بۇل نەگە ماڭىزدى؟
زياتكەرلىك مەكتەپتەردىڭ بىرەگەي NIS-Programme ءبىلىم بەرۋ باعدارلاماسىن الەمنىڭ بىرقاتار بەدەلدى ۋنيۆەرسيتەتتەرى رەسمي تۇردە مويىنداعان. قازىرگى تاڭدا NIS تۇلەكتەرىنىڭ ديپلومدارىن قازاقستانداعى 24 جانە شەتەلدەگى 69 جوعارى وقۋ ورنى قابىلدايدى. بۇل تۇلەكتەرگە الەمدىك دەڭگەيدەگى الدىڭعى قاتارلى وقۋ وردالارىنا تۇسۋگە كەڭ مۇمكىندىك بەرەدى.
CUHK-Shenzhen تۋرالى نە بىلەمىز؟
– QS World University Rankings 2025 جاھاندىق رەيتينگىندە 36-ورىندى يەلەنگەن;
– كامپۋستارى شەنچجەن جانە گونكونگ قالالارىندا ورنالاسقان;
– وقىتۋ ۇدەرىسى حالىقارالىق ءبىلىم بەرۋ ستاندارتتارىنا ساي اعىلشىن تىلىندە جۇرگىزىلەدى;
– ۋنيۆەرسيتەتكە ءتۇسۋشى تالاپكەرلەر – قىتاي مەكتەپتەرىنىڭ ۇزدىك 0,5–1% تۇلەكتەرى.
قىتايعا ساپار قالاي ءوتتى؟
NIS وكىلدەرى CUHK-Shenzhen ۋنيۆەرسيتەتىنىڭ اكادەميالىق باعدارلامالارىمەن، ستۋدەنتتەردى قولداۋ جۇيەسىمەن، حالىقارالىق الماسۋ مۇمكىندىكتەرىمەن جانە تۇلەكتەرگە ارنالعان مانساپتىق باعىتتارىمەن تانىستى.
ساپار بارىسىندا تسيفرلاندىرۋ مەن جاساندى ينتەللەكت دامىعان قازىرگى زامانداعى ءبىلىم بەرۋدىڭ بولاشاعىنا قاتىستى پىكىرتالاستارعا ەرەكشە نازار اۋدارىلدى. سونىمەن قاتار CUHK-Shenzhen ۋنيۆەرسيتەتىندە ءبىلىم الىپ جاتقان NIS تۇلەكتەرىمەن كەزدەسۋ ءوتىپ، ولار ءوز وقۋ تاجىريبەلەرىمەن ءبولىستى.
سابىرجان سادۋاقاسوۆتىڭ ايتۋىنشا، CUHK-Shenzhen ۋنيۆەرسيتەتىمەن ورناعان ىنتىماقتاستىق NIS-ءتىڭ حالىقارالىق دەڭگەيدەگى بەدەلىن ارتتىرىپ، وقۋشىلارعا الەمنىڭ ۇزدىك جوعارى وقۋ ورىندارىنىڭ بىرىنە تۇسۋگە بىرەگەي مۇمكىندىك بەرەدى.
