بيىل قازاقستاننىڭ حالىق جازۋشىسى، دراماتۋرگ قۋاندىق شاڭعىتباەۆتىڭ تۋعانىنا 100 جىل تولىپ وتىر، دەپ حابارلايدى «ادىرنا» ءتىلشىسى.
كورنەكتى تۇلعا 1925 جىلدىڭ 21 ناۋرىزىندا اقتوبە وبلىسىنىڭ قارابۇتاق اۋدانىندا دۇنيەگە كەلگەن. قازاق مەملەكەتتىك ۋنيۆەرسيتەتىن (قازىرگى قازۇۋ — رەد.) بىتىرگەن.
1944–1955 جىلدارى اقتوبە پەداگوگيكالىق ينستيتۋتىندا كافەدرا مەڭگەرۋشىسى، وبلىستىق «سوتسياليستىك جول»، «اكتيۋبينسكايا پراۆدا» گازەتتەرىندە ءبولىم مەڭگەرۋشىسى، 1955–1973 جىلدارى «قازاق ادەبيەتى» گازەتىندە، «جۇلدىز» جۋرنالىندا باس رەداكتوردىڭ ورىنباسارى، باس رەداكتور، «قازاقفيلم» كينوستۋدياسىندا، قازاق راديوسىندا باس رەداكتور قىزمەتتەرىن اتقارعان.
العاشقى كىتابى «ار» دەگەن اتپەن 1945 جىلى جارىق كوردى. كەيىن «ولەڭدەر»، «اققۋ ءانى»، «ستيحي»، «ارما، رەسپۋبليكام»، «ليريكا»، «جىر جاھانى»، «گۇلتولقىن»، «سارشاتامىز» «جىل قۇسى»، «ماحاببات پەن عاداۋات» ليريكالىق كىتاپتارى وقىرماندارعا ۇسىنىلدى.
قۋاندىق شاڭعىتباەۆ — كوپتەگەن ءان ولەڭىنىڭ اۆتورى. ا. س. پۋشكيننىڭ «ەۆگەني ونەگين» رومانىن (1949, 1986), م.يۋ.لەرمونتوۆ، ي.ۆ.گەتە، ر.بەرنس ليريكالارىن، و.حايامنىڭ رۋباياتتارىن، م.گوركيدىڭ «قىز بەن اجال» پوەماسىن (1941) قازاق تىلىنە اۋداردى. ول اۋدارماشىلىق قىزمەتى ءۇشىن حالىقارالىق پۋشكين سىيلىعىنا يە بولدى.
