اقش-تىڭ “Time” جۋرنالى 2025 جىلى بارىپ كورۋگە تۇرارلىق الەمدەگى ەڭ تاڭداۋلى ءجۇز ورىننىڭ ءبىرى رەتىندە قازاق قۇسبەگىلىك وداعىنىڭ “ساياتشىلار سارايىن” اتادى، دەپ حابارلايدى “ادىرنا” ۇلتتىق پورتالى.
موڭعوليانىڭ باتىسىندا شالعاي جاتقان قازاقتىڭ ءبىر وتاۋى – بايان-ولگەي ايماعى. بۇل جاقتا ۇلتتىق قۇندىلىق جاقسى ساقتالعان. سونىڭ ءبىرى – قازاقتىڭ قۇسبەگىلىك ونەرى. وتكەن جىلى قازاق قۇسبەگىلىك وداعىنىڭ «ساياتشىلار سارايى» سالىنعان ەدى.
بايىرعى عۇرپىن بۇزباي دامىپ كەلەتىن مەكەن بيىل “Time” جۋرنالىنىڭ تاڭداۋلى 100 مەكەنىنە كىردى.
“موڭعوليانىڭ باتىسىنداعى بايان-ولگەي پروۆينتسياسىندا جىل سايىنعى «التىن قىران» فەستيۆالى وتەتىن جەردە عاسىرلار بويى قالىپتاسقان ءداستۇر ومىرشەڭ. التاي تاۋلارىنىڭ بوكتەرىندە جاڭا قىرانشىلار مادەني ورتالىعى جىل بويى قازاق بۇركىتشىلەرىن جانە جابايى تابيعاتتى قورعاۋشىلار مەن ساياحاتشىلاردى قولداۋ ءۇشىن اشىلدى.
كيىز ءۇي سياقتى جوبالانعان ورتالىقتا قوناقتار بۇركىت اۋلاۋ شەبەرحانالارىنا قاتىسا الادى، موڭعولدىڭ شاباندوزدىعى تۋرالى بىلە الادى، ايماقتىق ونەر مەن توقىما بۇيىمدارىن ساتىپ الادى جانە وسى ايماقتا تۇنەۋگە بولادى. بيلەتتەردى ساتۋدان تۇسكەن قاراجات قازاق سۇڭقارلارى قاۋىمداستىعىنىڭ باس كەڭسەسى قىزمەتىن اتقاراتىن كەڭىستىكتى ساقتاۋعا كومەكتەسەدى”، دەپ جازعان “Time” جۋرنالى.
ايتا كەتسەك، كيىز ءپىشىندى عيماراتتىڭ جالپى كولەمى – 120 شارشى مەتر. ۇلكەن جانە ىشكى ەكى وردادان تۇرادى. ۇلكەن وردانىڭ بيىكتىگى 4,5 مەتر بولسا، ديامەترى 12 مەتر ەكەن. ال ىشكى وردانىڭ ديامەترى 6 مەتر. سىرتىنان قاراعاندا قازاقتىڭ قوس كيىز ءۇيىن يىقتاستىرىپ تىككەن سياقتى. بىراق اراسىن وتكەل سياقتى جالعاپ تۇرعان تاعى ءبىر بولىك بار.
«موڭعولياداعى بۇركىتشىلەر قاۋىمىندا بۇرىن سوڭدى مۇنداي جينالاتىن ورىن بولماعان. قور كوپ جىلدىق جوسپاردان كەيىن ورتالىقتى ىسكە قوسۋ ءۇشىن قازاق سۇڭقارشىلار قاۋىمداستىعىمەن، سونداي-اق كوشپەلى ەكسپەديتسيالارمەن، موڭعوليانىڭ جابايى تابيعاتتى زەرتتەۋ جانە قورعاۋ ورتالىعىمەن جانە بايان-ولگي ۇكىمەتىمەن تىعىز جۇمىس جاسادى”، دەپ جازادى باسىلىم.
