اتىراۋ وبلىسىنىڭ تاريحي-ولكەتانۋ مۋزەيىنىڭ ارحەولوگيالىق ەكسپەديتسياسى قىزىلقوعا اۋدانى قاراباۋ اۋىلى ماڭىندا ارحەولوگيالىق عىلىمي-زەرتتەۋ جۇمىستارىن جۇرگىزگەن ەدى. ناتيجەسىندە سارمات يمپەرياسىنا تيەسىلى توعىز قورعاندى زەرتتەۋ مۇمكىندىگى تۋدى. بۇل تۋرالى اتىراۋ وبلىسى اكىمدىگىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ب.ز.د. V عاسىرعا تيەسىلى قورعان قىزىلقوعا اۋدانى اۋماعىنىنان تابىلدى. ءبىر قورعاننىڭ ىشىندەگى توعىز قابىردىڭ جەتەۋى تونالماعاندىعىن عالىمدار دالەلدەپ وتىر.
وبلىستىق تاريحي-ولكەتانۋ مۋزەيىنىڭ ارحەولوگيالىق عىلىمي-زەرتتەۋ ءبولىمىنىڭ اعا عىلىمي قىزمەتكەرى، تاريح عىلىمدارىنىڭ كانديداتى مارات حاسەنوۆ قاراباۋ-2 قورعانىنا جۇرگىزىلگەن ارحەولوگيالىق جۇمىستارعا توقتالدى.
"قاراباۋ-2 قورعانى قاراباۋ اۋىلىنان سولتۇستىككە قاراي 10 شاقىرىم قاشىقتىقتا ورنالاسقان، ديامەترى – 70 مەتر، بيىكتىگى – 3 مەتر بولىپ تابىلاتىن اتىراۋ وڭىرىندەگى "پاتشا" قورعاندارىنىڭ ءبىرى. قورعانعا 2023-2024 جىلدار ارالىعىنداعى جۇرگىزىلگەن قازبا جۇمىسى ناتيجەسىندە 9 قابىر زەرتتەلىپ، ونىڭ ىشىندە 7 قابىردىڭ تونالماعاندىعى انىقتالدى. قورعانداعى 3 قابىردى (№1, 2, 3 قابىرلەر) زەرتتەۋ بارىسىندا ءبىزدىڭ داۋىرىمىزگە دەيىنگى V-عاسىردا التىننان "اڭ ستيلىمەن" جانە وزگە دە تۇردە جاسالعان ءارتۇرلى اشەكەي بۇيىمدار مەن زاتتار، قارۋ-جاراقتار، ءارتۇرلى پىشىندەگى قولادان، كەراميكادان جانە سۇيەكتەن جاسالعان ىدىستار تابىلدى. مۇنىڭ ءوزى قاراباۋ-2 قورعانىن تەك اتىراۋ ءوڭىرىنىڭ عانا ەمەس، قازاقستاننىڭ ەرتە كوشپەلىلەر داۋىرىندەگى "سارمات كوسەمدەرى جەرلەنگەن" بىرەگەي ەسكەرتكىش رەتىندە تانۋعا جول اشادى", — دەدى ول.
ودان ءارى قاراقۇدىق-1 جانە قاراقۇدىق-2 قورعاندارىنداعى ارحەولوگيالىق زەرتتەۋ جۇمىستارىنىڭ ءمان-جايى تۋرالى مۋزەيدىڭ ارحەولوگيا ءبولىمىنىڭ مەڭگەرۋشىسى، جاس عالىم سالامات بازارباەۆ ايتتى.
"مۋزەيدىڭ قاراباۋ اۋىلىنان سولتۇستىك-باتىسقا قاراي 9,7 شاقىرىمدا جەردە ورنالاسقان. قاراقۇدىق-1 قورعانىنىڭ ديامەترى - 38 مەتر، بيىكتىگى - 1,8 مەتر، قاراقۇدىق-2 قورعانىنىڭ ديامەترى - 37 مەتر، بيىكتىگى - 1,4 مەتر. وسى اتالعان ەكى قورعاندى زەرتتەۋ بارىسىندا قابىرلەردەن كۇمىس پيكتوگرامما (اقبوكەننىڭ، قاسقىردىڭ سۋرەتتەرى), التىن زەرگەرلىك بۇيىمدار، كەراميكالىق ىدىستار، ءارتۇرلى تۇرمىستىق زاتتار، اعاش پەن كەراميكالىق ىدىستار، قولا قازاندار، تەمىر جانە قولادان جاسالعان قارۋ-جاراق (اكيناك، قىلىش، جەبە ۇشتارى، نايزا بولىگى) تابىلدى", - دەدى ول.
كورمەگە قويىلعان ارحەولوگيالىق ولجالار اتىراۋ ءوڭىرىن ەرتە كەزەڭدەردە مەكەندەگەن سارمات تايپالارىنىڭ وركەنيەتىنىڭ دەڭگەيىن، ونىڭ ىشىندە كوشپەلىلەردىڭ قولونەرىنىڭ، اسكەري ونەرى مەن ءدىني راسىمدەرىنىڭ جوعارى دارەجەدە دامىعاندىعىن كورسەتتى.
