ۋحانداعى جاستاردى الىپ قايتۋعا تەگى قازاق ۇشقىش قانا سۇرانىپ باردى

3695

ەرلىك كۇندەلىكتى ومىردە بولىپ جاتىر. جەڭىل اتقارىلعان سوڭ ەرلىك قاراپايىم ءىس سياقتى كورىنىس تابادى. كۇنى كەشە ۋحاننان جۇزدەگەن جاستاردى الىپ قايتۋ ماسەلەسى تۇرعاندا وزگە ۇلت وكىلدەرى تايساقتاپ، باس تارتقان. سول كەزدە جاس تا بولسا حالىقارالىق دەڭگەيدەگى تاجىريبەسى مول ۇشقىش اسلان اسحاتۇلى باۋىرىمىز ناعىز قازاققا ءتان قايسار مىنەز تانىتىپ، قاتەرلى ساپارعا بىردەن تاۋەكەل ەتتى، – دەپ عۇلاما عالىم بەيبىت ساپارالى اعامىز فەيسبۋكتاعى پاراقشاسىندا تەبىرەنە جازدى.

وسىدان بىرنەشە جىل بۇرىن اسلان ۇيلەنگەندە العاشقى بولىپ تىلەك-باتا ايتۋ مارتەبەسى ءتيىپ، قازاق اۋە جولدارى نەگىزىن قالاعان ۇشقىش-گەنەرال امانتاي جولدىباەۆ پەن ۇقك-ءنىڭ گەنەرال-مايورى بەكەت بايعازيەۆپەن بىرگە جۇرەكجاردى تىلەكتەرىمىزدى ايتىپ، ۇلكەن ءومىر جولىنا اق باتامىزدى بەرگەن ەدىك.

ەندى، مىنە، سونىڭ ورىندالعانداي ءبىر كورىنىسى بولىپ، 02.02.2020 جىلى تاڭدا ۋحاننان 80 قازاق جاستارى مەن بەلورۋس، ارميان جانە قىرعىز ازاماتتارىن الىپ ۇشىپ، باس ۇشقىش اسلان باسقارعان ارنايى توپ ءبىر توپ قاۋىمدى اپاتتى ايماقتان الىپ شىعىپ، دىتتەگەن ۋاقىتىندا نۇر-سۇلتان قالاسىنا جەتكىزدى.

جۇزدەگەن اتا-انالار ونشاقتى كۇندەر بويعى قاتتى ۇرەي مەن ۋايىمنان سەرپىلىپ، كوڭىلدەرى ورنىققانداي بولدى.

قاتەرلى ۆيرۋس جۇقتىرۋى مۇمكىن دەگەن بىرنەشە قازاق جاستارىنىڭ قاتال كارانتين ايماعىنان شىعارىلۋعا قاتاڭ تۇردە رۇحسات بەرىلمەۋى دە امالسىز شارا.

ۋحانداعى قانداس باۋىرلارىمىزعا قۇدايدان جالبارىنىپ شيپا تىلەيمىز! ۇلكەن اپاتتاردان ەل-جەرىمىز امان-ساۋ بولسىن!

پىكىرلەر