شىعىس قازاقستان وبلىسىندا مەديتسينالىق تۋريزمگە باسىمدىلىق بەرىلەدى

229

وبلىستا تۋريزم سالاسىنداعى ەڭ ءىرى جوبالاردىڭ ءبىرى الاكول جاعالاۋىن اباتتاندىرۋعا قاتىستى بولاتىن. بۇگىندە اتالمىش باعىتتا ءتيىستى جۇمىستار جۇرگىزىلىپ، الاكول قازاقستاننىڭ نەگىزگى 10 تۋريستىك نىسانىنىڭ قاتارىنان ويىپ تۇرىپ ورىن الدى.

سوڭعى ءۇش جىلدا وبلىستىق بيۋدجەتتەن كول جاعالاۋىن اباتتاندىرىپ، ينفراقۇرىلىمىن دامىتۋ ماقساتىنا 6,2 ميلليارد تەڭگە بولىنگەن. الداعى ءتورت جىلدا 28 ميلليارد تەڭگەنىڭ تاعى جەتى جوباسىن جۇزەگە اسىرۋ كوزدەلۋدە. ولاردىڭ ىشىندە سۋمەن قامتۋ، سۋ تارتۋ، سونداي-اق ەلەكتر قۋاتىن بەرۋ جۇيەلەرىن سالۋ، كول جاعالاۋىن بەكىتۋ جانە ءۇرجار اۋىلىنىڭ اۋەجايىن جوندەۋ جوبالارى بار.
بولاشاقتا الاكول جاعالاۋى تۋريستەردى جىل ون ەكى اي قابىلداي الاتىن دارەجەگە جەتۋى ءتيىس. وسى ماقساتتا تۋريستىك ايماقتا شيپاجاي سالۋ جوسپارلانۋدا. رەسەيدىڭ كۋرورتولوگيا جانە فيزيوتەراپيا عىلىمي-زەرتتەۋ ينستيتۋتىنىڭ ماماندارى كولدىڭ شيپالىق قاسيەتتەرىنە جان-جاقتى تالداۋ جاساي كەلە، وندا جىل كولەمىندە ەمدەۋ-ساۋىقتىرۋ ءتۋريزمىن دامىتۋدىڭ الەۋەتى زور ەكەنىنە تاعى ءبىر مارتە دالەلدەگەن.

بۇعان قوسا، جاقىن ارادا قازاقستانداعى مەديتسينالىق تۋريزمدە باعا ساياساتى جاعىنان بەس باعىت باسىمدىققا يە بولۋى ىقتيمال، ولار: كارديوحيرۋرگيا، نەيروحيرۋرگيا، بۋىنداردى پروتەزدەۋ، ستوماتولوگيا، ەكستراكورپورالدى ۇرىقتاندىرۋ. ونىڭ ىشىندەگى ءۇش باعىت (كارديوحيرۋرگيا، نەيروحيرۋرگيا جانە بۋىنداردى پروتەزدەۋ) بويىنشا شىعىس قازاقستانداعى كلينيكالاردىڭ قىزمەتىنە جۇگىنۋگە بولادى. وسى تۇرعىدان الىپ قاراعاندا، وبلىستىڭ مەديتسينالىق مەكەمەلەرى شەتەلدىك كلينيكالارمەن دە باسەكەلەسۋگە قاۋقارلى. بۇل باعاعا عانا ەمەس، قىزمەت ساپاسىنا دا قاتىستى.

ماسەلەن، جۇرەك كلاپانىن اۋىستىرۋ وپەراتسياسىنىڭ قۇنى اقش-تا 130 مىڭ دوللارعا تەڭ بولسا، مەديتسينالىق تۋريزمدە كوشباسشى سانالاتىن ءۇندىستاندا 10 مىڭ دوللار شاماسىندا. ال قازاقستاندا ءدال وسىنداي وتانى 1,6 مىڭ دوللارعا جاساپ بەرەدى. سونداي-اق ەلىمىزدە بۋىندارعا جاسالاتىن وپەراتسيالار دا الدەقايدا ارزان – 4,6 مىڭ دوللار توڭىرەگىندە. سالىستىرمالى تۇردە الىپ قاراعاندا، اقش-تا مۇنداي وپەراتسيا ءۇشىن 160 مىڭ، ال ءۇندىستاندا توعىز مىڭ دوللار تولەۋىڭىز كەرەك.

سونىمەن قاتار وبلىستىڭ ونكولوگيالىق كلينيكالارى دا قىزمەتى جاعىنان ىشكى نارىقتاعى الدىڭعى ورىندارعا يە.

– مەديتسينالىق جانە ساۋىقتىرۋ تۋريزمدەرىن دامىتساق، ىشكى تۋريزم دە العا باساتىن بولادى. سالا نىساندارى بەلگىلى ءبىر ماۋسىمداردا عانا ەمەس، جىل بويى قىزمەت كورسەتە الاتىن دەڭگەيگە جەتەدى. بۇعان قوسا قازىناعا قوسىمشا كىرىس كىرەدى، ويتكەنى مەديتسينالىق تۋريستكە بەرىلەتىن چەكتىڭ قۇنى كادىمگى تۋريستىكىنەن 1,3 ەسەگە قىمبات. مەديتسينالىق ءتۋريزمنىڭ دامۋى شيپاجاي-كۋرورتتىق سالانىڭ دا بويىنا قان جۇگىرتەتىنى ءسوزسىز. بۇل ءوز كەزەگىندە جاڭا جۇمىس ورىندارىن اشىپ، ءوڭىردىڭ ينۆەستيتسيالىق تارتىمدىلىعىن ارتتىرۋعا جول اشپاق، – دەيدى وبلىس اكىمى دانيال احمەتوۆ.

 «ادىرنا» پورتالى

پىكىرلەر