Oblysta turizm salasyndaǧy eŋ ırı jobalardyŋ bırı Alaköl jaǧalauyn abattandyruǧa qatysty bolatyn. Bügınde atalmyş baǧytta tiıstı jūmystar jürgızılıp, Alaköl Qazaqstannyŋ negızgı 10 turistık nysanynyŋ qatarynan oiyp tūryp oryn aldy.
Soŋǧy üş jylda oblystyq biudjetten köl jaǧalauyn abattandyryp, infraqūrylymyn damytu maqsatyna 6,2 milliard teŋge bölıngen. Aldaǧy tört jylda 28 milliard teŋgenıŋ taǧy jetı jobasyn jüzege asyru közdelude. Olardyŋ ışınde sumen qamtu, su tartu, sondai-aq elektr quatyn beru jüielerın salu, köl jaǧalauyn bekıtu jäne Ürjar auylynyŋ äuejaiyn jöndeu jobalary bar.
Bolaşaqta Alaköl jaǧalauy turisterdı jyl on ekı ai qabyldai alatyn därejege jetuı tiıs. Osy maqsatta turistık aimaqta şipajai salu josparlanuda. Reseidıŋ kurortologiia jäne fizioterapiia ǧylymi-zertteu institutynyŋ mamandary köldıŋ şipalyq qasietterıne jan-jaqty taldau jasai kele, onda jyl kölemınde emdeu-sauyqtyru turizmın damytudyŋ äleuetı zor ekenıne taǧy bır märte däleldegen.
Būǧan qosa, jaqyn arada Qazaqstandaǧy medisinalyq turizmde baǧa saiasaty jaǧynan bes baǧyt basymdyqqa ie boluy yqtimal, olar: kardiohirurgiia, neirohirurgiia, buyndardy protezdeu, stomatologiia, ekstrakorporaldy ūryqtandyru. Onyŋ ışındegı üş baǧyt (kardiohirurgiia, neirohirurgiia jäne buyndardy protezdeu) boiynşa Şyǧys Qazaqstandaǧy klinikalardyŋ qyzmetıne jügınuge bolady. Osy tūrǧydan alyp qaraǧanda, oblystyŋ medisinalyq mekemelerı şeteldık klinikalarmen de bäsekelesuge qauqarly. Būl baǧaǧa ǧana emes, qyzmet sapasyna da qatysty.
Mäselen, jürek klapanyn auystyru operasiiasynyŋ qūny AQŞ-ta 130 myŋ dollarǧa teŋ bolsa, medisinalyq turizmde köşbasşy sanalatyn Ündıstanda 10 myŋ dollar şamasynda. Al Qazaqstanda däl osyndai otany 1,6 myŋ dollarǧa jasap beredı. Sondai-aq elımızde buyndarǧa jasalatyn operasiialar da äldeqaida arzan – 4,6 myŋ dollar töŋıregınde. Salystyrmaly türde alyp qaraǧanda, AQŞ-ta mūndai operasiia üşın 160 myŋ, al Ündıstanda toǧyz myŋ dollar töleuıŋız kerek.
Sonymen qatar oblystyŋ onkologiialyq klinikalary da qyzmetı jaǧynan ışkı naryqtaǧy aldyŋǧy oryndarǧa ie.
– Medisinalyq jäne sauyqtyru turizmderın damytsaq, ışkı turizm de alǧa basatyn bolady. Sala nysandary belgılı bır mausymdarda ǧana emes, jyl boiy qyzmet körsete alatyn deŋgeige jetedı. Būǧan qosa qazynaǧa qosymşa kırıs kıredı, öitkenı medisinalyq turistke berıletın chektıŋ qūny kädımgı turistıkınen 1,3 esege qymbat. Medisinalyq turizmnıŋ damuy şipajai-kurorttyq salanyŋ da boiyna qan jügırtetını sözsız. Būl öz kezegınde jaŋa jūmys oryndaryn aşyp, öŋırdıŋ investisiialyq tartymdylyǧyn arttyruǧa jol aşpaq, – deidı oblys äkımı Danial Ahmetov.
«Adyrna» portaly
Ūqsas jaŋalyqtar
