تاجىك جاسوسپىرىمدەرى الەم چەمپيوناتىن جەڭىسپەن باستادى

321

17 جاسقا دەيىنگى تاجىكستان قۇراماسى برازيليادا ءوتىپ جاتقان الەم چەمپيوناتىنىڭ ءبىرىنشى كەزەڭىندە كامەرۋننان كەلگەن قۇرداستارىن جەڭدى. كەزدەسۋ 1-0 ەسەبىمەن تاجىكتەردىڭ پايداسىنا اياقتالدى، دەپ حابارلايدى Soccerway.

ماتچتىڭ ءبىرىنشى تايمىندا تاجىكتەر قورعانىستا جاتىپ، اسا ساق ويناۋعا تىرىستى، كامەرۋندىقتار ءجيى شابۋىلدادى، بىراق قاۋىپتى سوققىنى لەونەل ۆامبا جاسادى، ول تايم بىتۋگە بىرنەشە مينۋت قالعاندا ايىپ الاڭىنا كىرىپ، شوحرۋح كيرگيزبوەۆ قورعاعان قاقپانىڭ ماڭدايشاسىن ءدىر ەتكىزدى.

ەكىنشى تايم باستالا سالىسىمەن، تاجىكستان قۇراماسىنىڭ جاتتىقتىرۋشىسى زاينيددين راحيموۆ شابۋىلعا سەرپىن بەرىپ، كامەراۋندىقتاردىڭ قاقپاسىنا قىسىم جاساۋ ءۇشىن تاعى ءبىر شابۋىلشى رۋستام سويروۆتى ويىنعا قوستى. ارادا التى مينۋت وتكەن سوڭ كامەرۋن قۇراماسىنىڭ قاقپاشىسى مانفرەد ەكوي جاڭا عانا ويىنعا شىققان سويروۆتى شالىپ قۇلاتتى. پەنلتي!  شاريفبەك راحماتوۆ مۇمكىندىكتى ءمۇلت جىبەرمەي، ماتچتا ەسەپ اشتى. فينالدىق ىسقىرىققا جارتى ساعات قالعاندا سويروۆ ءوزى دە گول سوقتى، بىراق تورەشى تاجىك كومانداسىنىڭ گول سالۋ كەزىندە ەرەجە بۇزعانىن بايقاپ، گولدى ساناماي تاستادى. كامەرۋندىقتار دا قاراپ قالماي، كوپ شابۋىلدادى.  قىرعىزبوەۆتىڭ قاقپاسىنا ويىن ساتىندە تۋرا ون سوققى جاسادى، بىراق تاجىك قاقپاشىسى سەنىمدى قيمىلدادى. كەزدەسۋدىڭ 73-مينۋتىندا ەكىنشى سارى قاعازىن العان شۋحرات ەلمۋرودوۆ ويىننان قۋىلدى. بىراق، 10 ويىنشى قالسا دا قورعانىسى سىر بەرمەگەن تاجىكستان جەڭىسكە جەتتى.

«بالالار ءبىزدىڭ تاكتيكامىزدى ءساتتى ورىندادى. اسىرەسە شوحرۋح قاقپامىزدى سەنىمدى قورعادى. فۋتبولدا قاقپاشى - بۇل كوماندانىڭ جارتىسى دەگەن ءسوز. ول وسى ءسوزدىڭ راستىعىن دالەلدەدى. مەن بارلىق تاجىكتەردى وسى جەڭىسىمەن قۇتتىقتايمىن »، - دەدى راحيموۆ ماتچتان كەيىنگى ءباسپاسوز ءماسليحاتىندا.

E توبىنداعى باسقا ماتچتا يسپانيا مەن ارگەنتينا 0: 0 ەسەبىمەن تەڭ ءتۇستى. الەم كۋبوگىنداعى كەلەسى كەزدەسۋ، تاجىكتەر 31 قازاندا يسپاندىقتارعا قارسى وتكىزەدى. كامەرۋن ارگەنتينامەن وينايدى.

الەم چەمپيوناتى برازيليادا 26 قازان مەن 17 قاراشا ارالىعىندا وتەدى. تۋرنيرگە 24 كوماندا قاتىسادى. پلەي-وففتاعى ءار توپتان ەكى ۇزدىك كوماندا شىعادى، سونىمەن قاتار ءۇشىنشى ورىن العان ءتورت ۇزدىك كوماندا شىعادى. تاجىكستان قۇراماسى بۇل تۋرنيردەگى ورتالىق ازيانىڭ جالعىز وكىلى.

تاجىكتەر 2018 جىلعى ازيا چەمپيوناتىندا كۇمىس الىپ،  2019 جىلعى الەم چەمپيوناتىنا جولداما الدى. بۇعان دەيىن تاجىكستان قۇراماسى 2007 جىلى وڭتۇستىك كورەيادا وتكەن جاستار اراسىنداعى الەم چەمپيوناتىنا قاتىسقان بولاتىن. ول كەزدە توپتىق كەزەڭدە تاجىك ويىنشىلارى اقش-تى (4: 3) جەڭدى، بىراق بەلگيادان (0: 1) جانە تۋنيستەن (0: 1) ۇتىلدى.

پىكىرلەر