داستان ساتپاەۆ الەمدەگى ەڭ ۇزدىك جاس فۋتبولشىلاردىڭ قاتارىنا ەندى، دەپ حابارلايدى "ادىرنا" ۇلتتىق پورتالى Sports.ru باسىلىمىنا سىلتەمە جاساپ.
قازاقستاندىق ويىنشى 18 جاسقا دەيىنگى الەمنىڭ ۇزدىك 25 فۋتبولشىسى تىزىمىنە كىرىپ، رەيتينگتە 16–22 ورىن ارالىعىندا ورنالاستى. رەسەيلىك سپورت ساراپشىلارى ساتپاەۆتى «وزگە فۋتبول ءداۋىرىنىڭ وكىلى» دەپ باعالاعان.
مامانداردىڭ پىكىرىنشە، داستان ساتپاەۆ بىرنەشە ماڭىزدى قاسيەتتى بويىنا توعىستىرعان امبەباپ فۋتبولشى. ول دوپتى ءوز ايىپ الاڭىنان قارسىلاستىڭ ايىپ الاڭىنا دەيىن الىپ شىعۋعا، دريبلينگ جاساۋعا، 35 مەتر قاشىقتىقتان سوققى جاساۋعا جانە دوپ ءۇشىن سوڭىنا دەيىن كۇرەسۋگە قابىلەتتى.
Sports.ru پورتالى ساتپاەۆتى ناعىز كوشە فۋتبولىنىڭ وكىلى رەتىندە سيپاتتايدى.
"ساتپاەۆ وزگە فۋتبول ءداۋىرىنىڭ وكىلى. داستان ساتپاەۆ ءبىر بويىنا ءبارىن سىيدىرعان ويىنشى. ول ءوز ايىپ الاڭىنان قارسىلاس قاقپاسىنا دەيىن دوپتى الىپ شىعۋ، قارسىلاستى الداپ ءوتۋ، 35 مەتر قاشىقتىقتان سوققى جاساۋ، دوپ ءۇشىن ايانباي ارپالىسۋ سىندى ىستەردى اتقارا الادى. ساتپاەۆ ءجاي عانا ءرول اتقاراتىن ەمەس، ناعىز ويناي الاتىن كوشە فۋتبولشىسى. سوندىقتان دا الاڭدا قولىنان كەلگەننىڭ ءبارىن جاسايدى. فۋتبولدىڭ ءبىزدىڭ داۋىرىمىزدەگى باتىرلىق ەلشىسى ىسپەتتى. ارينە، جاسى كىشى ويىنشىلارعا ءتان ءالى دە شيكى تۇستارى بار. كەي ساتتە ءبىر قارقىندا تىم كوپ ارەكەت جاسايدى. الايدا ول ءوز الدىنا دەربەس قالىپتاسقان تالانت. ساتپاەۆ پوزيتسيا مەن ويىن جۇيەسىنە كوپ تاۋەلدى ەمەس فۋتبولشىداي اسەر قالدىرادى. ونىڭ سوققىسى ءاردايىم قاۋىپ توندىرەدى. ال قاۋىپتى ايماقتارعا ءوز كۇشىمەن جەتۋدى جاقسى مەڭگەرگەن”، – دەلىنگەن جازبادا.
