مما جۇلدىزى ءارى اكتەر ەركەبۇلان توقتار الداعى جەكپە-جەگىنە دايىندىقتى اقش-تا وتكىزەتىنىن مالىمدەدى، دەپ حابارلايدى "ادىرنا" ۇلتتىق پورتالى.
سپورتشى الەۋمەتتىك جەلىدەگى پاراقشاسىندا مايامي قالاسىنا ۇشاتىن اۋە بيلەتىن راسىمدەپ جاتقان ءساتىن جاريالاپ، 15 قاڭتار مەن 15 ناۋرىز ارالىعىندا امەريكا قۇراما شتاتتارىندا ەكى ايلىق وقۋ-جاتتىعۋ جيىنىن وتكىزەتىنىن ايتتى. ونىڭ سوزىنشە، دايىندىق اقش-تاعى توپ-تيمدەردىڭ بىرىندە وتەدى.
«بىزدە دە مىقتى جاتتىقتىرۋشىلار بار. بىراق دايىندىق تەك جاتتىقتىرۋشىعا عانا بايلانىستى ەمەس. كىممەن بىرگە جاتتىعاتىنىڭ، سەرىكتەستەرىڭنىڭ دەڭگەيى ماڭىزدى. مەن باراتىن زالدا UFC سپورتشىلارى مەن ءتۇرلى ليگالاردىڭ چەمپيوندارى دايىندالادى. وسىنداي ورتادا ادام تەز وسەدى. ال الماتىدا ناقتى مامانداندىرىلعان زال جوق»، – دەدى سپورتشى.
ايتا كەتەيىك، ەركەبۇلان توقتار "قر ەڭبەك سىڭىرگەن قايراتكەرى " اتاعىمەن ماراپاتتالعان ەدى.
