ۇقك قىتايدان قاشىپ كەلگەن قانداستارعا قاتىستى تۇسىنىكتەمە بەردى

294

ءدىلمانوۆتىڭ ايتۋىنشا، قاستەر مۇساحان مەن مۇراگەر ءالىمۇلى ساياسي بوسقىن ەمەس، مەملەكەتتىك شەكارانى بۇزعاندار

 ۇلتتىق قاۋىپسىزدىك كوميتەتى توراعاسىنىڭ ورىنباسارى – شەكارا قىزمەتىنىڭ ديرەكتورى دارحان ءدىلمانوۆ قازاقستان-قىتاي شەكاراسىن زاڭسىز كەسىپ وتكەن ەتنيكالىق قازاقتار قاستەر مۇساحان مەن مۇراگەر ءالىمۇلىنىڭ قازىر بوستاندىقتا ەكەنىن مالىمدەدى، دەپ حابارلايدى Sputnik قازاقستان تىلشىسى.

"شىندىعىنا كەلسەك، ولاردىڭ مەملەكەتتىك شەكارانى قالاي كەسىپ وتكەنى ۇلكەن كۇمان تۋدىرادى. سەبەبى مەملەكەتتىك شەكارانى كەسىپ ءوتۋ وڭاي ەمەس. ەستەرىڭىزدە بولسا، ولار شەكارادان 1 قازاندا وتتىك دەدى. ال بۇل كۇنى ءبىزدىڭ كورشىلەر قىتاي حالىق رەسپۋبليكاسىنىڭ قۇرىلعان كۇنىن اتاپ ءوتتى. تيىسىنشە، بارلىق مەملەكەتتىك قۇرىلىم كۇشەيتىلگەن رەجيمدە جۇمىس ىستەدى", - دەدى ءدىلمانوۆ ءماجىلىس كۋلۋارىندا.

ايتۋىنشا، ەتنيكالىق قازاقتار قازىر بوستاندىقتا، قاماۋعا الىنعان جوق.

"ولار قازىر زايساندا. ولار بىزگە مەملەكەتتىك شەكارانى ناقتى قاي جەردە كەسىپ وتكەنىن كورسەتۋى ءتيىس. وزدەرى تارباعاتاي دەپ وتىر. ءبىز ولاردى تارباعاتايعا اپارامىز، ولار قالاي جانە قايدان كەسىپ وتكەنىن كورسەتەدى", - دەدى شەكارا قىزمەتىنىڭ ديرەكتورى.

ءدىلمانوۆ ولاردىڭ ءبىرى 2006 جىلى مال ۇرلىعى ءۇشىن قازاق-قىتاي شەكاراسىندا ۇستالعانىن مالىمدەدى.

"ولار ءبىزدىڭ اۋماقتا ۇستالىپ، كەيىن قىتاي شەكاراشىلارىنا بەرىلدى. ال ول جاقتا بۇل قىلمىسى ءۇشىن قانداي جازاعا تارتىلعانىن ءوزى ايتىپ بەرەر، مۇمكىن ايتقان دا شىعار", - دەدى ول.

ول مەملەكەتتىك شەكارانى بۇزعاندار قىلمىستىق جاۋاپكەرشىلىككە تارتىلاتىنىن، ەگەر كىناسى دالەلدەنسە، ەكى جىلعا دەيىن باس بوستاندىعىنان ايىرىلۋى مۇمكىن ەكەنىن اتاپ ءوتتى. ال قانداستاردى قىتايعا قايتارىپ-قايتارماۋ زاڭ اياسىندا شەشىلەدى.

 

پىكىرلەر