UQK Qytaıdan qashyp kelgen qandastarǵa qatysty túsinikteme berdi

311

Dilmanovtyń aıtýynsha, Qaster Musahan men Murager Álimuly saıası bosqyn emes, memlekettik shekarany buzǵandar

 Ulttyq qaýipsizdik komıteti tóraǵasynyń orynbasary – shekara qyzmetiniń dırektory Darhan Dilmanov Qazaqstan-Qytaı shekarasyn zańsyz kesip ótken etnıkalyq qazaqtar Qaster Musahan men Murager Álimulynyń qazir bostandyqta ekenin málimdedi, dep habarlaıdy Sputnik Qazaqstan tilshisi.

"Shyndyǵyna kelsek, olardyń memlekettik shekarany qalaı kesip ótkeni úlken kúmán týdyrady. Sebebi memlekettik shekarany kesip ótý ońaı emes. Esterińizde bolsa, olar shekaradan 1 qazanda óttik dedi. Al bul kúni bizdiń kórshiler Qytaı Halyq Respýblıkasynyń qurylǵan kúnin atap ótti. Tıisinshe, barlyq memlekettik qurylym kúsheıtilgen rejımde jumys istedi", - dedi Dilmanov májilis kýlýarynda.

Aıtýynsha, etnıkalyq qazaqtar qazir bostandyqta, qamaýǵa alynǵan joq.

"Olar qazir Zaısanda. Olar bizge memlekettik shekarany naqty qaı jerde kesip ótkenin kórsetýi tıis. Ózderi Tarbaǵataı dep otyr. Biz olardy Tarbaǵataıǵa aparamyz, olar qalaı jáne qaıdan kesip ótkenin kórsetedi", - dedi shekara qyzmetiniń dırektory.

Dilmanov olardyń biri 2006 jyly mal urlyǵy úshin qazaq-qytaı shekarasynda ustalǵanyn málimdedi.

"Olar bizdiń aýmaqta ustalyp, keıin Qytaı shekarashylaryna berildi. Al ol jaqta bul qylmysy úshin qandaı jazaǵa tartylǵanyn ózi aıtyp berer, múmkin aıtqan da shyǵar", - dedi ol.

Ol memlekettik shekarany buzǵandar qylmystyq jaýapkershilikke tartylatynyn, eger kinási dáleldense, eki jylǵa deıin bas bostandyǵynan aıyrylýy múmkin ekenin atap ótti. Al qandastardy Qytaıǵa qaıtaryp-qaıtarmaý zań aıasynda sheshiledi.

 

Pikirler