الماتىدا بەلگىلى بيزنەسمەن قايرات ساتىبالدىنىڭ بۇرىنعى ايەلى گۇلميرا ساتىبالدىنىڭ ىسىنە قاتىستى سوت باستالدى. وعان بيزنەستى رەيدەرلىك جولمەن تارتىپ الدى جانە ادام ۇرلادى دەگەن ايىپتار تاعىلعان، دەپ حابارلايدى "ادىرنا" ۇلتتىق پورتالى كتك تەلەارناسىنا سىلتەمە جاساپ.
قايرات ساتىبالدىنىڭ ءوزى دە وتكەن جىلى اسا ءىرى كولەمدە قارجى جىمقىرعانى ءۇشىن 6 جىل جازا ارقالاعان. ايىپتالۋشى ورىندىعىندا گۇلميرا ساتىبالدىنىڭ جۇرگىزۋشىسى مەن كومەكشىسى دە بار. تەرگەۋ مالىمەتىنشە، ولار ەكى كاسىپكەردى بوپسالاپ، بيزنەستەگى ۇلەستەرىن ءوز اتىنا جازدىرعان. جابىرلەنۋشىنىڭ ءبىرى — بايان الاگوزوۆانىڭ كۇيەۋى تۇرسىن الاگوزوۆ. ال ەكىنشىسى ايگۇل مەكەشوۆاعا كۇش كورسەتىپ ميلليارد تەڭگە تۇراتىن كومپانياسىن 375 مىڭ تەڭگەگە ساتىپ العان دەيدى تەرگەۋشىلەر. كەلتىرىلگەن شىعىن كولەمى 6 ملرد تەڭگەدەن اسىپ جىعىلادى.
بىراق ايىپتالۋشى تاراپتىڭ ادۆوكاتتارى الاگوزوۆ ءوز كومپانياسىنداعى ۇلەسىن ەكس-جۇبايىنىڭ اتىنا ءوتىپ كەتپەۋ ءۇشىن قاساقانا وزگە ادامعا راسىمدەگەنىن العا تارتۋدا. سوندىقتان ءىستى باس پروكۋراتۋرانىڭ تەرگەۋىنە قايتارىلعانىن قالايدى.
سونداي-اق زاڭ تالاپتارىنىڭ ورەسكەل بۇزىلعانىن ايتقان ادۆوكاتتار سۋديادان بۇلتارتپاۋ شاراسىن ۇيقاماققا وزگەرتۋدى جانە ءىستى استانا قالاسىنا جىبەرۋدى دە سۇرادى. سۋديا ايىپتالۋشىنى قاماۋدان بوساتقان جوق. بىراق قىلمىستىق ءىس بۇدان بىلاي ەلوردادا قارالاتىن بولدى.
«ساتىبالدى گۇلميرا 2020 جىلدىڭ ماۋسىمىنان قىركۇيەك ايىنا دەيىن الاگوزوۆكە مورالدىق-پسيحولوگيالىق قىسىم كورسەتىپ، Galanz Bottlers اق ۇلەسىنىڭ 45,25 پايىزىن ءوز اتىنا جازدىرتقان. ساتىبالدى گۇلميرا، باتىرشاەۆ پەن وتەبەكوۆ ۇيىمداسىپ، مەكەشوۆانى الماتى وبلىسى جاندوسوۆ اۋىلىنا كۇشپەن الىپ كەتكەن. سوسىن وعان قوقان-لوققى مەن پسيحولوگيالىق قىسىم كورسەتىپ، الدىن الا دايىندالعان قۇجاتتارعا قول قويدىرتقان»، - دەدى پروكۋرور اكرومات مۇحتاروۆ.
"ادىرنا" ۇلتتىق پورتالى
