ۇلىتاۋ وبلىسىنىڭ ابزال جاندارى ماراپاتتالدى

دەنساۋلىق ساقتاۋ قىزمەتكەرلەرىنىڭ كاسىبي مەرەكەسىنە وراي ۇلىتاۋ وبلىسىنىڭ ابزال جاندارى ماراپاتتى بولدى. سالتاناتتى ءىس-شاراعا ارنايى قاتىسقان ءوڭىر باسشىسى داستان رىسپەكوۆ سالا ۇزدىكتەرىن ماراپاتتاپ، ەڭبەكتەرىنە جەمىس تىلەدى. «ادام ومىرىنەن ارتىق قىمبات ەشتەڭە جوق. ال سول ءومىر مەن دەنساۋلىقتى ساقتاۋ جولىندا ۋاقىتپەن ساناسپاي ەڭبەك ەتىپ جۇرگەن سىزدەردىڭ قىزمەتتەرىڭىز – ەرەكشە قۇرمەت پەن العىسقا لايىق»-دەدى وبلىس اكىمى ءوز قۇتتىقتاۋىندا. مەرەكە قارساڭىندا ۇيىمداستىرىلعان جيىندا وبلىسىمىزدىڭ بىرقاتار دارىگەرى قر دەنساۋلىق ساقتاۋ مينيسترلىگىنىڭ «ەڭبەك ارداگەرى» مەدالىمەن، «دەنساۋلىق ساقتاۋ ىسىنە قوسقان ۇلەسى ءۇشىن» توسبەلگىسىمەن، «دەنساۋلىق ساقتاۋ ءىسىنىڭ ۇزدىگى» توسبەلگىسىمەن، دەنساۋلىق ساقتاۋ مينيسترلىگىنىڭ قۇرمەت گراموتاسىمەن، ۇلىتاۋ وبلىسى اكىمىنىڭ العىسحاتىمەن، دەنساۋلىق ساقتاۋ مينيسترلىگىنىڭ العىسحاتىمەن، ۇلىتاۋ وبلىسىنىڭ قۇرمەت گراموتاسىمەن ماراپاتتالدى. سونىمەن قاتار سالا ۇزدىكتەرىنە «AQNIET» سالالىق كاسىپوداعىنىڭ «كاسىپوداققا سىڭىرگەن ەڭبەگى ءۇشىن» توسبەلگىسى، «SENIM» دەنساۋلىق ساقتاۋ جۇيەسى جۇمىسكەرلەرىنىڭ سالالىق كاسىپتىك وداعى» رەسپۋبليكالىق قوعامدىق بىرلەستىگىنىڭ ۇزدىگى» توسبەلگىسى تابىس ەتىلدى. سالتاناتتى ءىس-شارادا ءوڭىردىڭ دەنساۋلىق ساقتاۋ ىسىنە ايرىقشا ۇلەس قوسىپ جۇرگەن تۇلعالارىنا ۇلىتاۋ وبلىسى اكىمىنىڭ ارنايى نوميناتسيالى سىيلىقتارى دا تارتۋ ەتىلدى. اتاپ ايتار بولساق، «ۇزدىك پەدياتر»، «ۇزدىك تەراپەۆت»، «ۇزدىك حيرۋرگ»، «ۇزدىك سانيتارلىق دارىگەر»، «دەنساۋلىق ساقتاۋ سالاسىنداعى ۇزدىك مەنەدجەر»، «ستاتسيوناردىڭ ۇزدىك دارىگەرى»، «كاسىبىنە ادالدىعى ءۇشىن»، «ءبىلىم بەرۋ مەكەمەلەرىندەگى ۇزدىك مەديتسينا قىزمەتكەرى»، «ۇزدىك اكۋشەر-گينەكولوگ»، «ۇزدىك جالپى تاجىريبەلى دارىگەر»، «ۇزدىك اۋىل دارىگەرى»، «ۇزدىك اكۋشەركا»، «ۇزدىك فەلدشەر»، «العاشقى مەديتسينالىق-سانيتارلىق كومەكتىڭ ۇزدىك مەدبيكەسى»،«ستاتسيوناردىڭ ۇزدىك مەدبيكەسى» انىقتالدى. ال «جىل دارىگەرى» ءارى ءبىر ميلليون تەڭگەلىك سەرتيفيكاتتى جەزقازعان قالاسىنىڭ وبلىستىق كوپبەيىندى اۋرۋحاناسىنىڭ پەدياتريالىق قىزمەتتىڭ مەڭگەرۋشىسى قاۋكەر جاكسىگيلدينوۆا ۇلىتاۋ وبلىسى اكىمىنىڭ قولىنان الدى. ءىس-شارا سالا ماماندارىنا ارنالعان كونتسەرتتىك باعدارلامامەن جالعاستى.