2 جەلتوقساندا سوتتا ءتىس دارىگەرگە قاتىستى تىڭدالىم ءوتتى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
استاناداعى ەمحانالاردىڭ بىرىندە ءتىسىن ەمدەتكەن كىشكەنتاي قىز كوز جۇمدى. انەسەزيولوگتىڭ ۇستىنەن قىلمىستىق ءىس قوزعالعان.
دارىگەردىڭ ۇستىنەن دە تەكسەرىس جۇرگىزىلىپ، الايدا ونىڭ كىناسى جوق دەپ تانىلعان. 2 جەلتوقسان كۇنى قالالىق سوتتا قىزدىڭ ءتىسىن ەمدەگەن دارىگەر كۋالىك ەتتى.
ول ءوز سوزىندە 23 قازان ناۋقاستىڭ اناسىنا كەڭەس جۇرگىزگەنىن، سول كەزدە بالادا 11 كاريوزدىق ءتىس انىقتالعانىن ايتتى. ول اتا-انانى الدىن الا تەكسەرۋدەن ءوتىپ، جالپى انەستەزياعا دايىندالۋ ءۇشىن تالداۋلار تاپسىرۋ قاجەتتىگى تۋرالى حابارلاعان.
دارىگەردىڭ ايتۋىنشا، 30 قازاندا تىستەردى تازالاۋ جانە رەنتگەندىك دياگنوستيكادان كەيىن قوسىمشا 7 كاريوزدىق ءتىس انىقتالىپ، ەمدەلەتىن تىستەر سانى 18-گە جەتكەن.
ء"بىز اناسىنا وزگەرگەن ەم جوسپارىن كورسەتتىك، كابينەتتىڭ ىشىندە ءار ءتىستى جەكە كورسەتىپ، اۋىزشا كەلىسىم الدىق. بۇل كەزدە بالا ناركوز استىندا بولعان", – دەدى ستوماتولوگ. بارلىق پروتسەدۋرالار كۋاگەرلەر قاتىسىندا، سونىڭ ىشىندە كومەكشى، انەستەزيولوگ جانە انەستەزيولوگ كومەكشىسىنىڭ قاتىسۋىمەن جۇرگىزىلگەنى اتاپ ءوتىلدى.
پروكۋرور ەركەبۇلان شالقاروۆ انادان راسىمەن كەلىسىم بەرىلگەنىن سۇراعاندا، ايەل اۋىزشا كەلىسىم بەرىلگەنىن راستاپ، الايدا الاڭداۋشىلىق بىلدىرگەنىن ايتتى.
"بالاعا 18 ءتىس ەمدەلۋى قاجەت ەكەنىن ايتقاندا، ءبىز بىرنەشە رەت پروتسەدۋرانىڭ قاۋىپسىزدىگىن سۇرادىق. سول كەزدە كەلىسىم بەردىك", – دەدى ول.
دارىگەر جالپى انەستەزيا كەزىندە ەشقانداي الاڭداتاتىن جاعداي بولماعانىن، ءتورت ساعاتقا سوزىلعان ەمنىڭ ستاندارتتى بولعانىن اتاپ ءوتتى. سونىمەن قاتار، جالپى ناركوزدى قولدانۋ تەك انەستەزيولوگتىڭ شەشىمىنە بايلانىستى ەكەنىن، جانە «سەۆوران» گازىنىڭ ەڭ قاۋىپسىز انەستەزيا ءتۇرى ەكەنىن ايتتى.
سونداي-اق، ستوماتولوگ جالپى انەستەزيامەن بالالاردى ەمدەۋ قازاقستانداعى ستاندارتقا سايكەس جۇرگىزىلگەنىن، 4 جاسقا دەيىنگى بالالاردا كوپ ءتىستى كاريەس بولعان جاعدايدا ءبىر سەانستا ەمدەۋ قاۋىپسىز ەكەنىن جەتكىزدى.
سوت پروتسەسى جالعاسۋدا، كەلەسى وتىرىستا كۋاگەرلەردىڭ جاۋاپتارى تىڭدالاتىن بولادى.
