الماتىداعى №12 جەدەل مەديتسينالىق جاردەم قوسالقى ستانتسياسىنىڭ ماماندارى ءبىر تاۋلىكتە جۇزدەگەن شاقىرتۋ قابىلداپ، ادام ءومىرىن ساقتاپ قالۋ ءۇشىن كۇرەسەدى. «ادىرنا» ۇلتتىق پورتالى اق حالاتتىلاردىڭ ءبىر اۋىسىمىنا قاتىسىپ، ولاردىڭ جۇمىسىنىڭ قىر-سىرىمەن تانىستى.
№12 جەدەل مەديتسينالىق جاردەم قوسالقى ستانتسياسىندا 19 بريگادا مەن 257 قىزمەتكەر بار. ولار ءتورت اۋىسىممەن جۇمىس ىستەيدى. مۇنداعى تاڭعى اۋىسىم ساعات 7:30-دان باستالادى. قىزمەتكەرلەر جۇمىسقا كەلگەن بويدا دەنە قىزۋىن ولشەپ، ارنايى كيىمدەرىن كيەدى. العاشقى مىندەتتەردىڭ ءبىرى – مەديتسينالىق قۇرال-جابدىقتاردىڭ تولىقتىعى مەن جارامدىلىعىن تەكسەرۋ. سەبەبى شۇعىل شاقىرتۋ تۇسكەندە ءار مينۋت قىمبات.
فەلدشەر ماعجان ءابدىلاشىممۇلىنىڭ ايتۋىنشا، مەديتسينالىق سومكەدە ناۋقاسقا العاشقى كومەك كورسەتۋگە قاجەتتى قۇرالدار بولۋى كەرەك. سوندىقتان ماماندار ءار اۋىسىم الدىندا جابدىقتاردى تۇگەلدەپ، ولاردىڭ جۇمىسقا جارامدىلىعىنا كوز جەتكىزەدى.
ء«بىر سومكەنىڭ ءوزى 10 كەلىنى قۇرايدى. ونىڭ ىشىندەگى ءدارى-دارمەكتەردى تۇگەلدەي تەكسەرىپ، شاقىرتۋدان كەيىن ورنىن تولىقتىرىپ وتىرامىز»، - دەيدى مامان.
بريگادانىڭ دايىندىعى مۇنىمەن شەكتەلمەيدى. كولىكتىڭ ىشىندەگى مەديتسينالىق اپپاراتتار دا تەكسەرىلەدى. فەلدشەر اياجان دارحانقىزى ەلەكتروكارديوگراف، وكپەنى جاساندى جەلدەتۋ اپپاراتى جانە باسقا دا قۇرىلعىلاردىڭ قىزمەتىن ءتۇسىندىردى. بۇل جابدىقتار ناۋقاستىڭ جاعدايىن باعالاپ، شۇعىل مەديتسينالىق كومەك كورسەتۋگە مۇمكىندىك بەرەدى.
«كولىكتىڭ ىشىندەگى ەڭ قىمبات ءارى ەڭ قاجەت قۇرىلعى – لۋكاس اپپاراتى. جۇرەك كەنەتتەن توقتاعاندا وسىمەن ماسساج جاسايدى. بۇل قازىر ادامداردىڭ ورنىن الماستىرىپ وتىر. ءجيى قولداناتىن قۇرىلعىلارىمىزدىڭ ءبىرى”، - دەيدى اياجان.
شاقىرتۋدى سالالايتىن – ديسپەتچەر
جەدەل جاردەمنىڭ جۇمىسى كولىك قوزعالعان ساتتەن ەمەس، تەلەفون قوڭىراۋىنان باستالادى. شاقىرتۋدى قابىلدايتىن ديسپەتچەر ناۋقاستىڭ جاعدايى تۋرالى مالىمەت جيناپ، قاجەتتى اقپاراتتى ءتيىستى بريگاداعا جەتكىزەدى.
ديسپەتچەر ايكەرىم عابيتقىزىنىڭ سوزىنشە، قوڭىراۋ كەزىندە ناۋقاستىڭ اتى-ءجونىن جانە جاعدايىنا قاتىستى ماڭىزدى مالىمەتتەردى انىقتاۋ قاجەت. الىنعان اقپارات مامانداردىڭ شاقىرتۋعا دايىندالۋىنا كومەكتەسەدى.
ء«بىز تاۋلىگىنە 300-گە جۋىق شاقىرتۋ قابىلدايمىز. ناۋقاس بىزگە حابارلاسقاننان كەيىن، كاتەگورياعا قاراي بريگادا جىبەرەمىز. ءبىر مەن ەكىنشى كاتەگورياعا كوپ باسىمدىلىق بەرىلەدى. ويتكەنى، ول ساناتتاعى ناۋقاستارعا ەپيلەپسيا، جۇرەك تالماسى، سوزىلمالى اۋرۋلارى بار نەمەسە وتە اۋىر جاعدايداعى ناۋقاستار جاتادى. شاقىرتۋ كوپ بولعان كەزدە، ساناتتارىنا قاراي، بريگادالاردى ءبولىپ وتىرامىز»، - دەيدى ايكەرىم.
العاشقى شاقىرتۋ – التى ايلىق ءسابي
فەلدشەرلەرمەن بىرگە العاشقى شاقىرتۋعا دا باردىق. بۇل جولى مەديتسينالىق كومەك التى ايلىق سابيگە قاجەت بولدى. بالا توسەكتەن قۇلاپ كەتكەن. بريگادا قاجەتتى قۇرالدارىن الىپ، وقيعا ورنىنا دەرەۋ اتتاندى.
ماماندار بالانىڭ جاعدايىن باعالاپ، العاشقى كومەك كورسەتتى. كەيىن ءسابيدى بالالار اۋرۋحاناسىنا جەتكىزدى.
ءار شاقىرتۋدىڭ ءوز ەرەكشەلىگى بار. بىرىندە ناۋقاسقا شۇعىل كومەك قاجەت بولسا، ەندى بىرىندە ونىڭ جاعدايىن باعالاپ، ءارى قاراي ەم الۋىنا جاعداي جاساۋ ماڭىزدى. سوندىقتان مەديتسينا قىزمەتكەرلەرى ءارتۇرلى جاعدايعا دايىن بولۋى كەرەك.
«جەدەل جاردەمگە جول بەرمەيتىندەر بار»
جەدەل جاردەم بريگاداسىنىڭ جۇمىسىندا جۇرگىزۋشىنىڭ ءرولى دە ەرەكشە. ول مەديتسينا قىزمەتكەرلەرىن وقيعا ورنىنا مۇمكىندىگىنشە جىلدام ءارى قاۋىپسىز جەتكىزۋگە ءتيىس. قالا كوشەلەرىندەگى قوزعالىس، كەپتەلىس پەن شاقىرتۋدىڭ شۇعىلدىعى جۇرگىزۋشىدەن مۇقياتتىلىق پەن كاسىبيلىكتى تالاپ ەتەدى.
جەدەل جاردەم كولىگىنىڭ جۇرگىزۋشىسى ماجيت امرۋللاۇلى ءۇشىن دە ءار شاقىرتۋ – ۇلكەن جاۋاپكەرشىلىك.
«قازىر جۇرگىزۋشىلەر جەدەل جاردەم كولىگىنە جول بەرۋدى مىندەت دەپ قاراپ، قالىپتاستىرىپ العان. بىراق كەيدە مۋزىكاسىن قاتتى قوسىپ العان جاستار بايقاماي قالىپ جاتادى. سيرەنانى قوسىپ قويساق تا، ەستىمەي، جول بەرمەي وتەتىندەر بار. امال جوق، ولاردى كۇتۋگە تۋرا كەلەدى. دەگەنمەن ءار مينۋت بىزگە قىمبات»، - دەيدى ماجيت امرۋللاۇلى.
اۋىسىم اراسىنداعى دەمالىس ۋاقىتى ناقتى جوسپارعا باعىنا بەرمەيدى. بريگادا ءبىر شاقىرتۋدان ورالعان سوڭ كەلەسى مەكەنجايعا قايتا اتتانۋى مۇمكىن.
ستانتسياداعى تىنىشتىق تا ۇزاققا سوزىلمايدى. كەزەكتى قوڭىراۋ ءتۇسىپ، ماماندار تاعى دا جولعا دايىندالادى. ءبىز دە بريگادانىڭ جۇمىسىن باقىلاپ جۇرگەندە، ولاردىڭ ءبىر شاقىرتۋدان ەكىنشىسىنە قالاي اۋىساتىنىن كوردىك. ەكىنشى شاقىرتۋدا ەس-ءتۇسسىز جاتقان ەر ادامعا بارىپ، جانۇشىرا كومەك كورسەتكەن مامانداردىڭ قىزمەتىنە كۋا بولدىق.
«ەڭ اۋىرى – ءولىم جاعدايىن ەستىرتۋ»
جەدەل جاردەم قىزمەتكەرلەرىنىڭ دەنى – جاستار. سولاردىڭ ءبىرى – 24 جاستاعى فەلدشەر ماعجان ءابدىلاشىمۇلى. ول جۇمىسقا ورنالاسقان بەس جىل ىشىندە ءتۇرلى جاعدايعا تاپ بولعان. ونىڭ ىشىندە ءومىر مەن ءولىم اراسىندا جاتقان ناۋقاستارعا كومەك كورسەتۋ جانە ايى-كۇنى جەتكەن ايەلدى بوساندىرۋ دا بار.
«مەن وسىدان ءبىر-ەكى جىل بۇرىن ەگىز قىزداردىڭ ومىرگە كەلۋىنە سەبەپشى بولىپ، ولاردىڭ كىندىك اكەسى اتاندىم. العاش رەت مۇنداي شاقىرتۋعا بارىپ تۇرسام دا، جاۋاپكەرشىلىكتى سەزىنىپ، بار كۇشىمدى سالدىم. مۇلدە ۇمىتپايمىن. باسقا دا ءتۇرلى شاقىرتۋلار بولىپ تۇرادى. قانداي شاقىرتۋ تۇسەدى، سوعان جىبەرەدى، تاڭدامايمىز. ەڭ اۋىرى – ءولىم جاعدايلارىن ەستىرتۋ، وتە قيىن»، - دەيدى ماعجان.
مۇنداي ساتتەر ماماننان تەك كاسىبي ءبىلىمدى عانا ەمەس، سابىر مەن جىلدام شەشىم قابىلداۋدى دا تالاپ ەتەدى.
ء«بىز ءوزىمىزدىڭ قاۋىپسىزدىگىمىز ءۇشىن 227 بۇيرىق بويىنشا اياق كيىمىمىزدى شەشىپ كىرمەيمىز. ونى كەي ادامدار تۇسىنە بەرمەيدى. كەيدە اگرەسسيا كورسەتەتىن دە ناۋقاستار بار. دەگەنمەن، ناۋقاستارعا كومەك كورسەتىپ، ۇزىلگەن ءۇمىتىن جالعاي السام، ماعان سول كۇش بەرەدى. ءبىر سوزبەن ايتقاندا، ادامنىڭ ءومىرى مەن ءولىمىنىڭ اراسىنداعى كوپىردەيمىز»، - دەيدى دارىگەر.
جەدەل جاردەم قىزمەتكەرلەرىنىڭ جۇمىسى سىرت كوزگە كولىككە ءمىنىپ، شاقىرتۋعا بارۋمەن عانا شەكتەلەتىندەي كورىنۋى مۇمكىن. الايدا ءار ساپاردىڭ الدىندا دايىندىق، ءار شاقىرتۋدىڭ ارتىندا جاۋاپكەرشىلىك، ال ءار ناۋقاستىڭ جاعدايىندا جەكە شەشىمدى قاجەت ەتەتىن ساتتەر بار.
ءبىر كۇن. بىرنەشە شاقىرتۋ. سان ءتۇرلى تاعدىر. №12 جەدەل مەديتسينالىق جاردەم قوسالقى ستانتسياسىنداعى ءبىر اۋىسىم بىزگە وسى ماماندىقتىڭ كۇندەلىكتى تىنىسىن كورسەتتى. ال اق حالاتتىلار ءۇشىن بۇل – ۇيرەنشىكتى جۇمىس ىرعاعى عانا ەمەس، ادام ومىرىنە جاۋاپ بەرەتىن ۇلكەن مىندەت.
دانا نۇرمۇحانبەت
“ادىرنا” ۇلتتىق پورتالى
