مەملەكەت باسشىسى قاسىم-جومارت توقاەۆ پرەمەر-مينيستر ولجاس بەكتەنوۆتىڭ بيىلعى قاڭتار–ماۋسىم ايلارىنداعى الەۋمەتتىك-ەكونوميكالىق دامۋ قورىتىندىلارى جانە ەكونوميكانى ودان ءارى ءارتاراپتاندىرۋ جوسپارلارى تۋرالى ەسەبىن تىڭدادى. بۇل تۋرالى اقوردا جازدى، دەپ حابارلايدى "ادىرنا".
«پرەمەر-ءمينيستردىڭ مالىمەتىنشە، جارتىجىلدىق قورىتىندىسى بويىنشا جالپى ىشكى ءونىمنىڭ ء(جىو) ءوسىمى 4,1%-دى قۇرادى. ەكونوميكا قۇرىلىمىنداعى وڭدەۋ ونەركاسىبىنىڭ ۇلەسى 9,8%-عا، كولىك سالاسى – 7,1%-عا، قۇرىلىس – 15,2%-عا ءوستى. سونداي-اق ساۋدادا – 5,7%، اۋىل شارۋاشىلىعىندا – 4,4%، بايلانىس قىزمەتتەرىندە – 4,3% ءوسىم تىركەلدى. نەگىزگى كاپيتالعا سالىنعان ينۆەستيتسيالار كولەمى 9,5 ترلن تەڭگەگە جەتتى، ونىڭ ىشىندە جەكە ينۆەستيتسيالار اعىنى 21,4%-عا ارتتى»، – دەلىنگەن اقوردانىڭ دۇيسەنبى كۇنگى حابارلاماسىندا.
ولجاس بەكتەنوۆ ۇلتتىق ەكونوميكا قۇرىلىمىن نىعايتۋ باعىتىنداعى جۇمىستار تۋرالى باياندادى.
«بيىل وڭدەۋ ونەركاسىبىندە جالپى قۇنى 1,7 ترلن تەڭگە بولاتىن 200 ينۆەستيتسيالىق جوبا ىسكە قوسىلىپ، 17 مىڭ تۇراقتى جۇمىس ورنى اشىلادى»، – دەدى پرەمەر-مينيستر.
سونداي-اق ۇكىمەت باسشىسى ءىرى اۆتوجول جوبالارىنىڭ جۇزەگە اسىرىلۋى، استانا قالاسىندا ەكىنشى اۋەجاي مەن Tarlan Astana جوباسىنىڭ ەكىنشى كەزەڭىن سالۋ جوسپارلارى تۋرالى اقپارات بەردى.
«قۇرىلىس سالاسىندا پايدالانۋعا بەرىلەتىن تۇرعىن ءۇي كولەمى 20 ملن شارشى مەترگە جەتكىزىلەدى. اۋىل شارۋاشىلىعىندا ءوندىرىس كولەمى 15 ترلن تەڭگەنى قۇرادى، ەگىس القابى 23,8 ملن گەكتارعا دەيىن ۇلعايدى. اگرارلىق سەكتوردى قولداۋعا 1 ترلن تەڭگە ءبولىندى. بۇل رەتتە بيۋدجەتتەن بولىنگەن ءاربىر 1 تەڭگەگە 6,5 تەڭگە جەكە ينۆەستيتسيا تارتىلدى»، – دەدى ولجاس بەكتەنوۆ.
مەملەكەت باسشىسىنا حالىق تابىسىن ارتتىرۋ جونىندەگى كەشەندى جوسپاردىڭ جۇزەگە اسىرىلۋى جانە ينفلياتسيا دەڭگەيىن تومەندەتۋ بويىنشا قابىلدانىپ جاتقان شارالار تۋرالى باياندالدى. ماۋسىم ايىندا جىلدىق ينفلياتسيا دەڭگەيى 10,3%-دى قۇرادى.
پرەزيدەنتكە الەۋمەتتىك جانە كوشى-قون ساياساتىن جەتىلدىرۋدىڭ قازىرگى ناتيجەلەرى، سونداي-اق جۇمىسپەن قامتۋدى ىنتالاندىرۋ ارقىلى الەۋمەتتىك قولداۋ تەتىكتەرىنىڭ تيىمدىلىگىن ارتتىرۋ جونىندەگى تاسىلدەر تانىستىرىلدى. ءتيىمسىز الەۋمەتتىك تولەمدەردى وڭتايلاندىرۋ ناتيجەسىندە جىل سايىن 800 ملرد تەڭگەدەن استام قاراجات ۇنەمدەلمەك.
كەزدەسۋ بارىسىندا الداعى جىلىتۋ ماۋسىمىنا دايىندىق ماسەلەسىنە ەرەكشە نازار اۋدارىلدى.
«وتكەن جىلىتۋ ماۋسىمىنىڭ قورىتىندىسى بويىنشا بەس جىلۋ ەلەكتر ورتالىعى (جەو) تاۋەكەلدىڭ «قىزىل» ايماعىنان شىعارىلدى، تاعى ءۇش جەو «جاسىل» ايماققا كوشىرىلدى. بيىل توعىز ەنەرگوبلوك، 55 قازاندىق جانە 51 تۋربينا قايتا جاڭعىرتىلىپ جاتىر. بۇل ماقساتقا 384 ملرد تەڭگە ءبولىندى. «ەنەرگەتيكا جانە كوممۋنالدىق سەكتورلاردى جاڭعىرتۋ» ۇلتتىق جوباسى اياسىندا جىل سوڭىنا دەيىن 12 مىڭ شاقىرىم ينجەنەرلىك جەلى جوندەلەدى»، – دەلىنگەن حابارلامادا.
سونىمەن قاتار ولجاس بەكتەنوۆ پرەزيدەنت تاپسىرمالارىنىڭ ورىندالۋى، تسيفرلاندىرۋ جانە ۇلتتىق جاساندى ينتەللەكت ينفراقۇرىلىمىن دامىتۋ جونىندە باياندادى.
«الەمدىك IT كوشباسشىلارىمەن بىرلەسىپ قۋاتتىلىعى 250 مۆت بولاتىن ينفراقۇرىلىم جاساقتالۋدا. تارتىلعان شەتەلدىك ينۆەستيتسيا كولەمى 10 ملرد اقش دوللارىنان استى»، – دەدى ۇكىمەت باسشىسى.
پرەزيدەنتكە تۋريزم ينفراقۇرىلىمىن جاڭعىرتۋ جۇمىستارى تۋرالى دا اقپارات بەرىلدى.
«الماتى تاۋ كلاستەرىن دامىتۋ تۋريزم سالاسىنىڭ ءجىو-دەگى ۇلەسىن ارتتىرادى. Almaty SuperSki جوباسى بەلسەندى قۇرىلىس كەزەڭىندە. ۇزىندىعى 60 شاقىرىم بولاتىن جاڭا شاڭعى تراسسالارى تاۋلىگىنە 10 مىڭ ادامعا دەيىن قابىلداۋعا مۇمكىندىك بەرەدى. نىساندى 2028 جىلدىڭ جەلتوقسانىندا ىسكە قوسۋ جوسپارلانعان. سونىمەن قاتار «بولاشاق ويىندارى – 2026» حالىقارالىق جارىسىن وتكىزۋگە دايىندىق اياقتالۋعا جاقىن»، – دەلىنگەن حابارلامادا.
سونداي-اق مەملەكەت باسشىسىنا جاڭا كونستيتۋتسيانى ىسكە اسىرۋ بويىنشا قابىلدانىپ جاتقان شارالار تۋرالى باياندالدى.
«زاڭنامانى نەگىزگى زاڭعا سايكەستەندىرۋ، «ادىلەتتى قازاقستان» جانە «زاڭ مەن ءتارتىپ» قاعيداتتارىن نىعايتۋ، الەۋمەتتىك ساياساتتى جەتىلدىرۋ، الاتاۋدى جەدەل داميتىن قالا رەتىندە دامىتۋعا قۇقىقتىق نەگىز قالىپتاستىرۋ، سونداي-اق «تازا قازاقستان» باستاماسىن ىلگەرىلەتۋ باعىتىندا جۇمىستار جۇرگىزىلىپ جاتىر»، – دەپ حابارلادى اقوردا.
كەزدەسۋ قورىتىندىسى بويىنشا قاسىم-جومارت توقاەۆ ەلدىڭ تۇراقتى ءارى قارقىندى دامۋىن قامتاماسىز ەتۋ جونىندەگى جۇيەلى جۇمىستى جالعاستىرۋدى تاپسىردى.
ۇكىمەتكە الەۋمەتتىك جانە ينفراقۇرىلىمدىق نىسانداردى اۋقىمدى كولەمدە سالۋ باعدارلاماسىن ىسكە اسىرۋدى باستاۋ جۇكتەلدى. بۇل باعدارلاما الداعى ۋاقىتتا ەلىمىزدىڭ بارلىق وڭىرىندە ازاماتتاردىڭ ءومىر ءسۇرۋ ساپاسىن ايتارلىقتاي جاقسارتۋعا باعىتتالعان. اسىرەسە، زاماناۋي دەنساۋلىق ساقتاۋ نىساندارىن سالۋعا باسىمدىق بەرىلەدى.
