قازاقستاندا ورتاشا زەينەتاقى مەن بازالىق زەينەتاقى تولەمى قوسا ەسەپتەگەندە 105 مىڭ تەڭگەدەن استى. جىل باسىنان بەرى جالپى 1,2 ترلن تەڭگەدەن استام زەينەتاقى تولەنگەن. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى مالىمدەدى، دەپ حابارلايدى “ادىرنا” ۇلتتىق پورتالى.
مينيسترلىك دەرەگىنشە، بيىلعى مامىردا رەسپۋبليكالىق بيۋدجەتتەن زەينەتاقى تولەمدەرىنە 235,4 ملرد تەڭگەدەن اسا، ونىڭ ىشىندە بازالىق زەينەتاقىعا – 71,3 ملرد تەڭگە، ىنتىماقتى زەينەتاقىعا 163,2 ملرد تەڭگە ءبولىنىپتى.
“1 ماۋسىمداعى جاعداي بويىنشا زەينەتكەرلەر سانى 2 ملن 246 مىڭنان استى. زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن قوسا ەسەپتەگەندە) 105 189 تەڭگە بولدى”، - دەلىنگەن حابارلامادا.
ەگەر ازاماتتىڭ زەينەتاقى جۇيەسىندەگى ءوتىلى 10 جىل نەمەسە ودان از بولسا، سونداي-اق ەگەر مۇلدە جوق بولسا، بازالىق زەينەتاقى ەڭ تومەنگى كۇنكورىس دەڭگەيىنىڭ 54 پاي ىزىن قۇرايدى. سودان كەيىن 10 جىلدان اسقان ءار جىل ءۇشىن ونىڭ مولشەرى 2 پايىزعا ارتادى. ال ەگەر ەڭبەك ءوتىلى 20 جىل بولسا، بازالىق زەينەتاقى تومەنگى كۇنكورىس دەڭگەيىنىڭ 74 پايىزىن، 30 جىل بولسا، 94 پايىزىن قۇرايدى. ەڭبەك ءوتىلى 33 جىل نەمەسە ودان كوپ بولسا، كۇنكورىس دەڭگەيىنىڭ ەڭ جوعارعى مولشەرىندە بەلگىلەنەدى.
ەگەر ءبىر اي ىشىندە مىندەتتى زەينەتاقى جارنالارى بىرىڭعاي جيناقتاۋشى زەينەتاقى قورىنا بىرنەشە رەت اۋدارىلسا، جيناقتاۋشى جۇيەگە قاتىسۋ مەرزىمى ءبىر ايدى قۇرايدى.
وسىلايشا مىندەتتى زەينەتاقى جارنالارى نەعۇرلىم تۇراقتى جانە تولىق كولەمدە اۋدارىلسا، زەينەت جاسىنا جەتكەندە بازالىق زەينەتاقى تولەمدەرىنىڭ مولشەرى سوعۇرلىم كوپ بولادى.
ءوز كەزەگىندە ازاماتتىڭ جاسىنا بايلانىستى زەينەتاقى تولەمدەرىنىڭ مولشەرى 1998 جىلعى 1 قاڭتارداعى جۇمىس وتىلىنە (كەم دەگەندە 6 اي قاجەت) جانە زەينەتكەرلىككە دەيىنگى كەزەڭدەگى ورتاشا ايلىق تابىسىنا بايلانىستى بولادى.
”ادىرنا” ۇلتتىق پورتالى
