قىتاي قازاقستاننان كەلەتىن جولاۋشىلار ءۇشىن تالاپتى وزگەرتتى. بۇل تۋرالى قىتايدىڭ قازاقستانداعى ەلشىلىگىنىڭ رەسمي سايتى مالىمدەدى، دەپ حابارلايدى “ادىرنا” ۇلتتىق پورتالى.
"ەپيدەميانى قاداعالاۋ ماقساتىندا قىتاي ەلشىلىگى مەن قازاقستانداعى باس كونسۋلدىق "HS" نەمەسە "HDC" دەنساۋلىق كودىن الۋ تالاپتارىن ەنگىزەدى", - دەلىنگەن حابارلامادا.
"قىتايدىڭ قازاقستانداعى ەلشىلىگى نەمەسە باس كونسۋلدىعى ءوتىنىشتى وڭدەگەننەن كەيىن جولاۋشىعا "دەنساۋلىقتىڭ جاسىل كودى" بەرىلەدى. ۇشۋعا تىركەلۋ كەزىندە ءموبيلدى قوسىمشا ارقىلى اشىلعان "دەنساۋلىق جاسىل كودىن" اۆياكومپانيا قىزمەتكەرىنە كورسەتىپ، ونى تەكسەرتەسىز", - دەلىنگەن ەلشىلىك حابارلاماسىندا.
قازاقستاننان ۇشىپ شىققان جانە ءۇشىنشى ەل ارقىلى ترانزيتپەن وتەتىن جولاۋشىلار نەمەسە ءۇشىنشى ەلدەن شىعىپ، قازاقستان ارقىلى قىتايعا ترانزيتپەن وتەتىن جولاۋشىلار پتر-سىنامادان ءوتىپ، "جاسىل كودتى" الۋ ءۇشىن كەز كەلگەن ترانزيتتىك نەمەسە جونەلتۋ پۋنكتتەرىنە ءوتىنىش بەرە الادى. جولاۋشىلار "دەنساۋلىق كودىنىڭ" جارامدى نەمەسە جارامسىز ەكەنىن قىتايعا ۇشپاي تۇرىپ تەكسەرىپ الۋى كەرەك.
