سوڭعى اپتادا رەسەي ۋكراينا اۋماعىن درون جانە زىمىراندارمەن سوققىلاپ جاتىر. شابۋىل رەكوردتىق دەڭگەيگە جەتتى. 25-مامىردا ءبىر مەزەتتە رەسەي ۋكراينا اۋماعىنا بىردەن 298 درون اتتى. ونداي بۇرىن بولماعان. بۇل كورسەتكىش ارتا بەرەدى جانە بۇل - كيەۆ ءۇشىن وتە جاعىمسىز جاڭالىق دەگەن ءسوز.
مىسالى، رەسەي بىلتىر كۇن سايىن 30-40 درون اتاتىن. (مايدان دالاسىنداعى ۇرىس جايلى ەمەس، ۋكراينانىڭ ىشكەرى اۋماعىنا جاسالعان شابۋىلداردا قولدانىلاتىن دروندار تۋرالى ايتىپ وتىرمىن). ەندى رەسەي ءبىر مەزەتتە جۇزدەگەن درون قولداناتىن بولدى. ۋكراينانىڭ بارلاۋ قىزمەتىنىڭ ايتۋىنشا الداعى ۋاقىتتا رەسەي ءبىر مەزەتتە 500-1000 درون قولداناتىن بولادى دەيدى. البەتتە، بۇل - ۋكراينانىڭ اۋە قورعانىس جۇيەسى ءۇشىن وتە ۇلكەن سالماق دەگەن ءسوز.
ۋكراينادا اۋە قورعانىس جۇيەسىنە ارنالعان زىمىراندار تاپشى. Patriot-قا ارنالعان زىمىراندار تاۋسىلۋدىڭ الدىندا تۇر. ەندى ۋكراينا اۋەدەگى نىساننىڭ قايسىسىن اتاتىنى تۋرالى تاڭداۋ جاساۋى مۇمكىن. ويتكەنى زىمىران جەتىسپەيدى. مىسالى، ءبىر مەزەتتە اۋەدە ونداعان درون مەن ەكى-ءۇش زىمىران ۇشىپ كەلە جاتسا، وندا زىمىراندى قاعىپ ءتۇسىرۋ شەشىمىن قابىلدايدى. ال درونداردىڭ بىرنەشەۋى نىساناعا ءوتىپ كەتۋى مۇمكىن. بۇل - وتە قيىن تاڭداۋ.
دروندار دا قاۋىپتى بولا ءتۇستى. مىسالى، بۇرىن Shahed-تەر 50 كەلىلىك جارىلعىشتى الىپ ۇشاتىن. رەسەي ول درونداردى بىرنەشە مارتە مودەرنيزاتسيالاپ، «گەران» دەپ اتاپ، جارىلعىش كۇشىن ارتتىردى. ەندى ول 50 كەلى ەمەس، 90 كەلى جارىلعىشتى الىپ ۇشادى. ەكى-ءۇش «گەران» ءبىر ءۇيدى قيراتىپ تۇسىرەتىن كۇشكە يە بولۋدا. بۇل دروندارعا راديوەلەكتروندى كەدەرگىلەر دە بۇرىنعىداي اسەر ەتپەيتىن بولدى.
قىسقاسى، اۋە شابۋىلى ۇلكەن ماسەلەگە اينالىپ كەلەدى. كيەۆ ماسەلەنى شەشۋ ءۇشىن باتىستان قوسىمشا اۋە قورعانىس جۇيەلەرى مەن زىمىراندار سۇراۋدا.
ۇقساس جاڭالىقتار
