اقش پرەزيدەنتى دونالد ترامپ ۋكراينادان اسكەري كومەك رەتىندە جۇمسالعان قاراجاتتىڭ وتەمىن قايتارۋدى تالاپ ەتتى، دەپ حابارلايدى "ادىرنا" ۇلتتىق پورتالى DW-گە سىلتەمە جاساپ.
"مەن ۋكراينا ءبىز سالعان ميللياردتاعان دوللار ءۇشىن بىزگە بىردەڭە بەرۋى كەرەك دەپ سانايمىن. سوندىقتان ءبىز سيرەك جەر مەتالدارىن، مۇنايدى جانە مۇمكىن بولاتىن بارلىق رەسۋرستاردى سۇرايمىز", – دەدى ترامپ.
مەريلەندتە وتكەن كونسەرۆاتيۆتى ساياسي ءىس-قيمىلدار كونفەرەنتسياسىندا (CPAC) سويلەگەن سوزىندە ول ەۋروپا ەلدەرى ۋكرايناعا كومەك رەتىندە نەسيە بەرگەنىن، ال اقش ونداي جاساماعانىن اتاپ ءوتتى. سول سەبەپتى امەريكاعا بەلگىلى ءبىر وتەماقى تولەنۋى كەرەك دەپ ەسەپتەيدى.
ء"بىز قاراجاتىمىزدى قايتارعىمىز كەلەدى، ويتكەنى بۇل ادىلەتسىزدىك", – دەدى ترامپ.
سونىمەن قاتار، ول ۆاشينگتون مەن كيەۆ پايدالى قازبالارعا قاتىستى كەلىسىم جاساۋعا وتە جاقىن ەكەنىن ايتتى.
ال ۋكراينالىق دەرەككوزدەردىڭ ايتۋىنشا ۆلاديمير زەلەنسكي اقش پەن ۋكراينا اراسىنداعى سيرەك جەر مەتالدارىن وندىرۋگە قاتىستى كەلىسىمنىڭ قازىرگى نۇسقاسىنا قول قويۋعا دايىن ەمەس.
"بىرنەشە داۋلى ماسەلەلەر بار، سوندىقتان پرەزيدەنت ونى قازىرگى كۇيىندە قابىلداۋعا دايىن ەمەس", – دەدى دەرەككوز.
The New York Times باسىلىمىنىڭ مالىمەتىنشە، اقش ۋكرايناعا كەلىسىمنىڭ جاڭا نۇسقاسىن ۇسىنعان. بىراق ونىڭ كەيبىر شارتتارى 14 اقپاندا كيەۆكە قارجى ءمينيسترى سكوتت بەسسەنت الىپ كەلگەن الدىڭعى نۇسقادان دا قاتاڭ.
ۋكراينا تاراپى بۇل شارتتارعا كەلىسەتىن-كەلىسپەيتىنىن ءالى ناقتىلاعان جوق. جوعارعى رادانىڭ سپيكەرى رۋسلان ستەفانچۋكتىڭ ايتۋىنشا، 24 اقپاندا ۇكىمەت دەڭگەيىندەگى ارنايى توپ كەلىسىم بويىنشا جۇمىستى باستايدى. ۋكراينا ۆاشينگتوننىڭ ءوز رەسۋرستارىنا قول جەتكىزۋىنە جاۋاپ رەتىندە ناقتى قاۋىپسىزدىك كەپىلدىكتەرىن العىسى كەلەدى.
ەسكە سالا كەتەيىك، بۇعان دەيىن ۋكراينا پرەزيدەنتى ۆلاديمير زەلەنسكي اقش ۇسىنعان ۋكراينانىڭ پايدالى قازبالارىنىڭ 50%-ىنا قۇقىق بەرەتىن كەلىسىمگە قول قويۋدان باس تارتقان بولاتىن.
