اتىراۋ وبلىسىنداعى جىلىوي ۋچاسكەسىندە مۇناي مەن گازدى بىرلەسىپ بارلاۋ جوباسى بويىنشا «قازمۇنايگاز» ۇلتتىق كومپانياسى مەن قىتايدىڭ جەتەكشى ەنەرگەتيكالىق كورپوراتسياسى — China National Offshore Oil Corporation International Limited (CNOOC) تاريحي كەلىسىمگە قول قويدى، دەپ حابارلايدى "ادىرنا" ۇلتتىق پورتالى.
بۇل كەلىسىمدەر استانادا وتكەن جوعارى دەڭگەيلى كەزدەسۋدە راسىمدەلىپ، قارجىلاندىرۋ جانە بىرلەسكەن قىزمەت تۋرالى ەكى نەگىزگى قۇجاتقا قول قويىلدى.
جوبا كاسپي تەڭىزىنىڭ سولتۇستىك-شىعىس بولىگىندە، مۇناي مەن گازعا باي دەپ ەسەپتەلەتىن ترانزيتتىك ايماقتا ورنالاسقان جىلىوي ۋچاسكەسىندە جۇزەگە اسىرىلادى. كولەمى شامامەن 960 شارشى شاقىرىم بولاتىن بۇل اۋماق بۇگىندە قازاقستانداعى اسا الەۋەتتى گەولوگيالىق نىسانداردىڭ ءبىرى سانالادى.
جوبا «50/50» قاعيداتىنا نەگىزدەلگەنىمەن، بارلىق بارلاۋ شىعىندارىن قىتايلىق تاراپ ءوز موينىنا الادى.
جوسپارعا سايكەس، الدىمەن سەيسموبارلاۋ جۇرگىزىلەدى. كەيىن تەرەڭدىگى 2 شاقىرىم بولاتىن ءبىر بارلاۋ ۇڭعىماسى بۇرعىلانادى. ال كەلەسى كەزەڭدە 4,5 شاقىرىمعا دەيىن جەتەتىن تۇزاستى قاباتىنا بۇرعى سالىنباق.
ايتا كەتەيىك، جىلىويداعى بىرلەسكەن كاسىپورىن 2023 جىلدىڭ قازان ايىندا قۇرىلعان. جوبا شارتتارىن بەكىتۋ جولىنداعى كەلىسسوزدەر قازاقستاندا عانا ەمەس، قىتايدا دا وتكەن.
ۇقساس جاڭالىقتار
