يسلام دامۋ بانكى قازاقستانداعى ينفراقۇرىلىمدىق جوبالارعا 2 ملرد دوللارعا دەيىن قارجى بولەدى، دەپ حابارلايدى “ادىرنا” ۇلتتىق پورتالى پرەمەر-ءمينيستردىڭ ءباسپاسوز قىزمەتىنە سىلتەپ.
“OPEC حالىقارالىق دامۋ قورى ۇيىمداستىرعان فورۋمدا قازاقستان رەسپۋبليكاسى پرەمەر-ءمينيسترىنىڭ ورىنباسارى – ۇلتتىق ەكونوميكا ءمينيسترى نۇرلان بايبازاروۆ اراب كوورديناتسيالىق توبىنا كىرەتىن يسلام دامۋ ينستيتۋتتارىمەن بىرقاتار ەكىجاقتى كەزدەسۋلەر وتكىزدى. سونداي-اق، قازاقستان رەسپۋبليكاسىنىڭ ۇكىمەتى مەن يسلام دامۋ بانكى اراسىنداعى نەگىزدەمەلىك باعدارلامالىق كەلىسىمگە قول قويدى. كەلىسىم بيىل سۋ شارۋاشىلىعى جانە كولىك سالالارىنداعى ينفراقۇرىلىمدىق جوبالاردى جۇزەگە اسىرۋ ءۇشىن ۇزاقمەرزىمدى ينۆەستيتسيالار تارتۋ تۋرالى بۇعان دەيىن قول جەتكىزىلگەن كەلىسىمدەردى بەكىتتى. وسى ماقساتتا يسلام دامۋ بانكى $2 ملرد دەيىن قارجى بولەدى” دەلىنگەن حابارلامادا.
اتاپ وتكەندەي، سۋ رەسۋرستارى جانە يرريگاتسيا مينيسترلىگى 2024 جىلى قارجىلاندىرۋعا دايىن 16 جوبانى دايىنداعان. ولارعا سۋ قويمالارىن، بوگەتتەردى، يرريگاتسيالىق كانالداردى، كونتررەگۋلياتورلاردى جانە ولارمەن بايلانىستى ينفراقۇرىلىمداردى سالۋ جانە قايتا جاڭارتۋ كىرەدى. كولىك مينيسترلىگى جالپى ۇزىندىعى 500 شاقىرىمنان اساتىن رەسپۋبليكالىق ماڭىزى بار جولداردى قايتا جاڭعىرتۋ جانە سالۋ بويىنشا ءتورت جوبانى ۇسىندى.
“كەلىسىم تابىستى ىسكە اسىرۋ جانە العا قويىلعان ماقساتتارعا قول جەتكىزۋ ءۇشىن بىرلەسكەن جوبالاردىڭ ورىندالۋ بارىسىنا تۇراقتى كونسۋلتاتسيالار مەن مونيتورينگ جۇرگىزۋدى كوزدەيدى” دەلىنگەن رەسمي سايتتا.
