رەسەيدىڭ سانكت-پەتەربۋرگ اسكەري سوتى قازاقستاندىق ستۋدەنت گارري ازارياندى تەرروريزمدى اقتاۋ بابى بويىنشا كىنالى دەپ تانىلدى، دەپ حابارلايدى "ادىرنا" ۇلتتىق پورتالى.
ول 2 جىلعا باس بوستاندىعىنان ايىرىلعان. وقيعا سانكت-پەتەربۋرگ قالاسىندا بولدى.
مەملەكەتتىك ايىپتاۋشى سوتتان 3 جىل جالپى رەجيمدەگى كولونيا جازاسىن سۇراعان. ال ستۋدەنتتىڭ ادۆوكاتى ايىپپۇل تۇرىندەگى جازا تاعايىنداۋدى تالاپ ەتكەن.
تەرگەۋ نۇسقاسىنا سايكەس، ايىپتالۋشى بيلىكتى كۇشپەن قۇلاتۋعا قاتىستى يدەيالاردى قولداعان دەگەن كۇدىككە ىلىنگەن. پروكۋرور اۋىرلاتاتىن جاعداي رەتىندە ونىڭ رەسەيدەگى موبيليزاتسيا كەزەڭىندە ۋكرايناداعى سوعىسقا قاتىستى پىكىر بىلدىرگەنىن اتاعان.
سوتتا سوڭعى ءسوز سويلەگەن گارري ازاريان كىناسىن مويىنداپ، جاساعان ارەكەتىنە وكىنىش بىلدىرگەن. ول قوعامعا قايتا ورالىپ، پايدالى بولعىسى كەلەتىنىن جانە راديكالدى ارەكەتتەرگە بارمايتىنىن ايتقان.
23 جاستاعى ستۋدەنت قازاقستاننان رەسەيگە بارىپ، سانكت-پەتەربۋرگ مەملەكەتتىك ۋنيۆەرسيتەتىن تامامداعان. كەيىن ماگيستراتۋرادا ءبىلىمىن جالعاستىرعان.
ول 2025 جىلدىڭ مامىر ايىندا قاماۋعا الىنعان.
تەرگەۋ ماتەريالدارى بويىنشا، ستۋدەنت رەسەيدە 2024–2025 جىلدارى بولعان جۇمىسشى بيلىگى اتتى ۇيىمنىڭ ستۋدەنتتىك ۇياشىعىنا قاتىسى بولۋى مۇمكىن دەپ كۇدىكتەلگەن. تەرگەۋ دەرەگىنشە، بەيرەسمي كەزدەسۋلەردە رەۆوليۋتسيا، تاپتىق قاقتىعىس جانە كوشەدەگى كۇش قولدانۋ تاقىرىپتارى تالقىلانعان.
قازىرگى ۋاقىتتا ۇكىم زاڭدى كۇشىنە ەنگەنى نەمەسە شاعىمداناتىنى تۋرالى اقپارات جاريالانعان جوق.
