4-14 ءساۋىر ارالىعىندا سەربيانىڭ باتىسىنداعى كوركەم زلاتيبور ايماعىندا ISF U15 2025 مەكتەپ وقۋشىلارىنا ارنالعان جىل سايىنعى سپورت فەستيۆالى وتەدى. بيىل بۇل جارىسقا 55 ەلدەن 2 500-دەن استام جاس سپورتشى قاتىسادى. قازاقستان قۇراماسى 22 سپورتشىمەن ۇسىنىلىپ، ولار بوكس، ەركىن كۇرەس، شاحمات جانە دزيۋدو سپورت تۇرلەرىندە ەل نامىسىن قورعايدى. ولاردىڭ 12-ءسى - تيمۋر قۇلىباەۆتىڭ «Halyk» قايىرىمدىلىق قورىنىڭ قولداۋىمەن جۇزەگە اسىرىلىپ جاتقان Auyl Sport جوباسىنىڭ جەڭىمپازدارى.
Auyl Sport – اۋىل سپورتىن دامىتۋعا باعىتتالعان ءىرى باستاما
2024 جىلى ىسكە قوسىلعان Auyl Sport – اۋىل بالالارىنا ارنالعان ەڭ ءىرى رەسپۋبليكالىق سپورتتىق جوبالاردىڭ ءبىرى. وتكەن جىلى 200 ەلدى مەكەننەن 12 000 جاس سپورتشى وڭىرلىك تۋرنيرلەرگە قاتىسىپ، 17 وبلىستان 1 300 ۇزدىك سپورتشى فينالدا ءوز شەبەرلىكتەرىن كورسەتتى.
«Auyl Sport جوباسىنىڭ باستى ماقساتى – سپورتتى دامىتۋ عانا ەمەس، بالالاردىڭ تۇراتىن جەرىنە قاراماستان، ولارعا تەڭ مۇمكىندىك بەرۋ. سەربياداعى گيمنازياداعا اۋىل سپورتشىلارىنىڭ قاتىسۋى – وسى ماقساتتىڭ جۇزەگە اسىپ جاتقانىنىڭ ايقىن دالەلى. بۇل – كوپتەگەن بالالار ءۇشىن حالىقارالىق ارەناداعى العاشقى قادام، ولار الەمنىڭ ەڭ ۇزدىك جاس سپورتشىلارىمەن باسەكەگە ءتۇسىپ، قازاقستاننىڭ نامىسىن قورعايدى. بۇل – Auyl Sport جوباسى ءۇشىن ۇلكەن ءۇمىت سىيلايتىن جانە شابىتتاندىراتىن باستاما. بارلىق سپورتشىلارعا ساتتىلىك تىلەيمىز!» – دەپ اتاپ ءوتتى «Halyk» قورىنىڭ اتقارۋشى ديرەكتورى عالىمبەك جاقسىلىقوۆ.
قازىرگى تاڭدا Auyl Sport اياسىندا بوكس، كۇرەس، كاراتە، باسكەتبول، ۆولەيبول جانە شاحمات سپورت تۇرلەرى بويىنشا جارىستار وتكىزىلىپ كەلەدى. 2025 جىلدان باستاپ جوباعا ۇستەل تەننيسى دە قوسىلادى.
جەڭىمپازدار وقيعاسى: ارمانعا اپارار جول
«Auyl Sport – مەن ءۇشىن جاي عانا جارىس ەمەس، جاڭا ومىرگە باستار جول. وسى جوبانىڭ رەسپۋبليكالىق تۋرنيرىندە جەڭىمپاز اتانىپ، سەربياداعى حالىقارالىق گيمنازياداعا بارا جاتقانىم مەن ءۇشىن ۇلكەن جەتىستىك. اتا-انام مەن تۋعان اۋىلىمنىڭ ءۇمىتىن اقتاۋ ءۇشىن بارىمدى سالامىن»، – دەيدى ايبەك سادىق، Auyl Sport جوباسىنىڭ جەڭىمپازى.
«مەن ءوز بالامنىڭ جەتىستىكتەرىمەن ماقتانامىن. Auyl Sport جوباسى مەن "Halyk" قورىنىڭ قولداۋىنىڭ ارقاسىندا ول حالىقارالىق ارەنادا ءوز مۇمكىندىكتەرىن كورسەتۋگە جول اشتى. بۇرىن بۇل ءبىز ءۇشىن قول جەتپەس ارمان سەكىلدى كورىنەتىن. اتا-انا رەتىندە ءبىز زور العىسىمىزدى بىلدىرەمىز. بۇل جوبا ءاربىر بالاعا ءوز الەۋەتىن اشۋعا جانە ءوز ارمانىنا جاقىنداۋعا مۇمكىندىك بەرەدى»، – دەيدى جوبا فيناليستەرىنىڭ ءبىرىنىڭ اتا-اناسى.
«Halyk» قورى – اۋىل سپورتىنا سەرپىن بەرگەن قولداۋ
تيمۋر قۇلىباەۆتىڭ «Halyk» قايىرىمدىلىق قورى حالىقتىڭ ءال-اۋقاتىن ارتتىرۋعا جانە از قامتىلعان ازاماتتارعا قولداۋ كورسەتۋگە باعىتتالعان بىرقاتار الەۋمەتتىك جوبالاردى جۇزەگە اسىرىپ كەلەدى. اۋىل سپورتىن دامىتۋعا قور 500 ميلليون تەڭگەگە جۋىق قارجى ءبولدى.
ISF U15 2025 – قازاقستاندىق جاس سپورتشىلار ءۇشىن جاڭا بەلەستەرگە باستار مۇمكىندىك. ولارعا جەڭىس پەن ساتتىلىك تىلەيمىز!
