جۋرناليست، كاسىپكەر، اۋەسقوي مارافونشى، الپينيست ەرەنعايىپ قۋاتايۇلى ءوزىڭىڭ Facebook پاراقشاسىندا 1 مامىر كۇنى قۇقىق قورعاۋ ورگاندارى تاراپىنان كورگەن "تەپەرىشى" جايلى جازدى. اۆتوردىڭ ايتۋىنشا، بەتى-باسى تۇمشالانعان بەس جىگىت ونى سەبەپسىز ۇستاپ اكەتكەن، دەپ حابارلايدى "ادىرنا" ۇلتتىق پورتالى.
جۋرناليست، اۋەسقوي سپورتشى ەرەنعايىپ قۋاتايۇلى بولعان جايدى بىلاي تۇسىندىرەدى:
- ءبىرىنشى مامىر. بىرلىك كۇنى. استانا. كەنەسارى حان ەسكەرتكىشى. ساعات 13:45. تانىسىمدى كۇتىپ ورىندىقتا وتىرعانمىن. ءبىز وسى جەردە 13:30-دا كەزدەسەتىن بولعانبىز. “برات، مۇندا وتىرۋعا بولمايدى!” دەگەن داۋىسقا جالت قاراپ، “نەگە وتىرۋعا بولمايدى؟” دەگەنىمشە بەت اۋزى تۇمشالانعان بەس جىگىت قويشا جۇلقىلاپ كولىككە ءبىر-اق تىقتى. سارىارقا اۋداندىق ىشكى ىستەر باسقارماسىنا الىپ كەلدى.
ساۋساق ىزدەرىن الدى. فوتوعا ءتۇسىردى. سۇراق-جاۋاپ الدى. كەنەسارى حان ەسكەرتكىشىنە نەشەدە نە ماقساتپەن كەلگەنىمدى سۇرادى. تاڭەرتەڭ الماتىدان ۇشىپ كەلگەنىمدى، قاراعاندىعا بارا جاتقانىمدى، 2 مامىر كۇنى قاراعاندى-تۇركىستان ۋلترا مارافونىنا قاتىساتىنىمدى، جولاي استانالىق تانىسىما جولىعىپ كەتۋ ءۇشىن وسى جەرگە كەلگەنىمدى ايتتىم.
ء“سىز الەۋمەتتىك جەلىدەن مۇحتار ءابىلازوۆتىڭ ساياسي ۇندەۋلەرىن تىڭدايسىز با؟” دەگەن سۇراق قويىلعاندا مەنى مۇندا نە ءۇشىن الىپ كەلگەندەرىن ءتۇسىندىم، - دەيدى جۋرناليست.
اۆتور كەيىننەن ءوزىن جولدان قالدىرعان استانا پوليتسەيلەرىنىڭ ارەكەتىن ايتىپتاپ، جوسپارىنىڭ بۇزىلعانى جايلى ايتادى.
- زاڭسىز، ەش سەبەپسىز ىشكى ىستەر باسقارماسىندا مەنى ءتورت ساعات قىرىق مينۋت ۇستادى. ءبىر مارافون جانە ءبىر جارتى مارافون جۇگىرىپ تاستايتىن قايران ۋاقىتىم ءراسۋا بولدى! بارىنەن كەزدەسۋىم كەرەك ادامنان قاتتى ۇيالىپ وتىرمىن! قۇرمەتتى دوس، ءسىز مەنىڭ وسى جازبامدى وقىپ وتىرساڭىز، سىزدەن كەشىرىم سۇرايمىن!..
قاراعاندىعا ەندى عانا جەتتىم. تانەرتەڭ ەرتە ۋلترا مارافوننىڭ العاشقا 21 كم ەستافەتاسىن باستاپ جۇگىرەمىن!جاڭا قازاقستانعا ءبىر سۇراق: سىزدەر قانداي قازاقستان قۇرىپ جاتىرسىزدار؟
استانا قالالىق (قر ىشكى ىستەر مينيسترلىگى / مينيستەرستۆو ۆنۋترەننيح دەل رك) ىشكى ىستەر دەپارتامەنتى، مەنى نە ءۇشىن بەس ساعاتقا جۋىق ۇستادىڭىزدار؟ جاۋاپ كۇتەمىن! - دەدى اۆتور.
اۋەسقوي جەلاياقتىڭ "جازىقسىز جازباسىنا" قر ءماجىلىس دەپۋتاتتارى جاناربەك ءاشىمجان مەن ەرمۇرات ءباپي پىكىر ءبىلدىردى.
- ەرەنعايىپ قۋاتايۇلى - تالانتتى جۋرناليست، سىيلاس ارىپتەس، دوس، اۋەسقوي الپينيست، كاسىبي مارافونشى. بىرگە قىزمەت ەتتىك. قازاقستاننىڭ اقپارات كەڭىستىگىنىڭ دامۋىنا ءوزىنىڭ ۇلەسىن قوسقان ازامات، بۇگىندە بيزنەستە تابىستى ەڭبەك ەتۋدە. قازاقستاننىڭ ىشكى مارافونىن بىلاي قويعاندا، اقش-تىڭ ايگىلى بوستون مارافونىندا، ەۋروپانىڭ بەدەلدى مارافوندارىندا، جۋىردا عانا جاپونيانىڭ توكيو مارافونىندا الەمنەن جيىلعان مىڭداعان سپورتشىنىڭ اراسىندا جانكەشتى ونەر كورسەتىپ، جوعارى ناتيجەگە قول جەتكىزدى. 2020 جىلى تيان-شانداعى بيىكتىگى التى مىڭ مەتردەن اساتىن ءمارمار قابىرعا اتتى شىڭدى باعىندىرعان.
ال كەشەگى پوليتسەيلەردىڭ كۇن جارىقتا "جاۋ شاقىرىپ" جۇرگەن قادامى وتە ۇيات بولعان ەكەن…
"شاش ال" دەسە، كەيدە باس الامىز… ەڭ جامانى - وسىنداي باسسىزدىقتار ارقىلى بەدەلدى ازاماتتاردى قوعامعا قارسى قويامىز جانە قوعامدا تەرىس پىكىر تۋدىرامىز… وتە ۇياتتى جاعداي بولعان ەكەن. مارات احمەتجانوۆ باسقاراتىن ءتيىستى مەملەكەتتىك ورگان رەسمي جاۋاپ بەرۋ كەرەك، - دەدى جاناربەك ءاشىمجان.
جۋرناليست، دەپۋتات ەرمۇرات ءباپي قۇقىق قورعاۋ ورگاندارىنان كەشىرىم سۇراۋدى تالاپ ەتىپ، "جازىقسىز جەلاياققا" جاقتاستى.
- قر ىشكى ىستەر مينيسترلىگى! مينيستر مارات احمەتجانوۆ مىرزا! ەرەنعايىپ قۋاتايۇلى مىرزاعا شۇعىل جاۋاپ بەرىپ، كەشىرىم سۇراۋ قاجەت بولادى، - دەدى دەپۋتات.
ورايى كەلگەندە ايتا كەتەيىك، سپورتشى مارات جىلانباەۆتى دا پوليتسيا قىزمەتكەرلەرى ۇستاپ اكەتتى. ول "پوليتسيا بولىمشەسىندە كوپ ۋاقىت بوگەلمەيتىنىن ايتقان" ماماندارعا سەنگەنىن ايتادى. وسىلايشا، سپورتشى استانا قالاسى، الماتى اۋداندىق پوليتسيا بولىمىنە جەتكىزىلەدى. 2023 جىلدىڭ اقپانىندا جىلانباەۆ دەپۋتاتتىققا ۇسىنىلدى، بىراق كەيىنىرەك سوت ونى "مەرزىمىنەن بۇرىن ۇگىت جۇرگىزگەنى ءۇشىن" ايىپپۇل سالىنادى.
جۋرناليست دۋمان مۇحامەدكارىم دە "بەيبىت جيىن وتكىزۋ ءتارتىبىن بۇزدى" دەگەن ايىپپەن 25 تاۋلىككە قامالدى.
"ادىرنا" ۇلتتىق پورتالى
