قاراشىعاناق كەن ورنى وپەراتورىنا ميلليونداعان ايىپپۇل سالىندى. Karachaganak Petroleum Operating B.V. قورشاعان ورتاعا زيان كەلتىرگەنى ءۇشىن 739,5 ملن تەڭگە ايىپپۇل ارقالاعان. بۇل تۋرالى باتىس قازاقستان وبلىسىنىڭ پروكۋراتۋراسى مالىمدەدى، دەپ حابارلايدى “ادىرنا” ۇلتتىق پورتالى.
مۇناي كومپانياسى قورشاعان ورتاعا زياندى قالدىقتاردى بەكىتىلگەن شەكتەن ارتىق توككەن. جالپى كولەمى 264 توننا زياندى قالدىق شىعارىلعان.
«وسىعان بايلانىستى قاداعالاۋ اكتىسى بويىنشا كومپانيا اقبتك-ءنىڭ 328-بابى بويىنشا اكىمشىلىك جاۋاپكەرشىلىككە تارتىلدى (قورشاعان ورتاعا جول بەرىلەتىن انتروپوگەندىك اسەر ەتۋ، نورماتيۆتەرىن بۇزۋ), جالپى سوماسى 739 568 808 تەڭگە ايىپپۇل تولىعىمەن ءوندىرىلدى»، – دەلىنگەن پروكۋراتۋرا حابارلاماسىندا.
1979 جىلى اشىلعان قاراشىعاناق – الەمدەگى ەڭ ءىرى مۇناي-گاز كەن ورىندارىنىڭ ءبىرى. كەن ورنىنىڭ وپەراتورى – Karachaganak Petroleum Operating B.Vكومپانياسى.
