استانادا پوليتسەيلەر ءورت بولعان "كوركەم-3" تۇرعىن ءۇي كەشەنى اۋلاسىنا كىرەر جولدى بوگەپ تاستاعان كولىك يەسىن جازالادى. بۇل تۋرالى پوليتسيا دەپارتامەنتى مالىمدەدى، دەپ حابارلايدى “ادىرنا”.
اقپاراتقا سايكەس، ەرەجەگە قايشى قويىلعان اۆتوكولىك وقيعا ورنىنان دەرەۋ الىنعان.
"جۇرگىزۋشى انىقتالىپ، اكىمشىلىك جاۋاپكەرشىلىككە تارتىلدى. ازاماتتاردىڭ قاۋىپسىزدىگىنە قاتەر توندىرەتىن جانە شۇعىل قىزمەتتەردىڭ جۇمىسىنا كەدەرگى كەلتىرەتىن زاڭبۇزۋشىلىقتار قاتاڭ تۇردە تىيىلادى", - دەپ حابارلادى دەپارتامەنت.
جۇرگىزۋشى اكىمشىلىك قۇقىق بۇزۋشىلىق تۋرالى كودەكستىڭ 597-بابى "كولىك قۇرالدارىن توقتاتۋ نەمەسە توقتاپ تۇرۋ قاعيدالارىن بۇزۋ" بويىنشا جازالانعان. بۇل باپ بويىنشا 5 اەك-تەن (2026 جىلى 21 625 تەڭگە) 15 اەك-كە (64 875 تەڭگە) دەيىنگى مولشەردە ايىپپۇل قاراستىرىلعان. ايىپپۇل كولەمى قۇقىق بۇزۋشىلىقتىڭ اۋىرلىعىنا بايلانىستى بەلگىلەنەدى.
ايتا كەتسەك، 12 ساۋىرگە قاراعان ءتۇنى استاناداعى تۇركىستان كوشەسىندە ورنالاسقان 21 قاباتتى تۇرعىن ءۇيدىڭ 15-قاباتىنداعى پاتەردەن ءورت شىققان. پاتەر ىشىنەن ءۇش بالانىڭ دەنەسى تابىلعان ەدى. ءورت سوندىرۋشىلەر ءبىر ايەلدى قۇتقارىپ قالدى، ول دەنەسىن كۇيىك شالىپ، اۋرۋحاناعا جاتقىزىلدى. جوعارعى قاباتتاردان 20 ادام ەۆاكۋاتسيالاندى، تاعى 40-قا جۋىق تۇرعىن عيماراتتان ءوز بەتىنشە شىعىپ ۇلگەردى. ءورت دەرەگى بويىنشا سوتقا دەيىنگى تەرگەپ-تەكسەرۋ باستالدى، ءتيىستى ساراپتامالار تاعايىندالدى.
الەۋمەتتىك جەلىلەردە كولىكتەردىڭ ءبىرى ءورت ءسوندىرۋ ماشيناسىنىڭ جولىن بوگەپ تاستاعانى، سونىڭ سالدارىنان ولار وقيعا ورنىنا ۋاقىتىندا جەتە الماعانى تۋرالى اقپارات تاراعان بولاتىن.
