«ارسەلورميتتال تەمىرتاۋ» كومپانياسىنا 5,8 ملرد تەڭگە ايىپپۇل سالىندى . بۇل تۋرالى بۇگىن وكق-دا وتكەن بريفينگتە ەكولوگيالىق رەتتەۋ جانە باقىلاۋ كوميتەتىنىڭ توراعاسى زۇلفۇحار جولداسوۆ مالىمدەدى، دەپ حابارلايدى “ادىرنا” ۇلتتىق پورتالى.
«ارسەلورميتتال تەمىرتاۋ» مەتاللۋرگيالىق كەشەنى – تەمىرتاۋ قالاسىنداعى اتموسفەرالىق اۋانى لاستاۋشى نەگىزگى كاسىپورىن. ونىڭ اۋانى لاستاۋداعى ۇلەسى – 86,4 پايىز. جىل سايىن «ارسەلورميتتال تەمىرتاۋ» كاسىپورنىنا ەكولوگيالىق باقىلاۋ جۇرگىزىلەدى. بيىلعى 9 ايدا اۋماقتىق ەكولوگيا دەپارتامەنتى كومپانياعا 7 جوسپارلى جانە جوسپاردان تىس تەكسەرۋ جۇرگىزدى. ونىڭ ناتيجەسى بويىنشا ەكولوگيالىق زاڭنامانىڭ بۇزىلۋى فاكتىلەرى انىقتالدى، - دەدى كوميتەت توراعاسى.
ونىڭ ايتۋىنشا، كاسىپورىن بەيورگانيكالىق شاڭ-توزاڭداردى نورماتيۆتەن تىس شىعارعان، بۇرىن بەرىلگەن نۇسقامالاردى ورىنداماعان جانە گاز شىعاتىن قۇرىلعىلاردى ۇستاۋ بويىنشا ءتيىمدى شارالار قابىلداماعان.
ال كاسىپورىن باسشىلىعى بۇل شەشىممەن كەلىسپەي، قارسى شاعىم تۇسىرگەن. زۇلفۇحار جولداسوۆ قازىر ءىستىڭ سوتتا قارالىپ جاتقانىن اتاپ ءوتتى.
